រាជធានីភ្នំពេញ ៖ កាលពីថ្ងៃទី៣ មីនា នៅរាជបណ្ឌិត្យសភាកម្ពុជាមានរៀបចំពិធីការពារនិក្ខេបបទស្តីពី ប្រព័ន្ធឧត្តមសិក្សានៅកម្ពុជាពីឆ្នាំ១៩៥៥ ដល់បច្ចុប្បន្នដោយបេក្ខជនបណ្ឌិតចៅ លិន ។ លោកចៅ លិន បានឱ្យដឹងថា គោលបំណងនៃការស្រាវជ្រាវលើប្រធានបទនេះ គឺលោកចង់សង្កត់ធ្ងន់ទៅលើការអប់រំឧត្តមសិក្សាកម្ពុជាពីឆ្នាំ១៩៥៥ មកដល់សព្វថ្ងៃនេះក្នុងអត្ថន័យរកឱ្យឃើញនូវវិស័យអប់រំឧត្តមសិក្សាមួយដែលបណ្តុះបណ្តាលប្រកបដោយគុណភាពខ្ពស់ អាចឆ្លើយតបបានទៅនឹងតម្រូវការនៃទីផ្សារការងារនៅក្នុងសង្គម ។
លោកចៅ លិន បានបន្តថា នៅក្រោយឆ្នាំ១៩៥៥ ខៀនអប់រំឧត្តមសិក្សានៅកម្ពុជា បានចាប់ផ្តើមដំណើរការអភិវឌ្ឍគួរឱ្យកត់សំគាល់ ព្រោះគិតមកដល់ឆ្នាំ១៩៧០ កម្ពុជាមានគ្រឹះស្ថានឧត្តមសិក្សាដល់ទៅ៩កន្លែងទៅហើយ គឺរាជធានីភ្នំពេញ ៦កន្លែង និងតាមបណ្តាខេត្តមាន៣កន្លែងទៀត ។ ការបណ្តុះបណ្តាលធនធានមនុស្សនៅពេលនោះសុទ្ធតែអាចឆ្លើយតបបានទៅនឹងតម្រូវការនៃទីផ្សារអភិវឌ្ឍសង្គមលើគ្រប់វិស័យមិនចាញ់ប្រទេសជិតខាង និងប្រទេសកំពុងអភិវឌ្ឍលើសាកលលោកឡើយ ។
លោកចៅ លិន បញ្ជាក់ថា ក្នុងទសវត្សឆ្នាំ១៩៧០ ដល់ឆ្នាំ១៩៧៥ វិស័យអប់រំនៅឧត្តមសិក្សាបានចុះខ្សោយដោយសារសង្គ្រាម ហើយចាប់ពីឆ្នាំ១៩៧៥ ដល់ឆ្នាំ១៩៧៩ វិស័យអប់រំត្រូវរបបប៉ុលពតបំបាត់ចោលទាំងស្រុង ។ ប៉ុន្តែដល់ឆ្នាំ១៩៨០ ក្រោមការដឹកនាំរបស់គណបក្សប្រជាជនកម្ពុជាបានចាប់ផ្តើមកសាងខឿនអប់រំឧត្តមសិក្សាឡើងវិញដោយចាប់ផ្តើមពីបាតដៃទទេរហូតមកដល់សព្វថ្ងៃនេះ ។ រយៈពេល៣០ឆ្នាំកន្លងមកនេះ កម្ពុជាបានធ្វើការកំណែទម្រង់ប្រព័ន្ធឧត្តមសិក្សាគឺពីប្រព័ន្ធម៉ោងធម្មតាមកជាប្រព័ន្ធក្រឌីតវិញនៅតាមគ្រឹះ ស្ថាននានា។ គ្រឹះស្ថានឧត្តមសិក្សានៅកម្ពុជា ចាប់ពីឆ្នាំ១៩៩៧ មកគ្រឹះស្ថានឧត្តមសិក្សាឯកជនមានការរីកចម្រើនរហូតដល់ខេត្តឆ្ងាយដាច់ស្រយាលក៏ត្រូវបានបង្កើតដែរ ៕
ចែករំលែកព័តមាននេះ