រាជធានីភ្នំពេញ ៖ តារាចម្រៀងកំពុងលេចធ្លោដែលមហាជនស្គាល់តាមរយៈការប្រឡងខេមបូឌាអាយឌល លោក សៅ ឧត្តម បានចូលរោងការតាមផែនការគ្រោងទុកកាលពីយប់ថ្ងៃទី២៤ ខែកុម្ភៈ ឆ្នាំ២០១៩ ។…
រាជធានីភ្នំពេញ ៖ តារាចម្រៀងកំពុងលេចធ្លោដែលមហាជនស្គាល់តាមរយៈការប្រឡងខេមបូឌាអាយឌល លោក សៅ ឧត្តម បានចូលរោងការតាមផែនការគ្រោងទុកកាលពីយប់ថ្ងៃទី២៤ ខែកុម្ភៈ ឆ្នាំ២០១៩ ។ នេះជាការចូលរោងយ៉ាងភ្ញាក់ផ្អើលពីសំណាក់អ្នកគាំទ្រ ដោយសារនៅក្នុងសង្គមសិល្បៈអ្នកល្បីៗខ្លះត្រៀមរៀបការ ខ្លះរៀបការជាបន្តបន្ទាប់។
យ៉ាងណាមិញ តារាចម្រៀងសំឡេងផ្អែម សៅ ឧត្តម បានសម្រេចចិត្តភាពនៅលីវក្នុងវ័យ២៨ឆ្នាំ ជាមួយកូនក្រមុំវ័យ២៣ឆ្នាំ ជាអ្នកស្រុកចំការដួង រាជធានីភ្នំពេញ។ មង្គលការ សៅ ឧត្តម បានរៀបចំរំលេចឡើងយ៉ាងអធឹកអធ័មនាសាកលវិទ្យាល័យកសិកម្មចំការដូង ដោយមានទាំងអ្នកសិល្បៈ និងភ្ញៀវប្រមាណ៧០តុ។ វត្តមានតារាចូលរួមមាន ៖ ប៉ែន សារ៉ាវ គូម៉ា សុវត្ថិ ឌីធារិកា លោកផល្លី ស៊ិន សោភ័ណ យ៉ាយ៉ា ម៉ៅ គឹមធីតា លឹម ជាឡាយ ព្រមទាំងតារាមួយចំនួនទៀត។
តាមការបញ្ជាក់ប្រាប់អ្នកសារព័ត៌មានកោះសន្តិភាព កូនកម្លោះស្រអែមស្រស់ សៅ ឧត្តម បានឲ្យដឹងថា កូនក្រមុំរបស់លោកមានឈ្មោះ ចាន់ កែវវង គាត់ជាតារាម៉ូដែលម្នាក់ ហើយក៏ជាអ្នករកស៊ីពេលទំនេរពីការងារ។ លោក និងភរិយាបានស្គាល់គ្នា៥ឆ្នាំមកហើយ ដោយកំណើតស្នេហ៍ជួបគ្នានៅក្នុងកម្មវិធីសម្តែងមួយនៅឯតាមខេត្ត ដោយម្នាក់ច្រៀង និងម្នាក់ទៀតដើរម៉ូដ។
តារាចម្រៀងនិយម Cover បទចម្រៀងពីដើមរូបនេះបានឲ្យដឹងទៀតថា យើងសម្រេចចិត្តរៀបការ ក៏ព្រោះតែបានមើលចិត្តគ្នាយូរឆ្នាំហើយ សមល្មមអាចរួមរស់ជាមួយគ្នាបាន។ ចំពោះអាជីពដើរម៉ូដ ស្ថិតលើលោកជាអ្នកសម្រេច គួរតែឲ្យបន្តឬ បញ្ចប់ក្រោយពិគ្រោះគ្នា។ ទាក់ទិននិងគម្រោងយកបុត្រប្រហែលមួយឆ្នាំជាងទៀត ព្រោះត្រូវរកលុយកាក់ទុកដាក់សិនងាយស្រួលចិញ្ចឹមក្មេងឲ្យមានអនាគតល្អ៕
ចែករំលែកព័តមាននេះ