រាជធានីភ្នំពេញ ៖ អតីតប្រធានគណបក្សអំណាចខ្មែរលោក សួន សេរីរដ្ឋាបានអះអាងថា អ្នកដែលនិយាយពីការដកអនុគ្រោះពន្ធរបស់សហភាពអ៊ឺរ៉ុប (EBA) លើកម្ពុជា គឺកំពុងមិនឲ្យលោក សម រង្ស៊ី បានចូលស្រុក និងជួយក្រុមឈ្មួញដែលបញ្ចុះតម្លៃស្រូវអង្កររបស់កសិករ ។
អតីតមេបក្សអំណាចខ្មែរឲ្យដឹងនៅថ្ងៃទី២៤ កុម្ភៈយ៉ាដូច្នេះថា អ្នកដែលខំលើកយក EBA មកធ្វើជាប្រធានបទនិយាយដដែលនាពេលនេះ តើពួកគេភ័យបារម្ភពីសេដ្ឋកិច្ចពីការងាររបស់កម្មករ កសិករខ្មែរ ឬក៏កំពុងភ័យខ្លាច សម រង្ស៊ី មិនបានចូលស្រុក ហើយបញ្ចប់ជីវិតនយោបាយជារៀងរហូត ? ។ លោកបញ្ជាក់ថា«តាមខ្ញុំអង្កេតតាមដានឃើញថា ក្រុមអ្នកដែលខំលើកយក EBA មកសរសេរមកនិយាយមកវិភាគនាពេលនេះ ហើយបញ្ចេញមតិបំភ័យកម្មករ កសិករ និងពលរដ្ឋខ្មែរនាពេលនេះ គឺពួកនេះមិនមែនភ័យបារម្ភពីជីវិតការងាររបស់កម្មករពីទីផ្សារស្រូវអង្កររបស់ខ្មែរ ឬពីសេដ្ឋកិច្ចខ្មែរទេ… តែពួកនេះភ័យខ្លាច សម រង្ស៊ី ដែលកំពុងធ្វើសំផឹងនយោបាយនៅក្រៅស្រុក បំបែកឆ្នាំងបាយកម្មករ និងបំផ្លាញតម្លៃស្រូវអង្កររបស់កសិករនោះ វាមិនបានទទួលការលើកលែងទោស ឲ្យចូលស្រុកមកធ្វើនយោបាយបង្គ្រប់កិច្ចតទៅទៀត ។
នេះហើយជាការពិតជាក់ស្តែងដែលពួកគេខំប្រឹងប្រើមាត់វែង មាត់ខ្លី និងមាត់ស្អុយរបស់ពួកគេ ឡើងមកនិយាយបំភ័យកសិករ និងកម្មករខ្មែរពីបញ្ហាដែលសហគមន៍អឺរ៉ុបព្យួ EBA ពីខ្មែរនោះ» ។ លោកបន្តថា សំណួរសួរថា បើពួកគេគិតគូរពីសេដ្ឋកិច្ចខ្មែរ ឈឺឆ្អាលពីការងារកម្មករខ្មែរ និងចង់ជួយកសិករខ្មែរពិតប្រាកដ ហេតុអីពួកនេះមិនដែលហើបមាត់រិះគន់សំផឹងនយោបាយ សម រង្ស៊ី និងពួកកាងបនសំផឹងនយោបាយអស់នេះដែលជាមេនាំភ្លើងឆ្កឹះឆ្កៀលអុចអាលឲ្យអឺរ៉ុបផ្តាច់ EBA ? ខ្មែរមានសុភាសិតពោលថា «បើខ្មោចស្រុកមិនឲ្យដៃខ្មោចព្រៃវាមិនហ៊ាន» ! បញ្ហា EBA ដែលសភាអឺរ៉ុបលើកយកទៅនិយាយដោយសារនយោបាយបរទេសឆ្កួតលេលារបស់ សម រង្ស៊ី ដែលខ្ញុំហៅថា សំផឹងនយោបាយនោះឯង ដែលយកការងាររបស់កម្មករ និងយកស្រូវអង្កររបស់កសិករធ្វើជាចំណាប់ខ្មាំងនយោបាយរបស់ខ្លួន ក្រោយពេលទំនាស់នយោបាយរបស់ខ្លួនជាមួយសម្តេច ហ៊ុន សែន រហូតឈានទៅដល់រំលាយគណបក្សសង្គ្រោះជាតិ ។
