ប្រទេសជប៉ុន ៖ ប្រភពមួយចំនួនបានប្រាប់ដល់សារព័ត៌មាន Japan Times កាលពីថ្ងៃចន្ទ កន្លងមកថា ប្រទេសជប៉ុន និងសហរដ្ឋអាមេរិកអាចនឹងចាប់ផ្តើមការចរចាពាណិជ្ជកម្មនៅខែមេសា ឬឧសភា ព្រោះសហរដ្ឋអាមេរិកត្រូវចរចាជាមួយនឹងប្រទេសចិនជាមុនសិន ។
ប្រភពខាងលើបានបន្ថែមថា យោងតាមការព្រមព្រៀងគ្នាកាលពីខែកញ្ញាមុន កិច្ចចរចារវាងជប៉ុន និងសហរដ្ឋអាមេរិកនឹងត្រូវបានប្រារព្ធក្នុងសហរដ្ឋអាមេរិកមុនថ្ងៃទី២៦ ខែឧសភា ពេលដែលលោកប្រធានាធិបតី ត្រាំ ធ្វើទស្សនៈកិច្ចទៅកាន់ប្រទេសជប៉ុន។
អ្នកតំណាងផ្នែកពាណិជ្ជកម្មអាមេរិកគឺលោក Robert Lighthizer និងរដ្ឋមន្ត្រីលើកស្ទួយសេដ្ឋកិច្ចជប៉ុនគឺលោក Toshimitsu Motegi ត្រូវជួបគ្នានៅខែមីនា ប៉ុន្តែលោក Lighthizer មានការជាប់រវល់ជាមួយនឹងកិច្ចចរចារវាងសហរដ្ឋអាមេរិក និងប្រទេសចិន ។
ព្រោះតែទីផ្សារហិរញ្ញវត្ថុបន្តតាមដានមើលលទ្ធផលនៃការចរចារវាងប្រទេសចិន និងសហរដ្ឋ អាមេរិក លោកប្រធានាធិបតី ដូណាល់ ត្រាំ (Donald Trump) បាននិយាយកាលពីថ្ងៃអាទិត្យ មកថាលោកនឹងពន្យាពេលថ្ងៃកំណត់សម្រាប់កិច្ចព្រមព្រៀងពាណិជ្ជកម្មជាមួយនឹងប្រទេសចិន ខណៈដែលផ្អាកការបង្កើនពន្ធលើផលិតផលចិនផងដែរ ។
ជាមួយគ្នានេះផងដែរ លោកនាយករដ្ឋមន្ត្រី Shinzo Abe របស់ប្រទេសជប៉ុន និងលោកប្រធានាធិបតីត្រាំបានព្រមព្រៀងគ្នាថានឹងចាប់ផ្តើមការចរចាពាណិជ្ជកម្មទ្វេភាគី និងបានបន្ថែមថា ការចរចានឹងផ្តោតសំខាន់លើផលិតផលផងដែរ ។
ដោយសារតែលោកប្រធានាធិបតីត្រាំបានលើកឡើងម្តងហើយម្តងទៀតទាក់ទិននឹងឱនភាពពាណិជ្ជកម្មរបស់អាមេរិកជាមួយនឹងដៃគូពាណិជ្ជកម្មធំៗដូចជាជប៉ុន ការផ្តោតសំខាន់នៃកិច្ចចរចានឹងរួមមានឧបសគ្គពាណិជ្ជកម្មផ្សេងៗដូចជាកូតានាំចូលរថយន្តជប៉ុនជាដើម ។
ទាក់ទិននឹងបញ្ហានេះ ប្រទេសជប៉ុនចង់ផ្តោតលើដំណើរការពន្ធដារ ប៉ុន្តែមានការគិតថាសហរដ្ឋអាមេរិកអាចនឹងជំរុញឲ្យត្រួតពិនិត្យវិធានទាក់ទិននឹងឱសថ និងឧបករណ៍វេជ្ជសាស្ត្រផ្សេងៗជាដើម ៕
ប្រភព ៖ Japan Times
ចែករំលែកព័តមាននេះ