រាជធានីភ្នំពេញ ៖ ដោយមានទឹកចិត្តស្រលាញ់ចម្រៀងបុរាណ កុមារារៀល រតនាដែលរស់នៅក្នុងសម័យកាលជឿនលឿននេះខិតខំហាត់រៀន និងចូលរួមប្រកួតប្រជែងក្នុងកម្មវិធី «ប្រលងចម្រៀងមហោរី បាសាក់ និងកំណាព្យ មរតកវប្បធម៌ខ្មែរ» ពានរង្វាន់សម្តេចតេជោហ៊ុន សែន នៅស្ថានីយទូរទស្សន៍បាយ័ន ។ រតនាបានលើកយកបទចម្រៀងបាសាក់ចូលរួមប្រលង ។ មកដល់ពេលនេះការប្រកួតរបស់គេបានឆ្លងផុតពីរដំណាក់កាលហើយ ។
ក្រៅពីចេះច្រៀងបទបាសាក់ រតនា មាននិស្ស័យផ្នែកចម្រៀងសម័យផងដែរ និងធ្លាប់ប្រលងទទួលបានចំណាត់ថ្នាក់ល្អទៀតផង ។
រៀល រតនា ចេះច្រៀងតាំងពីមិនទាន់និយាយច្បាស់ ។ ដោយមើលឃើញពីនិស្ស័យកូនងាកទៅរកផ្នែកសិល្បៈខ្លាំង ឪពុកម្តាយរបស់គេបានជួយលើកទឹកចិត្ត គឺមិនបង្អាក់ដំណើរឡើយ ស្របពេលពួកគាត់ជាអ្នកចូលចិត្តសិល្បៈដែរ និងធ្លាប់មានបំណងចង់ធ្វើជាអ្នកសិល្បៈតាំងពីក្មេងមក តែអត់មានឱកាស ។ សព្វថ្ងៃនេះ រៀល រតនា កំពុងតែខិតខំហាត់រៀនបទចម្រៀងបាសាក់យកទៅប្រលងនៅទូរទស្សន៍បាយ័នប្រជែងជាមួយបេក្ខជនជាច្រើននាក់ទៀត និងត្រូវឆ្លងកាត់វគ្គ ថ្មីៗទៀត ព្រោះគេឆ្លងផុតបាន២លើកហើយ ។
ក្នុងជំនួបផ្ទាល់នៅគេហដ្ឋានរបស់ រៀល រតនា កាលពីពេល ថ្មីៗនេះគេឱ្យដឹងថា គេមានអាយុ១៥ឆ្នាំ រៀនថ្នាក់ទី៧ផ្នែកភាសាអង់គ្លេស និងថ្នាក់ទី៩ភាសាខ្មែរនៅសាលាឯកជនបែ៊លធីសាខាពេទ្យលោកសង្ឃ ។ រូបគេមានឪពុកឈ្មោះជាំង ភីរុណ អាយុ៤៥ឆ្នាំ ជាអ្នកលក់ដូរ និងម្តាយឈ្មោះធូរ សៀងឡន អាយុ៤២ឆ្នាំ ជាមេផ្ទះ ។ រូបគេជាកូនច្បងក្នុងចំណោមបងប្អូន២នាក់ ក្នុងនោះស្រីម្នាក់ ។
ទាក់ទិននឹងសិល្បៈគឺរូបគេមាននិស្ស័យតាំងពីនៅក្មេង និយាយមិនច្បាស់ម៉្លេះ ។ ក្នុងកម្មវិធីជប់លៀង ឬនៅក្នុងថ្នាក់ គេតែងតែឡើងច្រៀងមិនចេះខ្មាសគេឡើយ ។ បទចម្រៀងឱ្យតែគេស្តាប់បានម្តងពីរដងគឺឆាប់ចាំណាស់ ។ រតនា និយាយថា «លោកបា៉ខ្ញុំដែលស្រលាញ់សិល្បៈដែរនោះចេះតែជំរុញលើកទឹកចិត្តឱ្យខ្ញុំទៅប្រលងតាមទូរទស្សន៍នានា