រាជធានីភ្នំពេញ ៖ ជាថ្មីម្តងទៀត ភាគីកម្ពុជាបានជំរុញឲ្យភាគីថៃជួយពន្លឿនចុះហត្ថលេខាលើកិច្ចព្រមព្រៀងឆ្លងកាត់ព្រំដែនតាមផ្លូវដែកនៃប្រទេសទាំងពីរ ខណៈដែលកិច្ចព្រមព្រៀងទាំងនោះបានសិក្សារួចរាល់ហើយ ។ នៅក្នុងជំនួបពិភាក្សាការងារជាមួយមន្ត្រីជាន់ខ្ពស់សាធារណការ និងដឹកជញ្ជូនថៃនៅឯកិច្ចប្រជុំប្រចាំឆ្នាំលើកទី៨១របស់គណៈកម្មាធិការដឹកជញ្ជូនផ្លូវគោកនៃអង្គការសហប្រជាជាតិលើកទី៨១ កាលពីថ្ងៃទី១៩-២២ ខែកុម្ភៈ ឆ្នាំ២០១៩ នៅទីក្រុងហ្សឺណែវ ប្រទេសស្វ៊ីស លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងអំពីការត្រៀមរៀបចំកិច្ចប្រជុំគណៈកម្មាធិការចម្រុះ ស្តីពីកិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែនរបស់មហាអនុតំបន់ទន្លេមេគង្គ (GMS CBTA) ដែលនឹងប្រារព្ធធ្វើពីថ្ងៃទី១២ ដល់១៣ ខែមីនា ឆ្នាំ២០១៩ នៅទីក្រុងសៀមរាប ។
លោកទេសរដ្ឋមន្ត្រី បានជំរុញឲ្យព្រះរាជាណាចក្រថៃខិតខំពន្លឿនការងារដើម្បីចុះហត្ថលេខាលើកិច្ចព្រមព្រៀងឆ្លងកាត់ព្រំដែនតាមផ្លូវដែករវាងព្រះរាជាណាចក្រទាំងពីរដើម្បីទទួលបាននូវអត្ថប្រយោជន៍ពីការចូលរួមអនុវត្តកម្មវិធីប្រមូលផលដើមដៃរបស់កិច្ចព្រមព្រៀង CBTA ។ លោកទេសរដ្ឋមន្ត្រី ស៊ុន ចាន់ថុល ធ្លាប់បានឲ្យដឹងកន្លងមកនេះថា នឹងអញ្ជើសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងនាយករដ្ឋមន្ត្រីថៃ ជិះរថភ្លើងឆ្លងកាត់ព្រំដែនកម្ពុជា-ថៃតាមផ្លូវដែក ក្រោយពីចុះកិច្ចព្រមព្រៀងជាមួយភាគីថៃរួចរាល់ផងដែរ តែរហូតដល់ពេលនេះភាគីទាំងពីរនៅមិនទាន់ចុះហត្ថលេខាជាផ្លូវការនៅឡើយ ។
លោក Arkhom Termpittayapaisith រដ្ឋមន្ត្រីក្រសួងដឹកជញ្ជូនថៃ ធ្លាប់បានឱ្យដឹងដែរថា ការតភ្ជាប់ផ្លូវរថភ្លើងរវាងថៃ និងកម្ពុជានេះ នឹងត្រូវបើកដាក់ឱ្យដំណើរការនាពេលឆាប់ៗខាងមុខ ដើម្បីធ្វើដំណើរឆ្លងកាត់ព្រំដែនប្រទេសទាំងពីរដែលសម្រួលឱ្យប្រជាជន អាជីវករ ពាណិជ្ជករនៃប្រទេសទាំងពីរដឹកជញ្ជូនទំនិញ ផលិតផលផ្សេងៗចេញចូលកាន់តែលឿនឆាប់រហ័ស និងផ្ដល់ភាពងាយស្រួលថែមទៀត ។
