តាមការស្រាវជ្រាវមួយបានបង្ហាញថា ស្ត្រីទទួលទានអាហារសម្បូរខ្លាញ់ច្រើនក្នុងវ័យក្មេង អាចបង្កើនអត្រាប្រឈមនឹងការកើតជំងឺមហារីកដោះពេលក្រោយក្នុងជីវិត ។ អ្នកដឹកនាំការស្រាវជ្រាវ វេជ្ជបណ្ឌិត Russ Hovey មកពីសាកលវិទ្យាល័យ University of California សហរដ្ឋអាមេរិកបានថ្លែងថា របកគំហើញនៃការសិក្សានេះ ពិតជាមានសារសំខាន់ខ្លាំងណាស់នៅពេលយើងដាក់បញ្ចូលវាទៅក្នុងទិន្នន័យដែលបង្ហាញថា ស្ត្រីធ្លាប់កើតជំងឺមហារីកដោះក្នុងវ័យក្មេងគឺកើតដំណាលគ្នានឹងការកើតមានជំងឺបណ្តាលមកពីភាពធាត់លើសទម្ងន់ក្នុងវ័យកុមារភាព ។
ក្រុមអ្នកវិទ្យាសាស្ត្រជឿថា ការជាប់ពាក់ព័ន្ធគ្នារវាងភាពធាត់លើសទម្ងន់និងមហារីកអាចបណ្តាលមកពីវត្តមានកម្រិតអាំងស៊ុយលីនឡើងខ្ពស់ហួសកំណត់ ។ សរសេរនៅក្នុងព្រឹត្តិបត្រ Proceedings of the National Academy of Sciences ពួកគេបានចង្អុលបង្ហាញថា បណ្តាស្ត្រីក្រោយពីអស់រដូវហើយកម្រិតអាំងស៊ុយលីនរបស់គេកើនឡើងគឺគេចមិនផុតពីការប្រឈមខ្ពស់នឹងជំងឺមហារីកដោះនោះឡើយ ។
ទោះជាយ៉ាងណា ការសិក្សារបស់អាមេរិកលើកនេះគឺទើបតែពិសោធលើសត្វកណ្តុរនៅឡើយ ពោលគឺនេះមិនមែនជាលទ្ធផលដែលកើតចេញពីការពិសោធលើមនុស្សនោះទេ ៕
ចែករំលែកព័តមាននេះ