រាជធានីភ្នំពេញ៖ តារាចម្រៀងកញ្ញាវ៉ាន់ នីឡា ចង់វិលមកកាន់ក្បាលមេក្រូច្រៀងឡើងវិញ បន្ទាប់ពីបាត់វត្តមានរយៈយូរដោយសារមានរឿងក្តីក្តាំជាមួយអតីតសង្សារ ។ ជំហរចង់ច្រៀងឡើងវិញរបស់តារាចម្រៀងរូបនេះបានធ្វើឡើងក្រោយពីនាងត្រូវតុលាការសម្រេចឲ្យឈ្នះក្តីលើអតីតគូស្នេហ៍ ។
ការបែកធ្លាយរូបភាពអាក្រាតកាយតាមបណ្តាញអីុនធើរណេត ក្រោយបែកបាក់ជាមួយគូស្នេហ៍បានធ្វើឲ្យវ៉ាន់ នីឡា ដកខ្លួនថយពីអាជីពសិល្បៈ ដោយបន្តលាក់មុខពីទស្សនិកជន និងប្រិយមិត្តគាំទ្រ ។ យ៉ាងណាក្តីជា រឿយៗវ៉ាន់ នីឡា តែងតែបង្ហាញសកម្មភាពដើរកម្សាន្តតាមទីកន្លែងផ្សេងៗ និងតែងតែបង្ហើរសំនៀងតាមបណ្តាញសង្គមហ្វេសប៊ុក ដើម្បីបន្លប់នូវរឿងរ៉ាងដ៏អាក្រក់ដែលបានកើតឡើងមកលើរូបនាង។
វ៉ាន់ នីឡា តែងតែសន្សំចិត្ត និងសន្យាជាមួយនឹងប្រិយមិត្តគាំទ្រថា នាងនឹងវិលមកច្រៀងជាថ្មីឡើងវិញ ក្នុងពេលដែលស្រមោលខ្មៅរសាត់ចេញពីរូបនាង ។ ទោះជាយ៉ាងណាក្តីរហូតមកដល់ពេលនេះ វ៉ាន់ នីឡា នៅតែមិនទាន់មានបទចម្រៀងថ្មី និងឡើងច្រៀងតាមកម្មវិធីប្រគំតន្ត្រីណាមួយនៅឡើយទេ ក្នុងពេលដែលទ្រនំដែលនាងធ្លាប់បានជ្រកកោននោះប្រមូលផ្តុំនូវតារាចម្រៀង ថ្មីៗជាច្រើន ។
ជាការកត់សម្គាល់ជាថ្មីម្តងទៀតវ៉ាន់ នីឡា បានបង្ហាញជំហរថានាងពិតជាចង់ចូលប្រឡូកសិល្បៈចម្រៀងជាថ្មីឡើងវិញ ។ វ៉ាន់ នីឡា កំពុងតែស្វែងរកគោលដៅណាមួយ ដើម្បីបានឱកាសកាន់ក្បាលមេក្រូជាថ្មី និងបានឡើងឆាកតន្ត្រីបង្ហាញមុខជូនទស្សនិកជនដែលទន្ទឹងរង់ចាំ។
បើតាមអ្វីដែល វ៉ាន់ នីឡា បានសរសេរបង្ហោះតាមហ្វេសប៊ុកបញ្ជាក់ថា «ខ្ញុំចង់ឡើងច្រៀងលើឆាកវិញ ខ្ញុំចង់ចេញបទចម្រៀងថ្មី ខ្ញុំចង់ធ្វើអ្វីដែលខ្ញុំធ្លាប់ធ្វើពីមុន ខ្ញុំនឹកជីវិតជាតារាចម្រៀង គួរតែចាប់ផ្តើមពីទិសណា »។
តាមរយៈសារដែលវ៉ាន់ នីឡា សរសេរនាពេលនេះបានធ្វើឲ្យប្រិយមិត្តគាំទ្ររូបនាងជាច្រើនសម្តែងការគាំទ្រ និងចង់ឃើញតារាចម្រៀងរូបនេះបន្តវត្តមានជាតារាចម្រៀងជាថ្មីឡើងវិញ ។ យ៉ាងណាក្តីវ៉ាន់ នីឡា បញ្ជាក់ប្រាប់ប្រិយមិត្តគាំទ្រថា បងប្រុសរបស់នាងគឺលោកសុខ ជំនោរ បាននិងកំពុងរៀបចំឲ្យនាងបានចេញបទចម្រៀង ថ្មីៗបន្ថែមទៀតហើយ ។
រហូតមកដល់ពេលនេះបើទោះបីជាតុលាការសម្រេចឲ្យវ៉ាន់ នីឡា ឈ្នះក្តីលើអតីតគូស្នេហ៍ដែលត្រូវបានចោទថា ទម្លាយរូបអាក្រាតនាងតាមហ្វេសប៊ុកក្តី តារារូបនេះនៅមិនទាន់បានពន្លឺយុត្តិធម៌មួយពិតប្រាកដនៅឡើយទេ ។ វ៉ាន់ នីឡា ធ្លាប់បានបញ្ជាក់ថា នាងរស់នៅដោយភាពភ័យខ្លាចនៅឡើយ ក្នុងពេលដែលអតីតគូស្នេហ៍របស់នាងដែលជាកូនមន្ត្រីថ្នាក់ខ្ពស់មួយរូបនោះបន្តស្ថិតនៅមានសេរីភាពនៅឡើយ ។
វ៉ាន់ នីឡា ទើបតែបង្ហាញភាពក្លាហានឡើងវិញ ដោយបានដើរហើរតាមរមណីយដ្ឋាន ផ្សេងៗ បន្ទាប់ពីអតីតគូស្នេហ៍របស់ខ្លួនសម្រេចចូលរោងការជាមួយនារីម្នាក់កាលពីពេល ថ្មីៗកន្លងមក ៕
ចែករំលែកព័តមាននេះ