ប្រទេសវេណេស៊ុយអេឡា ៖ កងទ័ពវេណេស៊ុយអេឡា កាលពីថ្ងៃទី២៣ កុម្ភៈ បានតបតយ៉ាងខ្លាំង នៅព្រំដែនរបស់ប្រទេស ដោយបង្ខំឲ្យពួកអ្នកគាំទ្រមេដឹកនាំប្រឆាំង លោក JUAN…
ប្រទេសវេណេស៊ុយអេឡា ៖ កងទ័ពវេណេស៊ុយអេឡា កាលពីថ្ងៃទី២៣ កុម្ភៈ បានតបតយ៉ាងខ្លាំង នៅព្រំដែនរបស់ប្រទេស ដោយបង្ខំឲ្យពួកអ្នកគាំទ្រមេដឹកនាំប្រឆាំង លោក JUAN GUAIDO ឲ្យបោះបង់ចោលការបញ្ជូនជំនួយមនុស្សធម៌ ខណៈប្រធានាធិបតីលោកនីកូឡាស់ម៉ាឌូរ៉ូបដិសេធមិនឲ្យបញ្ជូនចូល ដោយបរិហារជំនួយនោះថា អាចក្លាយទៅជាអន្តរាគមន៍យោធាមួយរបស់អាមេរិក។
ចំណែកមនុស្ស២នាក់បានត្រូវស្លាប់ ហើយជាង៣០០នាក់រងរបួស ក្នុងការប៉ះទង្គិចគ្នានានានៅតាមព្រំដែនជាមួយកូឡុំប៊ី ក្នុងថ្ងៃទី២៣កុម្ភៈនោះ ហើយមនុស្ស៣០នាក់ក៏រងរបួសដែរ នៅព្រំដែនជាមួយប្រេស៊ីល។ នៅព្រំដែនជាមួយកូឡុំប៊ី នារីម្នាក់បានស្លាប់រួចហើយកាលពីថ្ងៃទី២២កុម្ភៈ។
អង្គការក្រៅរដ្ឋាភិបាលក្នុងស្រុកមួយ បានចោទប្រកាន់កងយោធាវេណេស៊ុយអេឡាថា បាញ់ទៅលើពួកបាតុករ ដែលប្រមូលផ្ដុំគ្នាដើម្បីទាមទារឲ្យបញ្ជូនជំនួយចូល។ ប្រឈមមុខនឹងអំពើហិង្សា រដ្ឋាភិបាលកូឡុំប៊ីដែលគាំទ្រលោកGUAIDO បានចេញបញ្ជាឲ្យបណ្ដារថយន្តកាំមីញ៉ុងដែលដឹកជំនួយ វិលបកក្រោយវិញដើម្បីការពារជំនួយ ហើយបរិហារពីការរំលោភបំពានលើសិទ្ធិមនុស្ស។ ចំណែករថយន្តដឹកជំនួយ២គ្រឿងបានត្រូវដុតចោល ដោយតំណាងរាស្ត្រម្នាក់ស្និទ្ធលោកGUAIDO ចោទកងកម្លាំងសន្តិសុខវេណេស៊ុយឡាថា អនុវត្តតាមបញ្ជារបស់លោកម៉ាឌូរ៉ូ។
ម្យ៉ាងវិញទៀតកងម៉ារីនវេណេស៊ុយអេឡាបានគំរាមបាញ់នាវាតូចមួយ ដែលចាកចេញកាលពីថ្ងៃទី២០កុម្ភៈពីព័រតូរីកូ ជាមួយជំនួយ។ នាវានោះរងការគំរាមកំហែងដោយផ្ទាល់ពីសំណាក់ កងនាវាចម្បាំងវេណេស៊ុយអេឡា ហើយត្រូវបកក្រោយវិញ។
ខណៈភាពតានតឹងមានខ្លាំងនៅព្រំដែន នៅក្រុងការ៉ាកាស់វិញ មានក្បួនបាតុកម្មធំ២ ដោយបាតុកម្មមួយគាំទ្រលោកGUAIDO ហើយបាតុកម្មមួយទៀតគាំទ្រលោកម៉ាឌូរ៉ូុ។ ពួកអ្នកគាំំទ្រលោកGUAIDO ច្រើនពាន់នាក់ បានលើកគ្នាមកកាន់មុខព្រលានយន្តហោះយោធាCARLOTA អំពាវនាវដល់កងទ័ពឲ្យជំនួយចូល។
សហរដ្ឋអាមេរិកអះអាងនាថ្ងៃទី២៣កុម្ភៈថា ខ្លួននឹងឈានទៅធ្វើសកម្មភាព ដើម្បីគាំទ្រដល់លទ្ធិប្រជាធិបតេយ្យនៅវេណេស៊ុយអេឡា ដោយចោទប្រកាន់អំពើព្រៃផ្សៃរបស់កងកម្លាំងសន្តិសុខលោកម៉ាឌូរ៉ូ ដែលបាញ់លើពួកបាតុករ។ ម្យ៉ាងទៀតលោកម៉ាឌូរ៉ូប្រកាសពីការផ្ដាច់ទំនាក់ទំនងការទូតជាមួយកូឡុំប៊ី ដោយចោទប្រកាន់ប្រទេសនោះថា ជ្រៀតជ្រែកចូលកិច្ចការផ្ទៃក្នុងប្រទេសលោក៕
ចែករំលែកព័តមាននេះ