ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា គិតត្រឹមម៉ោង៦ល្ងាចថ្ងៃទី២៤ ខែកុម្ភៈ ឆ្នាំ២០១៩នេះ លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានឲ្យដឹងថា បន្ទាប់ពីក្រុមមន្ត្រីជំនាញចុះពិនិត្យសពសត្វដំរីព្រៃមួយក្បាលដែលដេកងាប់នៅជិតចំការស្វាយចន្ទីរបស់អ្នកភូមិក្នុងដែនម្រកការពារសត្វព្រៃកែវសីមា ក្នុងភូមិស្រែល្វី ឃុំស្រែខ្ទុម ស្រុកកែវសីមា ខេត្តមណ្ឌលគិរីនោះ បានដឹងមូលហេតុហើយ គឺដោយសារព្រានព្រៃបាញ់សម្លាប់ ដើម្បីកាត់យកភ្លុកដំរី។
លោក កែវ សុភគ៌ បញ្ជាក់ថា ក្រោយពីធ្វើការពិនិត្យទៅលើដងខ្លួនសត្វដំរីដែលងាប់នោះ គឺមានស្លាកស្នាមប្រវែងមួយចំអាមនៅក្រោមភ្នែក ពោលគឺមានធ្លុះចូលទៅក្នុងដែលសន្និដ្ឋានថា នេះគឺជាការបាញ់សម្លាប់សត្វដំរី ដើម្បីយកភ្លុក ។ ដំរីដែលត្រូវបាញ់សម្លាប់នោះ គឺជាដំរីឈ្មោល ហើយសត្វដំរីនេះមានវ័យចំណាស់។ ចំពោះសត្វដំរីដែលងាប់នឹងយកទៅកប់នៅកន្លែងសុវត្ថិភាពមួយ ដើម្បីរក្សាគ្រោងឆ្អឹងយកទៅរក្សាទុកធ្វើការស្រាវជ្រាវជាបន្តទៀត ។
ជាមួយគ្នានេះ ក្រសួងបរិស្ថានក៏ធ្វើការថ្កោលទោសជនដែលបាញ់សម្លាប់សត្វដំរីយកភ្លុក ហើយខាងសមត្ថកិច្ចជំនាញកំពុងធ្វើការបន្តនីតិវិធី ដើម្បីស្រាវជ្រាវរកអ្នកដែលបាញ់សត្វដំរីយកមកផ្តន្ទាទោស ។
គួររំលឹកថា ៖ ពេលនេះកំពុងដុតដៃដុតជើងរកមូលហេតុដំរីព្រៃដ៏ធំដេកស្តូកជិតចំការស្វាយចន្ទី
ចែករំលែកព័តមាននេះ