រាជធានីភ្នំពេញ ៖ តារាចម្រៀងស៊ូ ស៊ីរីកា បានចាកចេញពីមាតុភូមិកម្ពុជាយើងហើយ ដើម្បីចេញទៅសម្តែងនៅលើទឹកដីមហាអំណាចនៃសហរដ្ឋអាមេរិក។ ការហោះឆ្លងដែននេះ សាមីខ្លួនយល់ថា មិននឹកស្មាន ស្របពេលការសម្ភាសន៍ចេញពីក្នុងប្រទេសមានការតឹងតែង។…
រាជធានីភ្នំពេញ ៖ តារាចម្រៀងស៊ូ ស៊ីរីកា បានចាកចេញពីមាតុភូមិកម្ពុជាយើងហើយ ដើម្បីចេញទៅសម្តែងនៅលើទឹកដីមហាអំណាចនៃសហរដ្ឋអាមេរិក។ ការហោះឆ្លងដែននេះ សាមីខ្លួនយល់ថា មិននឹកស្មាន ស្របពេលការសម្ភាសន៍ចេញពីក្នុងប្រទេសមានការតឹងតែង។ តារាចម្រៀងបែបយុវវ័យកំពុងតែឡើងកូដស៊ូ ស៊ីរីកា បានចេញដំណើរទៅអាមេរិកកាលពីព្រឹកថ្ងៃទី២៤ កុម្ភៈ ឆ្នាំ២០១៩ដោយមានចូលរួមជូនដំណើរពីសំណាក់សាច់ញាតិ ជាពិសេសលោកយាយដែលជាអតីតតារាសម្តែង និងចម្រៀងទស្សវត្ស៦០ គឺលោកស្រី កែវ មន្ថា ត្រូវជាជីដូនបង្កើតរបស់រីកា។
កញ្ញាស៊ូ ស៊ីរីកា ដែលបាន VISA ដល់ដៃហើយ ទើបស្រឡះចិត្តបានឲ្យអ្នកសារព័ត៌មានដឹងថា ដំណើរឆ្ពោះទៅកាន់សហរដ្ឋអាមេរិកលើកនេះ នាងចាកចេញទៅជាង២ខែ ហើយវិលមកវិញនាដើមខែឧសភា។ រយៈពេលសម្តែងតាមរដ្ឋ គឺចំនួន១៥រដ្ឋនេះ ជាឱកាសដែលនាងផ្ទាល់គិតថា ពិតជាពិសេសបំផុត។
តារាដែលទើបឆក់បានដៃគូចម្រៀងតារាប្រុស២រូប មានលោកខេម និងលោកម៉ៅ ហាជី កញ្ញាស៊ីរីកាបានបន្តទៀតថា បើគិតទៅនាងនិយាយមិនចេញឡើយ ពេលជាប់ទៅអាមេរិក ហើយសន្យាថា នឹងខំសម្តែងឲ្យល្អ ព្រោះនាងជាអ្នកចម្រៀងស្រករក្រោយនៅមិនទាន់មានគេស្គាល់ច្រើនទេ ត្រូវតែពុះពារច្រៀង ថែមទាំងដាក់សៀវភៅចម្រៀងទុកជាស្រេចរាល់ការសំណូមពរ។
អតីតបេក្ខជនឆ្នើមឌឹវ៉យខេមបូឌា ស៊ូ ស៊ីរីកា មុនឡើងទៅអាមេរិកនាងបានសម្រុកថតចម្រៀងបានជាច្រើនបទ ដោយក្នុងនោះទើបតែថតបទចង្វាក់ប្រពៃណីអបអរចូលឆ្នាំ ចាប់ដៃគូជាមួយលោកខេម និងលោកម៉ៅ ហាជី។ ក្រៅពីនេះ ត្រៀមចេញបទបែបយុវវ័យផ្សេងទៀត ក្រោយចូលឆ្នាំខ្មែរ។ នាងក៏អះអាងថា មិនទាន់បើកចិត្តទទួលយកបុរសណានៅឡើយទេ បើទោះទៅដល់ដែនដីអាមេរិកក្តី៕
ចែករំលែកព័តមាននេះ