ខេត្តឧត្តរមានជ័យ ៖ តាមសេចក្តីរាយការណ៍បឋមឲ្យដឹងថា កាលពីរសៀលថ្ងៃទី២៣ កុម្ភៈ កិច្ចប្រតិបត្តិការដ៏ក្តៅគគុកមួយរបស់កម្លាំងនគរបាលខេត្តកំពត សហការជាមួយកម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ កម្លាំងស្នងការដ្ឋាននគរបាលខេត្តឧត្តរមានជ័យ និងកម្លាំងនគរបាលមូលដ្ឋាន
អូរស្មាច់ បានបង្ក្រាបក្រុមចោរលួចរថយន្តនៅផ្ទះជួលមួយកន្លែង ស្ថិតនៅចំណុចព្រំប្រទល់កម្ពុជា-ថៃ ក្នុងទឹកដីអូរស្មាច់ ក្រុង សំរោង រហូតឈានដល់ការឃាត់ខ្លួនជនសង្ស័យ៣នាក់ ។
នៅក្នុងប្រតិបត្តិការនេះ បានចាប់ឃាត់ខ្លួនជនសង្ស័យចំនួន៣នាក់មាន ១-ឈ្មោះ នួន យាន ភេទប្រុស អាយុ៣៦ឆ្នាំ ២-ឈ្មោះ ស៊ុម ហយ ហៅពេជ្រ ភេទប្រុស អាយុ២១ឆ្នាំ និង ៣-ឈ្មោះ ស៊ុម ង៉ុយ ភេទប្រុស អាយុ៤២ឆ្នាំ ។ សេចក្តីរាយការណ៍ឲ្យដឹងទៀតថា ប្រតិបត្តិការនេះដែរ មានការបញ្ជាផ្ទាល់ពីលោកឧត្តមសេនីយ៍ទោ ម៉ែន លី ស្នងការនគរបាលខេត្ត និងលោកឧត្តមសេនីយ៍ត្រី ឡឹក សុខា ស្នងការរង ដឹកនាំកម្លាំងការិយាល័យព្រហ្មទណ្ឌកម្រិតធ្ងន់ខេត្តឧត្តរមានជ័យ រួមជាមួយកម្លាំងនគរបាលប៉ុស្តិ៍រដ្ឋបាលអូរស្មាច់ ក្រោមការសហការជាមួយការិយាល័យអនុវត្តដីកានៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ អនុវត្តតាមដីកាចាប់ខ្លួន និងបញ្ជាឲ្យចូលខ្លួនរបស់សាលាដំបូងខេត្តកំពត ។
ជនសង្ស័យទាំង៣នាក់ក្នុងចំណោមបក្សពួក៤នាក់ ត្រូវបានចោទប្រកាន់ពីបទលួចមានស្ថានទម្ងន់(ប្លន់) ហើយក្រោយពីឃាត់ខ្លួនក៏បានប្រគល់ឲ្យទៅនាយកដ្ឋានព្រហ្មទណ្ឌ ដើម្បីចាត់ការតាមនីតិវិធី ។
ចោរលួចរថយន្តដឹកទំនិញអស់លក្ខ័ណ៍ជាប់អន្ទាក់ប៉ូលិសស្រុកស្វាយជ្រំ
ខេត្តស្វាយរៀង ៖ នគរបាលស្រុកស្វាយជ្រំ បានចាប់ខ្លួនជនសង្ស័យម្នាក់ក្រោយពីធ្វើសកម្មភាពលួចរថយន្តដឹកទំនិញមួយគ្រឿងនៅដេប៉ូលក់ឈើមួយកន្លែងនៅក្រុងស្វាយរៀង ក៏ប៉ុន្តែព្រះមិនជួយខណៈកំពុងបើករថយន្តគេចខ្លួនដល់ឃុំពោធិ៍រាជ ស្រុកស្វាយជ្រំ ក៏ត្រូវសមត្ថកិច្ចស្ទាក់ចាប់បានវាយខ្នោះតែម្តង ។
ករណីចោរលួចរថយន្តនេះ បានកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃ២២ ខែកុម្ភៈ នៅចំណុចដេប៉ូលក់ឈើ ស្ថិតក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀង ។ បើតាមសមត្ថកិច្ចឲ្យដឹងថា រថយន្តនេះជាកម្មសិទ្ធិរបស់ឈ្មោះ ងិន សុខាភេទស្រី អាយុ៥១ឆ្នាំ មុខរបរលក់ឈើ និងមានទីលំនៅកន្លែងកើតហេតុខាងលើ ។
ប្រភពព័ត៌មានឲ្យដឹងថា ក្រោយពីទទួលបានព័ត៌មាននេះភ្លាម កម្លាំងនគរបាលស្រុកសហការជាមួយកម្លាំងចុះពង្រឹងក្រុងស្វាយរៀង កម្លាំងប៉ុស្តិ៍នគរបាលរដ្ឋបាលសង្កាត់សង្ឃ័រ និងកម្លាំងប៉ុស្តិ៍នគរបាលរដ្ឋបាលឃុំពោធិ៍រាជ ធ្វើការស្ទាក់ចាប់ជនសង្ស័យម្នាក់ដែលកំពុងបើកបររថយន្តដែលលួចបាន នៅវេលាម៉ោង១និង៥៥នាទីរំលងអធ្រាត្រ នៅផ្លូវលេខ៣១៥ ក្នុងភូមិពោធិ៍រាជ ឃុំពោធិ៍រាជ ស្រុកស្វាយជ្រំ ។
ជនសង្ស័យដែលចាប់ខ្លួនបានឈ្មោះ អន សក្ក័ រ៉ា ភេទប្រុស អាយុ៣១ឆ្នាំ ជាកម្មករ មានទីលំនៅភូមិពោធិ៍តាហោ សង្កាត់ពោធិ៍តាហោ ក្រុងស្វាយរៀង រួមនឹងវត្ថុតាងរថយន្តតម៉ាកហ៊ីយ៉ាន់ ដាយ១គ្រឿង ពណ៌ស ពាក់ផ្លាកលេខ ភ្នំពេញ៣D-៤៤៤៣ ។ ជនសង្ស័យត្រូវបានកសាងសំណុំរឿង ចាត់ការតាមច្បាប់ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