ខេត្តសៀមរាប ៖ បុរសម្នាក់ព្រោះតែខឹងឪពុកក្មេកស្តីបន្ទោស ខណៈឃើញខ្លួនចាប់ប្រពន្ធបង្ខាំងក្នុងផ្ទះ ស្រាប់តែទាញកាំបិតខ្វែវកាប់ឪពុកក្មេកគ្មានប្រណីដៃ បណ្តាលឱ្យដួលស្លាប់ភ្លាមៗនៅនឹងកន្លែង រួចគេចខ្លួនបាត់ និងបង្កឱ្យមានការភ្ញាក់ផ្អើលពេញភូមិ រហូតដឹងដល់សមត្ថកិច្ចនគរបាលស្រុកអង្គរជុំ ទៅធ្វើអន្តរាគមន៍ភ្លាមៗ ។
ហេតុការណ៍កូនប្រសាកាប់ឪពុកក្មេកស្លាប់នេះ កើតឡើងកាលពីវេលាម៉ោង៧យប់ថ្ងៃទី១៩ ខែកុម្ភៈកន្លងទៅ នៅមុខផ្ទះជនរងគ្រោះក្នុងភូមិគោកត្របែក ឃុំគោកដូង ស្រុកអង្គរជុំ ។ លោកវរសេនីយ៍ឯក ម៉ាន់ សុខាត់ អធិការនគរបាលស្រុកអង្គរជុំ បានឱ្យដឹងថា បុរសជាឪពុកក្មេកដែលរងគ្រោះនេះឈ្មោះ ផន ប្រេម
អាយុ៨៥ឆ្នាំ ចំណែកកូនប្រសាប្រុសឈ្មោះ សាន ចឹក អាយុ៦៥ឆ្នាំ មានស្រុកកំណើតនៅភូមិខ្ជាយ ឃុំសសរស្ដម្ភ ស្រុកពួក បច្ចុប្បន្ននៅភូមិគោកត្របែក ឃុំគោកដូង ស្រុកអង្គរជុំ ។
លោកអធិការបន្តថា មូលហេតុនាំឱ្យកើតមានអំពើហិង្សានេះ គឺខណៈកូនប្រសាឈ្មោះសាន ចឹក ទាស់សម្តីគ្នាជាមួយប្រពន្ធឈ្មោះ សែន អាក់ អាយុ៣៨ឆ្នាំ ដោយសារការប្រចណ្ឌប្រពន្ធរបស់ខ្លួន និងបានឈ្លោះប្រកែកគ្នាមួយសន្ទុះ ហើយក៏ចាប់ប្រពន្ធដាក់ក្នុងផ្ទះបិទទ្វារជិត ។ ពេលនោះ ប្រពន្ធបានលោតចុះពីលើផ្ទះមកដីវិញតាមទ្វារក្រោយ ហើយឪពុកបង្កើតឃើញក៏ស្ដីបន្ទោសកូនប្រសាប្រុស ។
ខណៈនោះ ជននេះខឹងឪពុកក្មេកស្តីឱ្យក៏ចូលទៅក្នុងផ្ទះទាញយកកាំបិតខ្វែវមកកាប់ឪពុកក្មេក ចំនួន៣កាំបិត គឺចំក្បាលផ្នែកខាង ឆ្វេងនិងផ្នែកខាងមុខ និងចំស្មាខាងស្ដាំ បណ្ដាលឱ្យឪពុកក្មេកដួលស្លាប់នៅនឹងកន្លែងមុខផ្ទះរបស់ខ្លួន ។ ពេលកាប់ហើយឃើញឪពុកក្មេកស្លាប់ កូនប្រសាចិត្តសាហាវនេះក៏រត់គេចខ្លួនទៅបាត់ តែម្តង ។
បច្ចុប្បន្ន នគរបាលស្រុកអង្គរជុំកំពុងស្រាវជ្រាវស៊ើបអង្កេតបន្តតាមនីតិវិធី ដើម្បីនាំខ្លួនជនសង្ស័យមកកាត់ទោសទៅតាមផ្លូវច្បាប់ឱ្យខាងតែបាន ។ តាមព័ត៌មានចុងក្រោយឲ្យដឹងថា ពេលនេះកូនប្រសាដៃដល់នោះត្រូវនគរបាលចាប់ខ្លួនបានហើយ កាលពីវេលាម៉ោង១និង៣០នាទីរសៀលថ្ងៃទី២១ ខែកុម្ភៈ នៅតាមដងផ្លូវមួយក្នុងឃុំសសរស្តម្ភ ស្រុកពួក ។ ការចាប់ឃាត់ខ្លួនបាននេះ គឺខណៈជនសង្ស័យកំពុងដើរចេញពីព្រៃមករកបាយអ្នកស្រុកហូប ហើយក្រោយពីឃាត់ខ្លួនក៏បញ្ជូនទៅអធិការដ្ឋាននគរបាលស្រុកដើម្បីសាកសួរ រួចបញ្ជូនបន្តទៅការិយាល័យនគរបាលព្រហ្មទណ្ឌកម្រិតធ្ងន់ និងបញ្ជូនទៅសាលាដំបូងខេត្ត ៕
ចែករំលែកព័តមាននេះ