ខេត្តតាកែវ ៖ សិល្បៈយីកេខេត្តតាកែវល្បីល្បាញណាស់ តែងតែទទួលបានការកោតសរសើរចំពោះទេពកោសល្យសម្តែងដ៏ល្អពីមហាជន ។ យីកេខេត្តតាកែវតែងតែផ្សព្វផ្សាយជា រឿយៗក្នុងកម្មវិធីសិល្បៈរបស់ទូរទស្សន៍ជាតិ ។ កាលពីពេល ថ្មីៗកន្លងមក អ្នកយកព័ត៌មានកោះសន្តិភាពបានជួបសម្ភាសន៍ជាមួយលោកប្រាក់ ប៊ន អតីតប្រធានមន្ទីរវប្បធម៌ និងវិចិត្រសិល្បៈខេត្តតាកែវ ជាអ្នកនិពន្ធ និងគ្រូយីកេ ទាក់ទិនកិត្តិស័ព្ទយីកេខេត្តតាកែវ ។
សំណួរ ៖ យីកេខេត្តតាកែវល្បីល្បាញណាស់តើមកពីកត្តាអ្វីខ្លះ ?
ចម្លើយ ៖ ភាពល្បីល្បាញនេះមកពីខាងសិល្បៈយើងនៅទីនេះបានរៀនសូត្របន្តពីយីកេតាឃី និងម្យ៉ាងវិញទៀតយើងបានអភិរក្សយីកេឱ្យបានល្អ និងអភិវឌ្ឍផ្នែកបច្ចេកទេសយីកេ ។ អភិរក្សយើងបានអភិរក្សទម្រង់យីកេ ចម្រៀងដែលយើងរកឃើញរហូតដល់ជិត១០០បទដែលសង្គមចាស់រកឃើញតិចជាងនេះ ។ កត្តាមួយទៀតគឺការខិតខំព្យាយាមរបស់ថ្នាក់ដឹកនាំរបស់រាជ រដ្ឋាភិបាលបានជួយជំរុញអាជ្ញាធរខេត្ត ជំរុញក្រសួងវប្បធម៌ ជំរុញមកយើងជាប្រធានមន្ទីរខេត្តប្រឹងប្រែងរក្សាយីកេត្រកូលតាឃី ។
យីកេតាកែវល្បីពីមុនមានលោកតាឃី ។ តាំងពីឆ្នាំ១៩៧៩មកក្រុមយីកេគ្រួសារតាឃីបានកើតឡើង តែជំនាន់នោះមិនសូវល្បីទេ ។ យីកេខេត្តតាកែវចាប់ផ្តើមឡើងតាំងពីឆ្នាំ១៩៧៩មកនាថ្ងៃទី១៣ តុលា ឆ្នាំ១៩៧៩ ដោយបានចាប់យកផ្នែកយីកេជាផ្នែកធំជាគោលតែម្តង។
អីុចឹងហើយ ទើបយើងខិតខំប្រឹងប្រែតស៊ូសិក្សាស្រាវជ្រាវផ្នែកយីកេនេះរហូត ទាល់តែអ្នកទស្សនាយកចិត្តទុកដាក់ជាមួយយីកេ ។ មូលហេតុនេះហើយចេះតែជំរុញឱ្យសិល្យៈយីកេខេត្តតាកែវល្បីល្បាញ រហូតយីកេមានប្រជាប្រិយភាព មានឱកាសថតផ្សាយតាមទូរទស្សន៍ ខណៈដែលយើងបានជំរុញឱ្យក្រុមសិល្បករសម្តែងឱ្យសុក្រឹតបំផុត ។ លើសពីនោះយើងបានរក្សាក្សាច់ រក្សាទំនៀមទម្លាប់ រក្សាចម្រៀង ក្បួនខ្នាតយីកេ ទើបយើងល្បីរហូតមកទល់ពេលនេះ ។
តាំងពីដើមមកយីកេបើគេចង់សិក្សា គឺមកទាក់ទងតាឃីដែលមានដើមកំណើតនៅខេត្តតាកែវនេះឯង ។ លោកតាឃីគាត់បានរៀនពីគ្រូរបស់គាត់ម្នាក់មិនចាំឈ្មោះជាមេកង ។ ពេលហាត់រៀនចេះចាំគាត់ក៏យកមកបង្ហាត់យីកេនៅ ស្រុកភូមិគាត់ដោយផ្ទាល់ ទើបកូនចៅ ពូជអម្បូរគាត់សុទ្ធតែជាអ្នកយីកេទាំងអស់រហូតមកទល់នឹងពេលនេះ ។ តាឃីរស់នៅភូមិដកព ឃុំបឹងត្រាញ់ខាងត្បូង ស្រុកសំរោង ខេត្តតាកែវ ។
សំណួរ៖ បើនិយាយពីយីកេគឺនិយាយដល់ខេត្តតាកែវ តើមែនទេលោក ព្រោះអ្វី ?
