ក្រុមជនដែលបានឃាត់ខ្លួន ភាគច្រើនផ្ទុកសារធាតុញៀន
- ភ្នំពេញ
លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ កាលពីថ្ងៃទី២៣ កុម្ភៈ បានដឹកនាំមន្ត្រីជំនាញ ចុះទៅសហការជាមួយលោកឧត្តមសេនីយ៍ឯក ស ថេត…
លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ កាលពីថ្ងៃទី២៣ កុម្ភៈ បានដឹកនាំមន្ត្រីជំនាញ ចុះទៅសហការជាមួយលោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ដើម្បីធ្វើតេស្តទឹកនោម រកសារធាតុញៀន និងធ្វើកំណត់ហេតុទៅលើយុវជន យុវនារីជាង៣០០នាក់ ដែលកំពុងឃាត់ខ្លួននៅស្នងការដ្ឋាននគរបាលរាជធានីភ្នំពេញ ។
លោកឧត្តមសេនីយ៍ឯក ស ថេត បានថ្លែងឱ្យដឹងថា ក្នុងចំណោមមនុស្សដែលត្រូវឃាត់ខ្លួនជាង៣០០នាក់នោះ ភាគច្រើនសុទ្ធតែរកឃើញមានសារធាតុញៀននៅក្នុងខ្លួន ។ ពេលនេះ សមត្ថកិច្ចជំនាញកំពុងមមារញឹកក្នុងការបំពេញការងាររបស់ខ្លួន ហើយអាចនិងធ្វើសន្និសីទកាសែត នៅពេលបញ្ចប់ការសាកសួរ និងការធ្វើតេសទឹកនោមជាបឋម ។
សមត្ថកិច្ចក៏រឹបអូសបានវត្ថុតាងជាគ្រឿងញៀនច្រើនប្រភេទផងដែរ ក្នុងនោះមានទាំងថ្នាំគ្រាប់ កញ្ចប់ម្សៅ និងសារធាតុញៀនជាទឹក ។ នេះបើតាមការឲ្យដឹងពីស្នងការនគរបាលលោក ឧត្តមសេនីយ៍ស ថេត ដែលបានឲ្យដឹងបន្ថែមថា ទាំងវត្ថុតាងជាគ្រឿងញៀននិងមនុស្សទាំងជាង៣០០នាក់ ត្រូវបានសមត្ថកិច្ចបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីចាត់ការតាមនីតិវិធីច្បាប់ ។
តាមប្រភពព័ត៌មានថា នៅរសៀលថ្ងៃទី២៤ កុម្ភៈ សមត្ថកិច្ចបានទៅបើកទីតាំងមជ្ឈមណ្ឌល ដែលបានឃ្លុំបេនោះ រកឃើញបានប្រមាណ២ទៅ៣គីឡូក្រាមបន្ថែមទៀត ។
រកឃើញការជួញដូរគ្រឿងញៀនមិនមែនលើកទី១ទេ
សម្រាប់មជ្ឈមណ្ឌលកម្សាន្តរ៉ក់នេះ មិនមែនជាលើកទី១ទេ ដែលសមត្ថកិច្ចឆែកឆេរកឃើញមានការប្រើប្រាស់ និងចែកចាយគ្រឿងញៀនដ៏ធំនេះ ។ កាលពីខែកញ្ញា ឆ្នាំ២០១៨ ម្ចាស់មជ្ឈមណ្ឌលកម្សាន្តនេះ ធ្លាប់បានសន្យា ចំពោះអាជ្ញាធរមានសមត្ថកិច្ចគ្រប់ជាន់ថ្នាក់ថា នឹងមិនអនុញ្ញាតឲ្យមានការផលិត ជួញដូរ និងប្រើប្រាស់គ្រឿងញៀន ក្នុងទីតាំងអាជីវកម្មរបស់ខ្លួនឡើយ ។
គេក៏នៅចាំដែរថា កាលពីប៉ុន្មានខែមុននេះ ឌីជេឡាយអិន ក៏ត្រូវបានចាប់ក្នុងមជ្ឈមណ្ឌលរ៉ក់ក្នុងរឿងជួញដូរគ្រឿងញៀនជាមួយបក្សពួក៣នាក់ទៀតកាលពីខែធ្នូ ឆ្នាំ២០១៨កន្លងទៅ នៅក្នុងប្រតិបត្តិការឆ្មក់ចូលឆែកឆេរពេលនេះ សមត្ថកិច្ចបានរកឃើញគ្រឿងញៀនជាង១គីឡូក្រាម ។
ចែករំលែកព័តមាននេះ