កម្ពុជា-ថៃ កាលពីកន្លងទៅនេះ បានឯកភាពគ្នាលើការបញ្ចប់នីតិវិធី និងបែបបទក្នុងការបើកដាក់ឱ្យដំណើរការផ្លូវរថភ្លើងសម្រាប់ធ្វើដំណើរឆ្លងកាត់តាមព្រំដែននៃប្រទេសទាំងពីរ ដើម្បីឈានទៅចុះហត្ថលេខា និងបើកសម្ពោធបើកដំណើរការផ្លូវរថភ្លើងឆ្លងកាត់ព្រំដែនរវាងកម្ពុជា និងថៃ នាពេលខាងមុខនេះ ។
ភាគីទាំងពីរបានដោះស្រាយចំណុចដែលនៅសេសសល់ធំៗចំនួន៣រួចរាល់ហើយទាក់ទងនឹងការរៀបចំចំណតស្ថានីយអន្ដរជាតិក្នុងការឆ្លងការព្រំដែនប្រទេសទាំងពីរតាមផ្លូវរថភ្លើង នីតិវិធី និងបែបបទក្នុងការរៀបចំស្ថានីយរថភ្លើង និងចំណុចមួយទៀតគឺការអនុញ្ញាតផ្ដល់ដី និងទីកន្លែងសម្រាប់សាងសង់ស្ថានីយរថភ្លើងតាមព្រំដែន រវាងប្រទេសទាំងពីរ ។ ជាមួយគ្នានេះដែរ ប្រទេសថៃនឹងផ្ដល់ដែកប្រវែងជាង៦០គីឡូម៉ែត្រមកកម្ពុជា ដើម្បីយកមកផ្លាស់ប្ដូរផ្លូវរថភ្លើងណាចាស់ៗ និងជួសជុលឡើងវិញ ដើម្បីធ្វើយ៉ាងណាឲ្យផ្លូវរថភ្លើង មានភាពរឹងមាំបន្ថែមទៀត ។
បច្ចុប្បន្ន រាជរដ្ឋាភិបាលកម្ពុជាមានគម្រោងជាច្រើនទៀតក្នុងការធ្វើទំនើបកម្មលើផ្លូវដែកនេះ ដូចជា ការសាងសង់ខ្សែរថភ្លើងថ្មី, ការជួសជុលស្ថានីយ ព្រមទាំងបំពាក់ស្លាកសញ្ញាសុវត្ថិភាពផ្លូវដែកពីភ្នំពេញ-ប៉ោយប៉ែត, ការសាងសង់ទីលានកុងតឺន័រផ្លូវដែកនៅស្ទឹងបត់, ការសិក្សាដើម្បីរៀបចំឱ្យមានរថភ្លើងលើអាកាសដំណើរការដោយស្វ័យប្រវត្តិនៅក្នុងក្រុងភ្នំពេញ, ការតភ្ជាប់ផ្លូវដែកពីភ្នំពេញទៅកំពង់ផែស្វយ័តភ្នំពេញថ្មី, ការតភ្ជាប់ផ្លូវដែកទៅតំបន់សេដ្ឋកិច្ចពិសេសដូចជា ពីស្ថានីយទូកមាសទៅរោងចក្រស៊ីម៉ង់ត៍ចក្រីទីង, ពីស្ថានីយវាលរេញទៅកំពង់ផែកែវផុស, ការជំរុញឱ្យមានការវិនិយោគផ្លូវដែកភាគខាងជើងភ្នំពេញ-ស្នួល-ស្ទឹងត្រែង ប្រវែង២៤៨គីឡូម៉ែត្រ, ការជំរុញឱ្យមានការវិនិយោគផ្លូវដែកពីភ្នំពេញ-សៀមរាប សិរីសោភ័ណ និងការជំរុញឱ្យមានការវិនិយោគផ្លូវដែកតភ្ជាប់ទៅប្រទេសវៀតណាម ជាដើម ៕
ចែករំលែកព័តមាននេះ