ខេត្តបន្ទាយមានជ័យ ៖ នៅថ្ងៃទី២២ ខែកុម្ភៈ ឆ្នាំ២០១៩ វេលាម៉ោង១០និង២០នាទីព្រឹកកម្លាំងនគរបាលស្រុកថ្មពួកដឹកនាំដោយ លោកវរសេនីយ៍ទោ សៅ សារឿន អធិការនគរបាលស្រុកបានធ្វើការពួនស្ទាក់ឃាត់ចាប់បានមុខសញ្ញាចែកចាយគ្រឿងញៀនប្រុសស្រីចំនួន៤នាក់ និងដកហូតវត្ថុតាង ជាបន្តបន្ទាប់ ។
លោកវរសេនីយ៍ទោ សៅ សារឿន អធិការនគរបាលស្រុកថ្មពួកបានឲ្យដឹងថា ជាដំបូងកម្លាំងនគរបាល បានធ្វើការចាប់ឃាត់មុខសញ្ញាចែកចាយគ្រឿងញៀនម្នាក់ ឃាត់នៅចំណុចខាងកើតភូមិអូរកំបុត ចុះពីផ្លវជាតិលេខ58 (ផ្លូវព្រំដែន) ផ្លូវចូលទៅបឹងអំពិលចម្ងាយ២០០០ម៉ែត្រ ឈ្មោះ គឹម ឡុង ភេទប្រុស អាយុ៣២ឆ្នាំរស់នៅភូមិបន្ទាយមានរឹទ្ធិ ឃុំគោករមៀត ស្រុកថ្មពួក ខេត្តបន្ទាយមានជ័យ ក្នុងនោះ ឆែកឆេររកឃើញថ្នាំញៀនចំនួន១៩គ្រាប់ ដែលមានអក្សរ WY ដែលជនសង្ស័យរុំស្កុតពណ៌ខ្មៅទម្លាក់នៅក្បែរខ្លួន ។
ក្រោយពីធ្វើការចាប់ឃាត់ខ្លួន និងសាកសួរចម្លើយ ជនសង្ស័យបានឆ្លើយសារភាពថា ខ្លួនជាអ្នកដឹកជញ្ញូនចែកចាយឲ្យម្តាយក្មេករបស់គេឈ្មោះ ចាន់ ទូច រស់នៅភូមិបន្ទាយមានរឹទ្ធិ ឃុំគោករមៀត ស្រុកថ្មពួក ។ បន្ទាប់មកក៏ឆែកឆេរនៅផ្ទះជនសង្ស័យដែលជាម្តាយក្មេកជនសង្ស័យដើម្បីស្រាវជ្រាវបន្ត ។
លុះដល់ម៉ោង១១ ព្រឹកកម្លាំងក៏ឃាត់ខ្លួនស្ត្រីជាម្តាយក្មេកឈ្មោះ ចាន់ ទូច អាយុ៥១ឆ្នាំ រស់នៅភូមិបន្ទាយមារឹទ្ធិ ឃុំគោករមៀត ស្រុកថ្មពួក ដោយឆែកឆេររកឃើញវត្ថុតាងថ្នាំញៀនដែលមានអក្សរWYចំនួន៤៣គ្រាប់ ពណ៌លឿងចំនួន០២គ្រាប់ ច្រកដបកប់នៅនឹងគុម្ពចេកចម្ងាយពីផ្ទះ៥០ម៉ែត្រ ។
ជាមួយគ្នានោះដែរកម្លាំងនគរបាលស្រុកក៏បានបន្តស្រាវជ្រាវរកបក្ខពួកទៀតទៅតាមចម្លើយសារភាពរបស់ជនសង្ស័យ លុះវេលាម៉ោង១និង៣០នាទីរសៀលនាទីកម្លាំងសមត្ថកិច្ចបានបន្តឃាត់មុខសញ្ញាចែកចាយ និងប្រើប្រាស់បានចំនួន២នាក់ទៀត នៅចំណុចភូមិតាម៉ាំង ឃុំគោករមៀតមាន ឈ្មោះ គឹម ចាន់នូ ភេទស្រី អាយុ១៦ឆ្នាំ រស់នៅភូមិតាម៉ាំង ឃុំគោករមៀត ដកហូតវត្ថុតាងថ្នាំញៀនមានអក្សរWYចំនួន០៧គ្រាប់ លាក់ទុកក្នុងដបជ័រ និងម្នាក់ទៀតឈ្មោះ រឹត សីលា ភេទប្រុស អាយុ២៥ឆ្នាំ ដកហូតវត្ថុតាងថ្នាំញៀនមានអក្សរWYចំនួន០៣គ្រាប់ និងម្សៅក្រាមសថ្លាមួយកញ្ចប់តូចដែលជនសង្ស័យរក្សាទុកនៅនឹងហោប៉ៅខោខាងស្តាំ ។
លោកអធិការនគរបាលស្រុកថ្មពួកបានបញ្ជាក់ថា ជនសង្ស័យប្រុសស្រីទាំង៤នាក់ និងវត្ថុតាងថ្នាំញៀនមេតំហ្វេតាមីនប្រភេទ មានអក្សរ WY សរុបចំនួន៧២គ្រាប់ និងថ្នាំញៀនប្រភេទម្សៅ ពណ៌សថ្លា១កូនថង់តូច ទូរស័ព្ទដៃ២គ្រឿង ដែកកេះ៣ បញ្ជូនទៅការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តដើម្បីរៀបចំសំណុំរឿងបន្តតាមនីតិវិធីច្បាប់ ៕
ចែករំលែកព័តមាននេះ