ចម្លើយ ៖ យើងខ្ញុំមានភាពសប្បាយរីករាយណាស់ ទី១សំខាន់គឺខ្ញុំនេះឯងជាអ្នកថែរក្សាសិក្សាស្រាវជ្រាវយីកេ ចងក្រងឯកសារ រហូតដល់ចងក្រងជូនក្រសួងវប្បធម៌ ហើយត្រូវខាងយូណេស្កូទទួលស្គាល់យកទៅចងក្រងបោះពុម្ភសម្រាប់ ឲ្យសិស្សនិស្សិតនៅសាលាវិចិត្រសិល្បៈរៀន ។ ទាំងអស់នេះហើយដែលខ្ញុំមានមោទន ភាព ពិសេសក្រុមសិល្បករប្រចាំនៅខេត្តតាកែវ ដែលបានតស៊ូអំណត់ខំសម្តែងតាំងពីគេមិនចេះមើលរហូតដល់គេមើល ។ ទាំងនេះទាក់ទងគ្នាតាំងពីផ្នែកដឹករឿង ផ្នែកនិពន្ធ ផ្នែកគ្រប់គ្រងផងដែរ រហូតទាល់តែសិល្បៈយីកេមានភាពល្បីល្បាញ ហើយទទួលបានចំណាត់ថ្នាក់លេខ១ទូទាំងប្រទេស។
យើងធ្លាប់ទទួលការសរសើរពីប្រជាពលរដ្ឋ ដែលមកទស្សនាយីកេដោយមិនឲ្យយីកេសម្តែងទៅហើយស្ងាត់ស្ងៀម គឺមកពីយើងខិតខំប្រឹងប្រែងគ្រប់រូបភាពទាំងអស់ទាំង ការផ្សព្វផ្សាយតាមទូរទស្សន៍ ទាំងការសម្តែងផ្ទាល់ ទាំងទឹកដមសំឡេងដែលខេត្តតាកែវមាន គឺធ្វើឲ្យប្រជាពលរដ្ឋស្រឡាញ់ពេញចិត្ត ។
សំណួរ៖ កន្លងមកយីកេខេត្តតាកែវមានប៉ុន្មានរឿងដែលបានផលិតចាក់ផ្សាយតាម កញ្ចក់ទូរទស្សន៍ជាតិ? តើក្រុមយីកេខេត្តតាកែវធ្លាប់ចូលរួមសម្តែងក្នុងកម្មវិធី ធំៗអ្វីខ្លះ និងសម្តែងក្នុងពិធីបុណ្យទានតាមភូមិ ស្រុកញឹកញាប់ឬទេ? ក្រៅពីការសរសើរពីមជ្ឈដ្ឋានមហាជន តើក្រុមយីកេខេត្តតាកែវធ្លាប់ទទួលបានពានរង្វាន់ពីមហោស្រពថ្នាក់ជាតិ ឬពីស្ថាប័នណាទេ ?