លោកក៏បានលើកឡើងលោក សម រង្ស៊ី ធ្លាប់អួតខ្លួនឯងកាលពីខែវិច្ឆិកា ២០១៧ ថា រដ្ឋាភិបាល ហ៊ុន សែន និងតុលាការភ្នំពេញមិនហ៊ានរំលាយបក្សសង្គ្រោះជាតិរបស់ខ្លួនទេមែនទេ ? ចាំសំដីអួតភូតភររបស់ខ្លួនទេ ? ក្រោយមកទៀតមេសំផឹងនយោបាយនេះបានអួតភូតភរអ្វីបន្តទៀត ? ក្រែងទើបនិយាយក្តែងៗថា ខ្លួនចូលស្រុកខ្មែរចូលមកចាប់ ហ៊ុន សែន មែនទេ ? ចុះអ្នកដើរតាមអ្នកហែរហមអស់នោះ ពេលេរបស់ខ្លួននិយាយដែលបើកត្រចៀកស្តាប់ ដែលកត់ត្រាទុករួចដែលយកមកផ្ទៀងផ្ទាត់សំដី និងការអនុវត្តន៍ទេ ? លោកបន្ថែមថា ពេលនេះខំយកបញ្ហា EBA មកបំភ័យបំភ្លើសទាំងអ្នកមួយចំនួនហ្នឹងខ្លួនឯងគ្មានជំនាញសេដ្ឋកិច្ចផងក៏ខំឡើងមកនិយាយ ព្រោះខ្លាច សម រង្ស៊ី ស្លាប់ជីវិតនយោបាយមិនបានទទួលការលើកលែងទោសឲ្យចូលស្រុកវិញ ។
លោកបញ្ជាក់ថា«ខ្ញុំជាអ្នកនយោបាយ និងជាអ្នករកស៊ីស្រូវអង្ករ តពូជមក៣ជំនាន់ហើយ… ។ បើខ្ញុំ មានទុនក្នុងដៃ១០លានដុល្លារ ខ្ញុំហ៊ានទិញស្រូវកសិករខ្មែរ១តោនថ្លៃ១លានរៀល រួចកិនអង្ករយកទៅលក់នៅអឺរ៉ុប បង់ពន្ធឲ្យអឺរ៉ុប តាមតម្លៃអត្រាពន្ធពេញលេញ ! ហើយលក់ក្នុងទីផ្សារអឺរ៉ុប ដែលខ្ញុំមានជំនឿយ៉ាងច្បាស់ថា អង្ករខ្មែរនៅតែលក់ដាច់ និងខ្ញុំនៅអាចរកចំណេញបានគ្មានខាតអីទេ ព្រោះកន្លងមកសៀម យួន ចូលមកទិញស្រូវពីខ្មែរយកកិនអង្ករទៅលក់នៅអឺរ៉ុបក៏គ្មាន EBA ដែរ» ។ លោកបន្តថា ដូច្នោះអ្នកដែលយកបញ្ហា EBA មកនិយាយបំភ័យកសិករខ្មែរនាពេលនេះក្រៅពីភ័យខ្លាចមេសំផឹងនយោបាយ (សម រង្ស៊ី) របស់ខ្លួនមិនបានទទួលការលើកលែងទោសឲ្យចូលស្រុកនោះចេតនាមួយទៀត គឺគេជួយឈ្មួញយួន និងឈ្មួញសៀមឲ្យវាយបញ្ចុះតម្លៃស្រូវរបស់កសិករខ្មែរ ដោយយក EBA នេះធ្វើជាលេស ។ពោល គឺពួកនេះមិនបានភ័យព្រួយពីសេដ្ឋកិច្ច ការងារ និងកសិផល របស់ពលរដ្ឋខ្មែរទេ ៕
ចែករំលែកព័តមាននេះ