ខេត្តកំពង់ឆ្នាំង ៖ ប្រជាពលរដ្ឋទាំង៨ភូមិក្នុងឃុំជ្រៃបាក់ដែលមានមុខរបរធ្វើក្អមឆ្នាំង រួមជាមួយអាជ្ញាធរឃុំ និងតំណាងក្រុមហ៊ុន កាលពីព្រឹកថ្ងៃទី២០ ខែកុម្ភៈ ឆ្នាំ២០១៩ កន្លងមក បានទៅពិនិត្យទីតាំងដីថ្មីដែលក្រុមហ៊ុនសម្រេចប្រគល់ឲ្យពួកគាត់សម្រាប់ជីកយកមកធ្វើក្អមឆ្នាំងនៅចំណុចខ្នាចសុឃ័រ ក្នុងភូមិអូររោង ឃុំជ្រៃបាក់ ស្រុករលាប្អៀរ ក្រោយពេលមានទំនាស់ជាយូរមកហើយនោះ ។
ទីតាំងដីថ្មីដែលនឹងត្រូវប្រគល់ឲ្យប្រជាពលរដ្ឋសម្រាប់ជីកយកដីធ្វើក្អមឆ្នាំងនោះ តំណាងក្រុមហ៊ុនបាននិយាយថា បន្ទាប់ពីប្រជាពលរដ្ឋមានការតវ៉ានិងសុំដីពីក្រុមហ៊ុនវិញចំនួន៧ហិកតា ដើម្បីយកធ្វើក្អមឆ្នាំងរយៈកាលពីពេលកន្លងទៅ ពេលនេះក្រុមហ៊ុនបានសម្រេចប្រគល់ដីនៅចំណុចនេះឲ្យបងប្អូនប្រជាពលរដ្ឋចំនួន៤ហិកតា ។ តំណាងក្រុមហ៊ុននិយាយថា ៖« បើសង្ស័យថាដីថ្មីនៅទីនេះយកទៅផលិតក្អមឆ្នាំងហើយមិនកើត ក្រុមហ៊ុននឹងយកគ្រឿងចក្រមកជីកចំនួន៦ទៅ៧រណ្តៅដើម្បីឲ្យបងប្អូនប្រជាពលរដ្ឋយកដីទាំងនោះទៅធ្វើក្អមឆ្នាំង ជាការសាកល្បង ប៉ុន្តែប្រសិនពេលយកទៅធ្វើហើយមិនកើត បងប្អូនមិនអាចទទួលយកបានក្រុមហ៊ុននឹងប្តូរទីតាំងដីថ្មីឲ្យបន្តទៀត » ។
ក្រោយពីស្ដាប់តំណាងឲ្យក្រុមហ៊ុនរួចហើយ តំណាងប្រជាពលរដ្ឋម្នាក់បានលើកឡើងថាពួកគាត់សូមទទួលយកជាបណ្ដោះអាសន្នសិន ព្រោះមិនដឹងថាដីនៅទីនេះយកទៅធ្វើក្អមឆ្នាំង កើតឬយ៉ាងណានោះទេ ប៉ុន្តែប្រសិនបើយកទៅ ដុតមានការផ្ទុះប្រេះ ធ្វើមិនកើត ពួកគាត់ក៏មិនអាចយកបានដែរ ។ ពួកគាត់ និងសុំដោះដូររកកន្លែងថ្មីទៀត ។ លោក ចាន់ ឡេង ក្រុមប្រឹក្សាឃុំជ្រៃបាក់បានអំណរគុណដល់ក្រុមហ៊ុន ដែលបានផ្ដល់ដីចំនួន៤ហិកតាឲ្យប្រជាពលរដ្ឋជីកយកអាចម៍ដីទៅផលិតក្អមឆ្នាំងធ្វើអាជីវកម្មបន្តទៀត ប៉ុន្តែលោកបានបញ្ជាក់ថា ៖« ប្រសិនដីនៅទីនេះមិនអាចផលិតក្អមឆ្នាំងបានទេ យើងក៏សុំឲ្យក្រុមហ៊ុនជួយដោះដូរដីឲ្យប្រជាពលរដ្ឋបន្តទៀត » ។
គួរកត់សម្គាល់ថា ប្រជាពលរដ្ឋនៅឃុំជ្រៃបាក់នេះភាគច្រើនប្រកបមុខរបរធ្វើក្អមធ្វើឆ្នាំងដែលជារបរប្រពៃណីតពូជពង្សវង្សត្រកូលតាំងពីដូនតាមក ហើយពួកគាត់អាស្រ័យផលលើដីឥដ្ឋនៅទីតាំងនោះ ប៉ុន្ដែក្រោយមកក៏មានក្រុមហ៊ុនមកទិញដីនៅតំបន់នោះ ហើយបានជីកប្រឡាយហ៊ុមព័ទ្ធមិនឲ្យប្រជាពលរដ្ឋចូលទៅជីកយកដី រហូតមានការបាញ់គំរាមទៀតផង ។ ទោះយ៉ាងនេះក្ដី ក្រោយសារព័ត៌មានចុះផ្សាយមកជាហូរហែ ទើបមានការសម្របសម្រួលពីអាជ្ញាធរឃុំស្រុកជាមួយក្រុមហ៊ុនជាច្រើនលើក ទើបចុងក្រោយនេះ ក្រុមហ៊ុនព្រមផ្តល់ដីចំនួន៤ហិកតាតាមសំណូមពរប្រជាពលរដ្ឋ ប៉ុន្តែបានឲ្យដីកន្លែងថ្មីនេះ មិនមែនជាដីប្រជាពលរដ្ឋធ្លាប់ធ្វើនោះទេ ។ ប្រជាពលរដ្ឋសង្ឃឹមថា ៖« ដីថ្មីនេះ នឹងមិនស្ថិតក្នុងដីទំនាស់ ហើយជាដីដែលអាចយកមកផលិតក្អមឆ្នាំងបាន »៕
ចែករំលែកព័តមាននេះ