ចម្លើយ៖ យើងបានផលិតរឿងចាក់តាមកញ្ចក់ទូរទស្សន៍ជាតិច្រើនមកហើយដោយក្នុង នោះរឿងដែល ល្បីៗមានរឿង«កាកី» «ព្រះថោងនាងនាគ» «វិធុរបណ្ឌិត» «សុវណ្ណសាម» និងរឿងជាច្រើនទៀត ដែលយើងធ្វើរួចមកហើយ ។ យីកេចាំបាច់ត្រូវឆ្លងឆ្លើយដោយភាសាកំណាព្យ បើអត់កំណាព្យគឺអត់ល្អមើលព្រោះយើងបានខិតខំប្រឹងប្រែងយកបុរាណមកដាក់ ព្រោះថារឿងភាគច្រើនយកបុរាណមកធ្វើ ហើយយើងខំយកមកដាក់ជាទម្រង់យីកេឲ្យមើលទៅងាយស្រួលលេចធ្លោឡើង ហើយដែលគិតថាពិភពលោកមានការទទួលស្គាល់ ។
យីកេខេត្តតាកែវ ធ្លាប់សម្តែងស្ទើរតែគ្រប់មហោស្រពទូទាំងប្រទេស ក្នុងពិធី ធំៗដូចជាពិធីឆ្លងសហស្សវត្ស ធ្លាប់ចូលរួមមហោស្រពអង្គរ ។ យីកេខេត្តតាកែវតែងតែចូលរួមមហោស្រពថ្នាក់ជាតិ ធំៗដែរ ។ ពានរង្វាន់លេខ១ពីសម្តេចអគ្គមហាសេនាបតីតេជោហ៊ុន សែន ធ្លាប់ទទួលពីក្រសួងវប្បធម៌ ជាក់ស្តែងរឿង«ព្រះថោងនាងនាគ»ទទួលបានចំណាត់ថ្នាក់លេខ១ពី មហោស្រពប្រឡងសិល្បៈបុរាណថ្នាក់ជាតិទូទាំងប្រទេស និងខ្ញុំជាអ្នកដឹកនាំធ្លាប់បានសញ្ញាបត្រវរសិល្បករ និងបានពានកិត្តិយសអាណាចក្រតារា ។ មិនដែលសម្តែងកន្លែងណាហើយយីកេតាកែវធ្លាក់អន់ថយនោះឡើយ ។
សំណួរ៖ តើការផលិតរឿងយីកេសម្រាប់ចាក់ផ្សាយតាមទូរទស្សន៍ជាតិកន្លងមកបានប្រាក់ឧបត្ថម្ភពីខាងណាខ្លះ?
ចម្លើយ ៖ ត្រង់នេះ ទី១យើងបានខិតខំខ្លួនឯងជាសំខាន់ ទី២យើងបានអាជ្ញាធរខេត្តជួយ ទី៣មន្ទីរវប្បធម៌ខេត្តឯករាជ្យម្ចាស់ការជួយខ្លួនឯង និងសិល្បករខ្លួនឯងខំរកថវិកាសម្រាប់ផ្សព្វផ្សាយ ព្រោះ មួយឆ្នាំៗយើងសម្តែងបានច្រើន ហើយបានថវិកាយកមករក្សាទុកសម្រាប់ពង្រីកការងារសិល្បៈខេត្តតាកែវ ឱ្យដំណើរការ ។ ក្នុងនោះបានការឧបត្ថម្ភពីអស់លោកមួយចំនួន ពិសេសបានលោកបណ្ឌិតសុខ អាន ជួយពួកយើងរហូតដែរ ។
សំណួរ៖ តាមការកត់សម្គាល់យីកេខេត្តតាកែវ បានបាត់មុខពីកញ្ចក់ទូរទស្សន៍ ប៉ុន្មានឆ្នាំមកហើយ គឺតាំងពីរឿងសុវណ្ណសាមផលិតនៅឆ្នាំ២០០៨មក តើមកពីហេតុអ្វី?
