ខេត្ដបន្ទាយមានជ័យ ៖ បន្ទាប់ពីមានការរឹតបន្ដឹងត្រួតពិនិត្យ និងឆែកឆេរទំនិញដោយភាគីថៃនៅច្រកទ្វារអន្ដរជាតិប៉ោយប៉ែត និងក្នុងផ្សាររុងក្លឿ ស្រុកអារញ្ញ ខេត្ដស្រះកែវឈមនឹងទឹកដីកម្ពុជាច្រកទ្វារអន្ដរជាតិប៉ោយប៉ែត ២ថ្ងៃកន្លងមកបានធ្វើឱ្យអាជីវករខ្មែរដែលប្រកបរបររកស៊ីនៅក្នុងផ្សាររុងក្លឿរារែកចិត្ដក្នុងការនាំទំនិញចេញពីកម្ពុជា ។
ប្រភពព័ត៌មានបានឱ្យដឹងថា នៅព្រឹកថ្ងៃទី៤ កញ្ញា ទំនិញខ្មែរដែលដឹកតាមរទេះអូសបានវិលវល់ទៅមកលើស្ពានមិត្ដភាពកម្ពុជា-ថៃ រហូតអ្នកខ្លះផ្អាកលក់ដូរមួយរយៈដោយសុខចិត្ដបិទតូបទៀតផង ។ រីឯកាលពីថ្ងៃទី៣ កញ្ញា ក៏មានប្រភពព័ត៌មានពីផ្សាររុងក្លឿ ស្រុកអារញ្ញ ខេត្ដស្រះកែវ ប្រទេសថៃមកថា សមត្ថកិច្ចថៃបានចុះឆែកឆេរ និងត្រួតពិនិត្យទំនិញតាមតូបអាជីវករខ្មែរមួយចំនួនក្នុងនោះក៏បានឆែកឆេរតូបលក់នាឡិកាចំនួន២តូប និងចាប់ម្ចាស់ទៅសួរនាំ និងរឹបអូសយកនាឡិកាជាច្រើនគ្រឿង និងតូបលក់ខ្សែក្រវាត់មួយចំនួនផងដែរ ។ រីឯម្ចាស់តូបលក់នាឡិកា និងខ្សែក្រវាត់មិនត្រូវបានគេប្រាប់ឱ្យស្គាល់អត្ដសញ្ញាណទេ ប៉ុន្ដែមានតូបលក់នាឡិកាមួយត្រូវគេចាប់បុរសជាប្ដី និងរឹបអូសនាឡិកាជាង១០០គ្រឿង រីឯប្រពន្ធឈ្មោះ មីុ អាយុជាង៣០ឆ្នាំ ជាអ្នករស់នៅក្រុងប៉ោយប៉ែត ។
ដោយឡែកកាលពីព្រឹកថ្ងៃទី៤ កញ្ញា គេឃើញទំនិញខ្មែរដែលអូសតាមរទេះត្រូវបានក្រុមកម្មករអូសត្រឡប់មកវិញ ហើយវិលវល់ទៅមក បន្ទាប់ពីកកស្ទះនៅលើស្ពាន និងរទេះដឹកទំនិញអូសដោយដៃមួយចំនួនស្ថិតនៅលើទឹកដីថៃ ។ បើតាមសម្ដីរបស់កម្មករស៊ីឈ្នួលអូសរទេះម្នាក់ឈ្មោះ ទូច ធឿន អាយុ២៧ឆ្នាំ មានទីលំនៅក្នុងភូមិបាលិលេយ្យ២ សង្កាត់ប៉ោយប៉ែតបានឱ្យដឹងថា ទំនិញដែលខ្លួនអូសឱ្យគេនោះជាទ្រនាប់ជើងខ្លះ ជាក្រដាសខ្លះ ហើយមូលហេតុនៃការវិលត្រឡប់មកវិញ ពីព្រោះខាងសមត្ថកិច្ចថៃចាប់ ។ រីឯបុរសម្នាក់ឈ្មោះ ង៉ែត ហាក់ អាយុ៣២ឆ្នាំ ជាកម្មករ និងមានទីលំនៅភូមិបាលិលេយ្យ២ដូចគ្នាដែរបានប្រាប់ថា ទំនិញដែលខ្លួនអូសនោះជាទំនិញគីបខោអាវជជុះមានលាយចាស់ និងថ្មី ហើយដោយសារភាគីថៃប្រាប់ថា បើនាំចូលទៅគេនឹងចាប់ ទើបពួកគេនាំគ្នាអូសត្រឡប់មកវិញទាំងអស់តែម្ដង ។ ទោះជាយ៉ាងណា ទំនិញខ្មែរដែលវិលវល់លើស្ពានមិត្ដភាព និងអូសត្រឡប់មកវិញនេះបានអូសចូលទៅថៃអស់ហើយ ដោយអូសបណ្ដោះគ្នាម្ដងមួយរទេះៗនៅព្រឹកថ្ងៃដដែល ។
ប្រភពព័ត៌ដដែលបានឱ្យដឹងថា តូបអាជីវករមួយចំនួននៅផ្សាររុងក្លឿនាពេលនេះបានបិទទ្វារ ហើយរង់ចាំទាល់តែស្ថានការណ៍នៃការឆែកឆេរ និងការរឹតបន្ដឹងត្រួតពិនិត្យទំនិញពីសមត្ថកិច្ចថៃបានបញ្ឈប់ ទើបពួកអាជីវករអាចនាំគ្នាទៅបន្ដការលក់ដូរឡើងវិញ ។
គួរបញ្ជាក់ថា កាលពីព្រឹកថ្ងៃទី២ កញ្ញា កន្លងទៅថ្មីៗនេះ ភាគីថៃបានអះអាងថា សមត្ថកិច្ចថៃនឹងត្រួតពិនិត្យទំនិញដែលរំលោភកម្មសិទ្ធិបញ្ញារបស់ក្រុមហ៊ុនអាមេរិកមួយឈ្មោះ លិកាស៊ីត ។ដោយសារបញ្ហាខាងលើនេះហើយទើបធ្វើឱ្យទំនិញខ្មែរកកស្ទះនៅលើស្ពានមិត្ដភាពកម្ពុជា-ថៃច្រកទ្វារអន្ដរជាតិប៉ោយប៉ែត និងខ្លងលឹកជិត៣ម៉ោង ៕
ចែករំលែកព័តមាននេះ