ព្រោះរំពឹងថាបើចូលសិល្បៈអត់មានប្រវត្តិប្រលងប្រជែងមិនល្បីទេ ។ ម៉្លោះហើយទើបតាំងពីរូបខ្ញុំនិយាយច្បាស់មកក៏ដាក់ពាក្យប្រលងចម្រៀងផ្នែកកុមារនៅកម្មវិធីប៉ុស្តិ៍លេខ៣ ហើយបានជាប់ជ័យលាភីលេខ១ក្នុងកម្មវិធីប្រលងចម្រៀង «The Star Variety» ឆ្នាំ២០១០ និងចំណាត់ថ្នាក់លេខ២ក្នុងកម្មវិធី «CODOMO Jonior Singing contest ២០១១» ។ ដោយសារតែ រតនា បានទទួលចំណាត់ថ្នាក់ល្អបែបនេះហើយ ទើបទូរទស្សន៍មួយចំនួនទាក់ទងឱ្យឡើងច្រៀងជាកិត្តិយស មានទូរទស្សន៍បាយ័ន សីុធីអិន និងប៉ុស្តិ៍លេខ៥ជាដើម ។ ទោះជាស្រលាញ់សិល្បៈខ្លាំងយា៉ងណាក្តី តែរូបគេមិនចោលការសិក្សាទេ ។
ក្រៅពីចូលរួមច្រៀង រតនា ត្រូវគេជ្រើសរើសឱ្យសម្តែងក្នុងខ្សែរឿងមួយចំនួនក្នុងនោះមានរឿងខ្លះខាងផលិតករកូរ៉េជាអ្នកដឹកនាំ ។ ស្នាដៃសម្តែងរបស់គេមាននៅក្នុងកម្មវិធី«កម្មលោកីយ៍» រឿង«ស្នេហ៍ក្លែងក្លាយ»របស់ផលិតកម្មខ្មែរមេគង្គ និងរឿង«សន្យាស្នេហ៍»កំពុងបញ្ចាំងនៅសីុធីអិន ។ លើសពីនេះរឿងចុងក្រោយជារឿងរបស់កូរ៉េក្រោមចំណងជើងថា «Still I Strive»ដោយខាងកូរ៉េជ្រើសរើសបញ្ចាំងក្នុងកម្មវិធីពិពរ័ណ៍អន្តរជាតិ «Busan International Film Festival» និងកំពុងតែបញ្ចាំងនៅអាមេរិក និងប្រទេសកូរ៉េតាំងពីអំឡុងបុណ្យចូលឆ្នាំខ្មែរមកម៉្លេះ ។ រឿងនេះគេអាចទស្សនាបានតាម Website Youtube(Still I Strire) ។
អ្វីដែលរតនា កំពុងតែភ័យព្រួយនោះគឺការប្រឡងចម្រៀងបាសាក់ ។ ទោះជាយា៉ងណាក្តីមានលោកគ្រូ ចាស់ៗជួយជំរុញ ពិសេសលោកតាហ្វុ៊យហ្សូធ្វើឱ្យគេមានកម្លាំងចិត្តខំហាត់ពត់សំឡេងឱ្យកាន់តែល្អ ។ រតនា យល់ថាខ្លួននៅក្មេង បើជាប់ចំណាត់ថ្នាក់ល្អក្នុងការប្រលងចម្រៀងបុរាណច្បាស់ជាពិសេសណាស់ ម្យា៉ងជាពានរង្វាន់សម្តេចតេជោហ៊ុន សែន ទៀតផង ។
រៀល រតនា ប្រាថ្នាក្លាយជាអ្នកសិល្បៈដែលមានឈ្មោះបោះសំឡេងនាពេលអនាគត ៕
ចែករំលែកព័តមាននេះ