រាជធានីភ្នំពេញ ៖ ជនសង្ស័យម្នាក់ប្រដាប់ដោយដំបងឫស្សីក្នុងដៃបានឈរស្ទាក់ផ្លូវបុរសម្នាក់ទៀតដែលជាអ្នកភូមិជាមួយគ្នាឲ្យឈប់ រួចហើយសុំជិះម៉ូតូជាមួយផង ប៉ុន្តែពេលនោះដោយសារតែដឹងថា ជនសង្ស័យម្នាក់នេះជាមនុស្សខិលខូចមិនអាចឲ្យទុកចិត្តបាន ម្យ៉ាងទៀតឃើញមានកាន់ដំបងផងនោះ ខ្លាចមានគ្រោះថ្នាក់ដល់ខ្លួន ទើបបុរសជាម្ចាស់ម៉ូតូប្រកែកមិនព្រមឲ្យជិះជាមួយឡើយ ធ្វើឱ្យជនសង្ស័យខឹងក៏ធ្វើសកម្មភាពច្រានជនរងគ្រោះទម្លាក់ពីលើម៉ូតូ ព្រមទាំងយកដំបងឫស្សីដេញវាយ និងដណ្ដើមយកម៉ូតូជិះគេចខ្លួនបាត់ស្រមោល ។ បន្ទាប់មកជនរងគ្រោះបានដាក់ពាក្យបណ្ដឹងសុំឲ្យនគរបាលជួយអន្តរាគមន៍ ហើយ៥ថ្ងៃក្រោយមកទើបនគរបាលព្រហ្មទណ្ឌខណ្ឌដង្កោចាប់ឃាត់ខ្លួនជនសង្ស័យម្នាក់ខាងលើបាន។
ការចាប់ខ្លួននោះបានធ្វើឡើងកាលពីវេលាម៉ោង៧និង៣០នាទីព្រឹក ថ្ងៃទី២៣ ខែកុម្ភៈ ឆ្នាំ២០១៩ នៅក្នុងផ្ទះជនសង្ស័យខាងលើដែលមានទីតាំងស្ថិតនៅក្នុងភូមិក្រាំងស្វាយ សង្កាត់ក្រាំងពង្រ ខណ្ឌដង្កោ រាជធានីភ្នំពេញ។
ជនសង្ស័យខាងលើឈ្មោះ ចែម ពិសិដ្ឋ ភេទប្រុស អាយុ២៦ឆ្នាំ មុខរបរមិនពិតប្រាកដ មានទីលំនៅផ្ទះគ្មានលេខ ផ្លូវបេតុង ភូមិក្រាំងស្វាយ ។ ចំណែកជនរងគ្រោះឈ្មោះ ម៉ម ចាន់ស៊ីដេត ភេទប្រុស អាយុ២៦ឆ្នាំ មុខរបរកម្មកររោងចក្រកាត់ដេរ មានទីលំនៅក្នុងភូមិក្រាំងស្វាយជាមួយគ្នា ជាម្ចាស់ម៉ូតូមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៩ ពាក់ស្លាកលេខ ភ្នំពេញ 1១HJ-៤៩០៤ ។
តាមពាក្យបណ្ដឹងរបស់ជនរងគ្រោះបានបញ្ជាក់ថា កាលពីវេលាម៉ោ៦ល្ងាចថ្ងៃទី១៨ ខែកុម្ភៈ ឆ្នាំ២០១៩ គាត់បានជិះ ម៉ូតូម្នាក់ឯងចេញពីធ្វើការនៅរោងចក្រកាត់ដេរអាខាសេត ដែលមានទីតាំងស្ថិតនៅក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ។
បន្ទាប់មកគាត់មិនបានទៅផ្ទះរបស់គាត់ភ្លាមៗនោះទេ ព្រោះជាប់រវល់ទៅលេងផ្ទះអ្នកភូមិជាមួយគ្នា ដែលស្ថិតនៅចម្ងាយប្រហែល៨០០ម៉ែត្រប៉ុណ្ណោះពីផ្ទះរបស់គាត់ លុះពេលទៅដល់ គាត់បាននៅផ្ទះនោះរហូតដល់វេលាម៉ោង៩យប់ថ្ងៃដដែល ទើបចាកចេញ ហើយបានជិះម៉ូតូត្រឡប់ទៅផ្ទះរបស់គាត់វិញ តែពេលជិះបានបន្តិចក៏ស្រាប់តែឃើញជនសង្ស័យកំពុងឈរស្ទាក់ផ្លូវឲ្យឈប់។
