រាជធានីភ្នំពេញ ៖ មន្ត្រីក្រសួងសាធារណការ និងដឹកជញ្ជូន បានឲ្យដឹងថា ការស្ថាបនាផ្លូវតភ្ជាប់រវាងស្រុកសំឡូតក្នុងខេត្តបាត់ដំបង ឆ្លងកាត់ខេត្តពោធិ៍សាត់ ឆ្ពោះមកខេត្តកោះកុងនឹងចាប់ផ្តើមសាងសង់នៅឆ្នាំនេះហើយ ។ លោក វ៉ាស៊ឹម សូរិយា អ្នកនាំពាក្យក្រសួងសាធារណការ និងដឹកជញ្ជូន បានមានប្រសាសន៍នាព្រឹកថ្ងៃទី២២ កុម្ភៈ ម្សិលមិញថា គម្រោងសាងសង់ផ្លូវតភ្ជាប់រវាងស្រុកសំឡូត ទៅកាន់ខេត្តកោះកុង នឹងបើកការដ្ឋានសាងសង់នៅឆ្នាំនេះ ប៉ុន្តែមិនទាន់កំណត់ពេលវេលាជាក់លាក់នៅឡើយទេ ។
លោកមានប្រសាសន៍ថា ៖« រហូតមកទល់ពេលនេះ យើងមិនទាន់ដឹងពីគំរោងថវិកា និងក្រុមហ៊ុនណាដែលនឹងសាងសង់ស្ពាននេះនោះទេ »។ យ៉ាងណាក៏ដោយ លោកថា ៖« បើមិនមានការប្រែប្រួលអ្វីទេនោះ គម្រោងផ្លូវនេះនឹងចាប់ផ្តើមនៅឆ្នាំនេះហើយ »។ ផ្លូវនេះចេញពីស្រុកសំឡូត ខេត្តបាត់ដំបង ឆ្លងកាត់ខេត្តពោធិ៍សាត់ទៅកាន់ខេត្តកោះកុង ដែលមានប្រវែងជា១៩០គីឡូម៉ែត្រ ។
ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ធ្លាប់បានមានប្រសាសន៍ថា ការសាងសង់ផ្លូវនេះ មិនត្រឹមតែជាការធ្វើសមាហរណកម្មផ្ទៃក្នុងកម្ពុជានោះទេ តែគោលដៅរបស់សម្តេចតេជោ គឺពង្រឹងឯករាជ្យភាពសេដ្ឋកិច្ចកម្ពុជា តាមរយៈការកាត់បន្ថយការពឹងផ្អែកប្រទេសជិតខាង ដោយផ្លូវនេះនឹងសម្រួលការដឹកជញ្ជូនកសិផលដ៏សម្បូរបែបនៅភូមិភាគពាយ័ព្យ ទៅកាន់កំពង់ផែនៅខេត្តកោះកុង ដើម្បីដឹកចេញទៅកាន់ប្រទេសទី២ ដែលជាការកាត់បន្ថយការពឹងផ្អែកប្រទេសជិតខាង ។
លោកទេសរដ្ឋមន្ត្រី ស៊ុន ចាន់ថុល ថ្លែងថា ៖« ការសាងសង់ផ្លូវនេះពិតជារួមចំណែកលើកស្ទួយសេដ្ឋកិច្ចសង្គមកម្ពុជា និងពង្រីកទីផ្សារកម្ពុជាជាមួយប្រទេសដទៃទៀត »។ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ក្នុងពេលអញ្ជើញចូលរួមពិធីបុណ្យសមុទ្រនៅខេត្តកោះកុងកាលពីចុងឆ្នាំមុនថា ប្រជាជននៅតំបន់នេះ សូមរង់ចាំបន្តិច ព្រោះសម្តេចនឹងសាងសង់ផ្លូវនេះនាពេលឆាប់ៗខាងមុខនេះ ។
ផ្លូវជាតិថ្មីលេខ៥៥.៤នេះនឹងត្រូវបានស្ថាបនាចេញពីចំណុចអក្សរ(T) ក្នុងភូមិព្រៃធំ ឃុំកំពង់ល្ពៅ ស្រុកសំឡូត ភ្ជាប់ទៅផ្លូវជាតិលេខ៥៥ ត្រង់ចំណុចប្រម៉ោយ ក្នុងស្រុកវាលវែង ខេត្តពោធិ៍សាត់ ហើយបន្តឆ្ពោះទៅកាន់ខេត្តកោះកុង ដែលសមិទ្ធផលនេះ នឹងលេចរូបរាងឆាប់ៗខាងមុខ ៕
ចែករំលែកព័តមាននេះ