ទីបំផុត! វគ្គផ្ដាច់ព្រ័ត្ររកឃើញកីឡាករគ្រងជើងឯក និងឈ្នះប្រាក់៤ពាន់ដុល្លារហើយ
- ភ្នំពេញ
រាជធានីភ្នំពេញ ៖ នៅទីបំផុត ការប្រកួតវគ្គផ្ដាច់ព្រ័ត្រក្នុងព្រឹត្តិការណ៍ជ្រើសរើសជើងឯក TV5 Knock Out Series By K-Cement…
រាជធានីភ្នំពេញ ៖ នៅទីបំផុត ការប្រកួតវគ្គផ្ដាច់ព្រ័ត្រក្នុងព្រឹត្តិការណ៍ជ្រើសរើសជើងឯក TV5 Knock Out Series By K-Cement សម្រាប់ប្រភេទទម្ងន់៥៧គីឡូក្រាម ត្រូវបានបញ្ចប់ហើយ កាលពីថ្ងៃទី២៣ ខែកុម្ភៈ ដោយកីឡាករ ម៉ន សាម៉េត បង្គោលខៀវ គឺជាអ្នកឈ្នះគ្រងជើងឯក និងទទួលបានទឹកប្រាក់៤ពាន់ដុល្លារ។
កីឡាករ ធន អៀងឡៃ ដែលបានត្រឹមចំណាត់ថ្នាក់លេខ២ បានបង្ហាញអារម្មណ៍សោកស្ដាយយ៉ាងខ្លាំង ប៉ុន្តែគេអះអាងថា គឺស័ក្តិសមហើយ ដែលគេបានត្រឹមតំណែងលេខ២ ដោយសារតែ ម៉ន សាម៉េត គឺជាជើងខ្លាំង និងធ្លាប់គ្រងជើងម្ដងហើយ កាលពីប៉ុន្មានឆ្នាំមុននៅទូរទស្សន៍អាស៊ីអាគ្នេយ៍។ ការប្រកួតដែលបានធ្វើឡើងនៅសង្វៀនប៉ុស្ដិ៍លេខ៥ ស្ថិតនៅព្រែកកំពិសនេះ អ្នកទស្សនាផ្ទាល់នៅទីតាំងបើកប្រកួត គឺកកកុញតែម្ដង ខណៈដែលកីឡាករដែលបានកំដររេញក៏ល្អតាំងពីគូទី១ រហូតដល់គូជើងឯក និងគូជើងឯក។
កីឡាករ ម៉ន សាម៉េត ត្រូវបានគេដឹងថា មានប្រៀបច្រើនជាងគូប្រកួតបង្គោលក្រហមតាំងពីពេលគេបានឡើងមកដល់វគ្គផ្ដាច់ព្រ័ត្រនោះម្ល៉េះ ដោយសារតែគេគឺជាកីឡាករជើងខ្លាំងមួយរូប ហើយបើទោះជាគេធ្លាក់ដៃអស់មួយរយៈ តែគេក៏បានធ្លាប់គ្រងតំណែងជើងឯក ផ្ទុយពី ធន អៀងឡៃ គឺទើបតែបានឈានឡើង។
ការប្រកួតរបស់អ្នកទាំងពីធ្វើឱ្យមានការចាប់អារម្មណ៍តាំងពីទឹកទី១ ជាពិសេសក្នុងពេលដែល ធន អៀងឡៃ ដែលជាកីឡាករសិស្សប្អូន ស្រាប់តែអាចបញ្ចេញស្នៀតធ្វើឱ្យកីឡាករសិស្សច្បង ប៊ិះនឹងចង់ផ្ងារជើង ហើយចង់ពិបាកម្ដងៗ។ យ៉ាងណាមិញ ការប្រកួតចុងក្រោយ កីឡាករ ម៉ន សាម៉េត នៅតែសង្កត់តួលេខឈ្នះពិន្ទុ ដោយអាចយកឈ្នះ ហើយក្លាយជាជើងឯក និងជាម្ចាស់ពានដែលគេចង់បាន។
កីឡាករ ម៉ន សាម៉េត បានអះអាងថា លោកសប្បាយចិត្តណាស់ ដែលទទួលបានទឹកប្រាក់៤ពាន់ដុល្លារ និងបានក្លាយជាម្ចាស់ជើងឯកនៅក្នុងព្រឹត្តិការណ៍មួយនេះ ក្នុងពេលដែលលោកប្រកាសថា បើទោះជាខ្លួនធ្លាប់បានជើងឯក ប៉ុន្តែនៅពេលប៉ះប្រកួតជាមួយសមាសភាពផ្សេង គឺខ្លួនក៏បានឡើងមកដល់វគ្គផ្ដាច់ព្រ័ត្រដោយការលំបាកខ្លាំង។ ដ្បិតថា ខ្លួនមានប្រៀបជាង ធន អៀងឡៃ ប៉ុន្តែលោកថា ទម្រាំទទួលបានជ័យជម្នះដែលអ្នកណាៗក៏សម្ដែងការអបអរមួយនេះ គឺលោកប្រយ័ត្នប្រយែងខ្លាំងណាស់ ជាពិសេសគឺការហ្វឹកហាត់តែម្ដង៕
ចែករំលែកព័តមាននេះ