រាជធានីភ្នំពេញ ៖ អនុសញ្ញាក្រុង Cape Town ដែលជាបណ្ដុំប្រទេសជាច្រើនជាហត្ថលេខី បាននិងកំពុងបើកភ្លើងខៀវដល់កម្ពុជាដើម្បីចូលរួមអនុសញ្ញានេះក្នុងគោលបំណងផ្ដល់ប្រយោជន៍ដល់វិស័យអាកាសចរណ៍ ។ យោងតាមសេចក្តីប្រកាសព័ត៌មានរបស់ស្ថានទូតសហរដ្ឋអាមេរិក ប្រចាំនៅកម្ពុជា បានឲ្យដឹងថា អនុសញ្ញា Cape Town នឹងផ្ដល់ប្រយោជន៍ដល់ក្រុមហ៊ុនអាកាសចរណ៍ និងក្រុមហ៊ុន ឧទ្ធម្ភាគចក្រនៅកម្ពុជា ហើយពួកគេអាចស្វែងរកទិញ ឬជួលយន្តហោះក្នុងតម្លៃសមរម្យ និងថោកជាងទិញឬជួលនៅពេលបច្ចុប្បន្ន ។
លោក Paul Ng តំណាងក្រុម Milbank ដែលជាស្ថាប័នច្បាប់អន្តរជាតិមួយ បានឲ្យដឹងថា Cape Town គឺជាស្ថាប័នមិនស្វែងរកប្រាក់កម្រៃដែលវាមានវ័យចំណាស់មួយនៅលើពិភពលោក ។ សព្វថ្ងៃនេះ អនុសញ្ញា Cape Town មានប្រទេសជាច្រើនបានចុះហត្ថលេខា ក្នុងនោះក៏មានប្រទេសចំនួន៥នៅតំបន់អាស៊ានបានចុះហត្ថលេខាអនុសញ្ញានេះដែរដូចជា មីយ៉ាន់ម៉ា វៀតណាម ឥណ្ឌូណេស៊ី និងសិង្ហបុរី ជាដើម និងកំពុងជំរុញឲ្យប្រទេសអាស៊ានដទៃបន្ថែមទៀត ចុះហត្ថលេខាលើអនុសញ្ញានេះ។ លោថា ៖« អនុសញ្ញាCape Town នឹងជួយជំរុញវិស័យសេដ្ឋកិច្ច បង្កើនសុវត្ថិភាពក្នុងការធ្វើដំណើរតាមផ្លូវអាកាស និយាយរួមគឺវានឹងជួយអភិវឌ្ឍន៍វិស័យសេដ្ឋកិច្ចនៃប្រទេសហត្ថលេខី ហើយនៅពេលដែលកម្ពុជាចូលទៅក្នុងអនុសញ្ញានេះដែរ ក៏នឹងទទួលបានប្រយោជន៍ដូចគ្នាជាមួយប្រទេសដទៃទៀត » ។
លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ថា អនុសញ្ញា Cape Town នេះពិតជាមានសារសំខាន់ណាស់សម្រាប់ប្រទេសជាសមាជិក ហើយវាក៏ផ្ដល់នូវសារសំខាន់ខ្លាំងសម្រាប់កម្ពុជាផងដែរ ដែលកំពុងមានការអភិវឌ្ឍខ្ពស់លើវិស័យអាកាសចរស៊ីវិល។ លោកថា៖« យើងបានដឹងថាវាពិតជាមានសារសំខាន់ណាស់ ហើយបើសិនជាកម្ពុជាបានចូលជាសមាជិកនៃអនុសញ្ញានេះ នឹងផ្ដល់ប្រយោជន៍កាន់តែច្រើនថែមទៀតក្នុងវិស័យអាកាសចរស៊ីវិល ដូចជាសម្រួលក្នុងការស្វែងរកយន្តហោះដល់បណ្ដាប្រតិបត្តិករហោះហើរ ហើយអាចដោះស្រាយនូវរាល់បញ្ហាទាំងឡាយដែលកើតឡើង ។ អ្វីដែលសំខាន់នោះ ក្រុមហ៊ុនហោះហើរនៅកម្ពុជានឹងងាយស្រួលរកយន្តហោះមកធ្វើប្រតិបត្តិការក្នុងតម្លៃទាបជាងការដែលមិនចូលជាសមាជិកនៃអនុសញ្ញានេះ »។
លោកបញ្ជាក់ថា ៖« យើងពិតជាចង់ចូលជាសមាជិកនៃអនុសញ្ញាCape town នេះណាស់ ក៏ប៉ុន្តែនៅមានបញ្ហាប្រឈមមួយចំនួនដែលត្រូវដោះស្រាយ និងមិនអាចឲ្យយើងបានចូលភ្លាមៗ»។ លោថា ៖« ដើម្បីចូលជាសមាជិក យើងត្រូវការកែប្រែច្បាប់អាកាសចរណ៍មួយចំនួន ត្រូវការធនធានជំនាញ ដូច្នេះវាត្រូវការពេលវេលា ហើយរំពឹងថា នៅក្នុងរយៈពេលប្រមាណ១ឆ្នាំឬ២ឆ្នាំទៀត ទើបយើងអាចចូលជាសមាជិកនៃអនុសញ្ញានេះជាផ្លូវការ » ។ លោក Michael Newbill ភារធារីនៃស្ថានទូតសហរដ្ឋអាមេរិក ប្រចាំនៅកម្ពុជា បានមានប្រសាសន៍ថា សេដ្ឋកិច្ចរបស់ប្រទេសកម្ពុជា កំពុងតែមានកំណើនយ៉ាងឆាប់រហ័ស ហើយក៏កំពុងតែធ្វើពាណិជ្ជកម្មច្រើនឡើងក្នុងទីផ្សារអន្តរជាតិ ដោយពាណិជ្ជកម្មខ្លះត្រូវធ្វើឡើងតាមផ្លូវអាកាស ។ ពលរដ្ឋកម្ពុជា ទាំងអ្នកធ្វើដំណើរទាក់ទងនឹងជំនួញក៏ត្រូវការផងដែរនូវសេវា និងហេដ្ឋារចនាសម្ព័ន្ធអាកាសចរណ៍ទំនើប ដើម្បីទ្រទ្រង់ដល់ពាណិជ្ជកម្ម និងការធ្វើដំណើរអន្តរជាតិ ដែលកំពុងតែមានកំណើននេះ ៕
ចែករំលែកព័តមាននេះ