ចម្លើយ៖ មកពីសិល្បករយើងចាស់ទ្រុឌទ្រោម អាចនិយាយបានថាមកពីអ្នកសម្តែងគាត់ចាស់ទុំអស់ ហើយយើងក៏នៅមិនទាន់មានលទ្ធភាពជ្រើសរើស យើងជ្រើសរើសបានតែសិស្សវាស្រុត កាលណាឡើងខ្លាំងដល់កំពូលហើយនោះ គឺច្បាស់ជាធ្លាក់ចុះមកវិញ ។ អុីចឹងប៉ុន្មានឆ្នាំចុងក្រោយនេះធ្លាក់ចុះ ដោយសារតែមន្ត្រី សិល្បករពីមុន ចាស់ៗ និងចូលនិវត្តន៍ច្រើន ហើយខិតខំបណ្តុះបណ្តាលក្មេងជំនាន់ក្រោយ តែបណ្តុះបណ្តាលអត់ទាន់ និងគ្មានថវិកាសម្រាប់ឧបត្ថម្ភក្មេងដែលមកសម្តែងសិល្បៈ ព្រោះគ្នាមកលេងសុទ្ធសឹងតែកូនអ្នកក្រីក្រ ហើយកូនអ្នកធូរធារគេមិនសូវចូលរួមជាមួយយើងទេ ព្រោះចំណូលពីការសម្តែងមានកម្រិតមិនបានជាច្រើន ហើយអន់ថយមួយរយៈ ។
តែទោះជាយ៉ាងណាក្តី យើងបានប្រឹងបណ្តុះបណ្តាលក្មេងជាច្រើន ដោយបានញ្ជូនក្មេងឲ្យទៅរៀននៅភ្នំពេញនៅសាលាវិចិត្រសិល្បៈឲ្យបានច្រើនដើម្បីឲ្យ ក្មេងៗរៀនព្រោះរៀននៅខេត្តអត់មានសញ្ញាបត្រចេញឲ្យទេ ប៉ុន្តែយើងក៏មានសិល្បករ ចាស់ៗត្រៀមដែរ គ្រាន់តែខ្វះថវិកាថតសម្តែង ជារឿងសំខាន់ ។
សំណួរ៖ តើលោកចង់អំពាវនាវ ឬសំណូមពរអ្វីដើម្បីជួយឧបត្ថម្ភការផលិតយីកេផ្សាយតាមកញ្ចក់ទូរទស្សន៍កុំឲ្យបាត់យូរពេក ?
ចម្លើយ៖ ខ្ញុំមានគោលបំណងធំចង់ឲ្យឯកឧត្តម អស់លោក លោកស្រីដែលមានសន្តានចិត្តចង់ជួយ ដោយសារតែយីកេតាកែវល្បីណាស់ គោលចម្បងចង់ឲ្យផ្តល់ជាថវិកាសម្រាប់សិក្សាស្រាវជ្រាវរកឯកសារដែលកប់យូរមកហើយតែយកមិនបាន ។ មួយវិញទៀតការងារសិល្បៈអាជីពមានកម្រិត មិនដូចជាសិល្បៈមហាជនទេ បើសិល្បៈមហាជនលោកសម្តែងយ៉ាងណាឲ្យតែបានលុយ សប្បាយ អាចរកប្រាក់បានច្រើន ប៉ុន្តែបើសម្តែងគិតពីគុណភាព គិតពីផលប្រយោជន៍ជាតិ ដោយប្រុងប្រយ័ត្នឲ្យគេមើលនោះក៏មានបញ្ហាច្រើន ។
អ្វីដែលសំខាន់ចាំបាច់គឺថវិកា ហើយត្រូវមានឯកសារគ្រប់គ្រាន់ និងផ្តោតសំខាន់លើទំពាំងស្នងឫស្សីនោះយីកេនឹងឡើងខ្លាំង ។ ជាពិសេសមហាជនដែលស្គាល់ពីស្នាដៃយីកេតាកែវសូមជួយគាំទ្របន្តទៀត ដើម្បីឲ្យសិល្បករមានទឹកចិត្ត ទោះជាពេលនេះហាក់បាត់មុខមែន តែយើងក៏ខិតខំព្យាយាមច្នៃអ្នក ថ្មីៗបន្តទៀតដើម្បីឲ្យមានការទទួលស្គាល់ដូចរៀមច្បង ៕
ចែករំលែកព័តមាននេះ