ប្រភពដដែលបានបន្តថា ពេលនោះគាត់បានឈប់ម៉ូតូ ហើយជនសង្ស័យបានបង្ខំឲ្យគាត់ឌុបជូនទៅផ្ទះប៉ុន្តែដោយសារតែធ្លាប់ដឹងថា ជននោះជាមនុស្សខិលខូចមិនគួរជាទីទុកចិត្តបាន ម្យ៉ាងយប់ជ្រៅផងនោះ ទើបគាត់ ប្រកែកមិនព្រមឌុបឡើយ ។ ភ្លាមៗនោះជនសង្ស័យបានឆក់យកកូនសោម៉ូតូ ហើយច្រានគាត់ទម្លាក់ចេញពីម៉ូតូ រួចបានឡើងជិះម៉ូតូប្រុងគេចខ្លួន ភ្លាមៗនោះគាត់ក៏បានស្ទុះឡើងជិះពីក្រោយជនសង្ស័យនោះដែរ និងស្រែកឲ្យជននោះឈប់ម៉ូតូ ប៉ុន្តែពេលនោះ ជនសង្ស័យម្នាក់នេះមិនត្រឹមតែមិនព្រមឈប់ប៉ុណ្ណោះទេ ថែមទាំងស្រែកគំរាមកំហែងគាត់ថា «អាឯងកុំមកតាមអញ ប្រយ័ត្នអញវ៉ៃងាប់» ។ ទោះបីជាបែបណា គាត់នៅតែព្យាយាមជិះពីក្រោយជនសង្ស័យរហូតបានចម្ងាយប្រហែល១៥០ម៉ែត្រ ទើបគាត់លោតចុះពីលើម៉ូតូនិងស្រែកថា«ចោរៗ»ដើម្បីឲ្យអ្នកជិតខាងជួយ។
ប្រភពដដែលបានបន្តទៀតថា នៅពេលគាត់ស្រែកបែបនេះ ជនសង្ស័យមិនបានជិះម៉ូតូគេចខ្លួនភ្លាមៗឡើយ បែរជាជិះម៉ូតូដេញតាមពីក្រោយគាត់ ហើយយកដំបងឫស្សីប្រវែងប្រហែល១ម៉ែត្រ ចំនួន២កំណាត់ដេញវាយប៉ុនប៉ងសម្លាប់គាត់ ប៉ុន្តែវាយមិនត្រូវដោយសារតែគាត់រត់ចូលទៅពួនក្នុងស្ទឹងព្រែកត្នោត បន្ទាប់មកជនសង្ស័យក៏បានជិះម៉ូតូគេចខ្លួនបាត់ដោយសុវត្ថិភាព ។ ក្រោយមកគាត់ក៏បានទៅដាក់ពាក្យបណ្តឹងសុំឲ្យនគរបាលខណ្ឌដង្កោជួយអន្តរាគមន៍ចាប់ខ្លួនជនសង្ស័យដើម្បីចាត់ការតាមច្បាប់តែម្ដង។
ប្រភពពីនគរបាលបានឲ្យដឹងថា បន្ទាប់ពីទទួលបានពាក្យបណ្ដឹងរបស់ជនរងគ្រោះខាងលើភ្លាម កម្លាំងនគរបាលព្រហ្មទណ្ឌខណ្ឌដង្កោក្រោមការដឹកនាំនិងបញ្ជាដោយផ្ទាល់ដោយលោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោ បានធ្វើការ ស្រាវជ្រាវនិងតាមចាប់ខ្លួនជនសង្ស័យខាងលើ លុះដល់វេលាម៉ោង៧និង៣០នាទីព្រឹកថ្ងៃទី២៣ ខែកុម្ភៈ ឆ្នាំ២០១៩ បានប្រទះឃើញជនសង្ស័យត្រឡប់ចូលភូមិវិញ និងបានចូលពួនសង្ងំនៅក្នុងផ្ទះ ទើបសមត្ថកិច្ចព័ទ្ធចាប់ខ្លួនបាន រួចនាំទៅសាកសួរនៅផ្នែកព្រហ្មទណ្ឌនៃអធិការដ្ឋាននគរបាលខណ្ឌដង្កោ ដើម្បីរង់ចាំបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី ៕
ចែករំលែកព័តមាននេះ