រាជធានីភ្នំពេញ ៖ កម្មការិនីរោងចក្រកាត់ដេរសម្លៀកបំពាក់ យីហោ«OLIVE APPAREL (Cambodia) Co,Ltd» នៅតែទទួលរងនូវការដួលសន្លប់បន្តទៀត ដែលនៅលើកនេះគឺជាលើកទី៣ហើយដែលមានចំនួនជិត៥០នាក់ និងត្រូវបានតំណាងរោងចក្រដឹកជញ្ជូនទៅកាន់គ្លីនិកឯកជនដើម្បីសង្គ្រោះបន្ទាន់ជាបន្តបន្ទាប់ ។ ហេតុការណ៍នេះបានបង្កឱ្យមានការភ្ញាក់ផ្អើលជាថ្មីម្ដងទៀត កាលពីវេលាម៉ោង៨និង៣០នាទីព្រឹកថ្ងៃ២៦ ខែកុម្ភៈ ឆ្នាំ២០១៩។
នៅក្នុងរោងចក្រកាត់ដេរសម្លៀកបំពាក់យីហោ«OLIVE APPAREL (Cambodia) Co,Ltd» ដែលមានទីតាំងស្ថិតនៅតាមបណ្ដោយផ្លូវជាតិលេខ៣ភូមិព្រៃកំបុត សង្កាត់ ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឱ្យដឹងថារោងចក្រកាត់ដេរខាងលើនេះមានកម្មករកម្មការិនីបម្រើការងារសរុបជាង២ពាន់នាក់ ហើយរយៈពេល៤ថ្ងៃកន្លងមកនេះមានកម្មការិនីប្រមាណជាង២០០នាក់បានដួលសន្លប់ជាបន្តបន្ទាប់ចំនួន៣លើករួចមកហើយ ។ ក្នុងនោះលើកទី១កើតឡើង កាលពី វេលាព្រឹកថ្ងៃទី២៣ ខែកុម្ភៈឆ្នាំ២០១៩ មានកម្មការិនីដួលសន្លប់ចំនួន៥០នាក់ ។
មូលហេតុដែលនាំឱ្យមានការដួលសន្លប់នោះត្រូវបានសមត្ថកិច្ចរកឃើញថា បណ្ដាលមកពីក្លិនប្រេងប៉ុងរថយន្តដែលភាយចេញពីយានដ្ឋានជួសជុលរថយន្តមួយកន្លែង ដែលស្ថិតនៅខាងក្រោយរោងចក្រនោះ ។ ជាហេតុធ្វើឱ្យកម្មការិនីខាងលើអត់ទ្រាំនិងក្លិនអាក្រក់នោះមិនបានក៏មានអាការៈវិលមុខក្អួត និងទន់ដៃជើងរួចក៏ដួលសន្លប់តែម្ដង ។
ប្រភពដដែលបានបន្តថា ក្រោយពេលមានហេតុការណ៍បែបនេះថៅកែរោងចក្របានឱ្យកម្មករទាំងអស់ឈប់សម្រាកបណ្ដោះអាសន្ននាថ្ងៃកើតហេតុនោះផងដែរ ។ លុះថ្ងៃបន្ទាប់មិនមានកម្មការិនីសន្លប់ទៀតឡើយព្រោះជាថ្ងៃអាទិត្យមិនមានកម្មធ្វើការ រហូតដល់វេលាម៉ោង៧និង៣០នាទីព្រឹកថ្ងៃទី២៥ ខែកុម្ភៈ ឆ្នាំ២០១៩ ត្រូវនិងថ្ងៃចន្ទ បន្ទាប់ពីកម្មករចូលធ្វើការបានរយៈពេលកន្លះម៉ោងក្រោយមក ក៏ស្រាប់តែមានកម្មការិនីដួលសន្លប់ចំនួន៨៨នាក់ជាលើកទី២ទៀត ។ខណៈនោះរោងចក្រត្រូវបានបិទទ្វារជាបណ្ដោះអាសន្នម្ដងទៀតព្រោះកម្មករត្រូវបានអនុញ្ញាតឱ្យឈប់សម្រាកដោយមិនអាចបន្តការងារបានតទៅទៀតឡើយ ។
ប្រភពខាងលើបានបន្តថា លុះដល់វេលាម៉ោង៨និង៣០នាទីព្រឹកថ្ងៃ២៦ ខែកុម្ភៈខណៈកំពុងតែធ្វើការសុខៗស្រាប់តែមានអ្នកដួលសន្លប់ជាបន្តបន្ទាប់ចំនួន៤៧នាក់ជាលើកទី៣ទៀតហើយរោងចក្រក៏ត្រូវបានផ្អាកជាបណ្ដោះអាសន្នជាបន្តទៀត ។
សរុបការដួលសន្លប់រយៈពេលថ្ងៃកន្លងទៅនេះមានចំនួន៣លើកសរុបកម្មការិនីរងគ្រោះមានចំនួនជាង២០០នាក់ ម្យ៉ាងទៀត២លើកចុងក្រោយនេះមិនទាន់ត្រូវបានដឹងពីមូលហេតុនៃការដួលសន្លប់នេះច្បាស់លាស់នៅឡើយទេ៕
ចែករំលែកព័តមាននេះ