ខេត្តកំពត ៖ ខ្យល់ព្យុះ និងភ្លៀងផ្គរព្រមទាំងរន្ទះផង បានវាយប្រហារលើលំនៅឋានអ្នកស្រុកអស់ចំនួន៥០ខ្នង និងរងរបួសចំនួន៦នាក់ កាលពីវេលាម៉ោងជាង២រសៀលថ្ងៃទី៣ កញ្ញា នៅក្នុងភូមិកំរែងក្រសាំង ឃុំខ្ជាយខាងជើង ស្រុកដងទង់ ។អ្នកភូមិម្នាក់ដែលរងរបួស ហើយខ្យល់បានកួចផ្ទះរបស់គាត់ឱ្យដួលរលំរាបដល់ដីបាននិយាយថា នៅពេលមានភ្លៀង និងព្យុះនោះ គាត់បានឃើញដុំខ្យល់យា៉ងធំមួយដែលអ្នកភូមិស្គាល់ថាជាខ្យល់ព្យុះដៃដំរីធ្លាក់ចំភូមិពួកគាត់ដែលនៅមិនឆ្ងាយប៉ុន្មានពីជើងភ្នំ ដោយបានកួចព្រៃឱ្យរាបដល់ដី និងបណ្តាលឱ្យផ្ទះអ្នកស្រុកជាច្រើនខ្នងរងការខូចខាត ។
អ្នកភូមិម្នាក់ឈ្មោះ ធន កាន ភេទប្រុស អាយុ៥៦ឆ្នាំ និយាយថា ផ្ទះគាត់បានត្រូវខ្យល់កាច់បាក់ទាំងស្រុង លុយកាក់បាត់ ហើយប្រពន្ធគាត់រងរបួសត្រង់ពោះដោយសារឈើវាយត្រូវ។ អ្នកភូមិម្នាក់ទៀតឈ្មោះ សូត្រ ភាព ភេទប្រុស អាយុ៣៥ឆ្នាំ ប្រពន្ធឈ្មោះ អីុម ធន ផ្ទះសម្បែងក៏ត្រូវខូចខាតទាំងស្រុងដែរ និងបាត់លុយអស់៣៨ម៉ឺនរៀល ព្រមទាំងរងរបួសថែមទៀត ។
អ្នកភូមិនិយាយថា ស្ត្រីម្នាក់មានផ្ទៃពោះ៥ខែបានរងរបួសធ្ងន់ដោយសារបំណែកឈើហើរត្រូវ ។ ដោយសារការភិតភ័យនឹងសំឡេងផ្គររន្ទះស្ត្រីរូបនេះបានព្យាយាមរត់ហើយដួលនៅលើភ្លឺស្រែ ។ លោក មាស និន ប្រធានឃុំខ្ជាយខាងជើងបានឱ្យដឹងថា ផ្ទះអ្នកស្រុកចំនួន៥០ខ្នងបានរងការខូចខាតក្នុងហតុការណ៍ព្យុះភ្លៀងនេះ ក្នុងនោះ១៩ខ្នងដួលរំលំដល់ដី ៧ខ្នងសសរហក់ចេញពីជើងតាង និង២៤ខ្នងរបើកដំបូល ។ ជាមួយនេះពលរដ្ឋចំនួន៦នាក់បានរងរបួសក្នុងនោះស្ត្រីម្នាក់រងរបួសធ្ងន់ និងគោមេអ្នកភូមិមួយក្បាលងាប់ដោយសាររន្ទះបាញ់ ។
លោក អុ៊ក ស៊ាន នាយប៉ុស្តិ៍នគរបាលឃុំខ្ជាយខាងជើងថ្លែងថា នេះជាគ្រោះមហន្តរាយយា៉ងធំធេងដែលខ្យល់ព្យុះបានបំផ្លាញផ្ទះអ្នកភូមិ ហើយផ្ទះខ្លះត្រូវដើមដូងរលំសង្កត់ ដំបូលផ្ទះខ្លះបានហើរទៅលើមេឃ ហើយពួកគាត់តាមរកឃើញនៅចម្ងាយប្រមាណ៣០០ម៉ែត្រ ។ អ្នកភូមិបានសំណូមពរឱ្យអាជ្ញាធរជួយឧបត្ថម្ភសម្ភារផ្សេងៗដល់ពួកគាត់ផង ។
ហេតុការណ៍ដោយឡែកមួយទៀត ផ្ទះអ្នកស្រុកមួយខ្នងទៀតនៅភូមិដំណាក់ត្រយឹង ឃុំខ្ជាយខាងត្បូង ស្រុកដងទង់ ក៏ទទួលរងខូចទាំងស្រុងដែរ ។ គេបានកត់សម្គាល់ឃើញថា ក្នុងឆ្នាំ២០១៣នេះនៅស្រុកដងទង់ ពលរដ្ឋទទួលរងគ្រោះដោយធម្មជាតិ២លើកហើយ ដោយសារខ្យល់ព្យុះបំផ្លាញផ្ទះ ៕
ចែករំលែកព័តមាននេះ