ប្រទេសស៊ីរី-អាមេរិក ៖ ប៉ុន្មានសប្ដាហ៍ក្រោយការប្រកាស របស់លោកដូណាល់ត្រាំ ពីការដកកងទាហានអាមេរិកចេញពីស៊ីរី សហរដ្ឋអាមេរិក គូសបញ្ជាក់នាថ្ងៃទី២១កុម្ភៈថា ទីបំផុតខ្លួននឹងរក្សាទុកទាហាន២០០នាក់ក្នុងប្រទេសនោះ មួយរយៈពេលទៀត។ នាថ្ងៃទី២១កុម្ភៈអ្នកនាំពាក្យសេតវិមានលោកស្រី…
ប្រទេសស៊ីរី-អាមេរិក ៖ ប៉ុន្មានសប្ដាហ៍ក្រោយការប្រកាស របស់លោកដូណាល់ត្រាំ ពីការដកកងទាហានអាមេរិកចេញពីស៊ីរី សហរដ្ឋអាមេរិក គូសបញ្ជាក់នាថ្ងៃទី២១កុម្ភៈថា ទីបំផុតខ្លួននឹងរក្សាទុកទាហាន២០០នាក់ក្នុងប្រទេសនោះ មួយរយៈពេលទៀត។
នាថ្ងៃទី២១កុម្ភៈអ្នកនាំពាក្យសេតវិមានលោកស្រី SARAH SANDERS គូសបញ្ជាក់ថា ក្រុមរក្សាសន្តិភាពតូចមួយ មានទាហានអាមេរិកប្រមាណជា២០០នាក់ នឹងស្ថិតនៅស៊ីរីមួយរយៈពេលទៀត។ សេចក្ដីថ្លែងការណ៍នោះ ដែលពុំមានការបញ្ជាក់ដទៃៗទៀត កើតមានក្រោយការទាក់ទងគ្នាតាមទូរស័ព្ទ រវាងលោកដូណាល់ត្រាំនិងប្រធានាធិបតីតួកគី លោករីសុីបតៃយីបអ័រដូហ្គាន។
កាលពីសប្ដាហ៍មុន អធិការបតីអាល្លឺម៉ង់លោកស្រីអេនចឺឡាម័រកែល បានចោទជាសំនួរថា តើនោះជាគំនិតល្អមួយឬ ដែលអាមេរិកប្រញាប់ប្រញាល់ដកកងទាហានរបស់ខ្លួនចេញពីស៊ីរី? លោកស្រីយល់ថា បែបនោះអាចឲ្យរុស្សុីនិងអីុរ៉ង់ ពង្រឹងឥទ្ធិពលរបស់ពួកគេក្នុងប្រទេសនេះ។
ការចាកចេញរបស់កងទាហានអាមេរិកចេញពីស៊ីរីត្រូវធ្វើ នាប៉ុន្មានសប្ដាហ៍ខាងមុខនេះ ខណៈដែលក្រុមរដ្ឋអ៊ិស្លាម កំពុងឈានទៅរកការរលំរលាយ ក្នុងទីតាំងចុងក្រោយរបស់គេនៅភាគខាងកើតស៊ីរី។ ដោយសន្យាបន្តប្រតិបត្តិការប្រឆាំងភេរវកម្ម ក្រុងវ៉ាស៊ិនតោនបានស្នើដល់បណ្ដាសម្ព័ន្ធ មិត្តក្នុងផ្ទៃក្រុមចម្រុះប្រឆាំងពួកជីហាដ បង្កើតជាកម្លាំងអ្នកសង្កេតកាណ៍មួយ នាភាគឦសានស៊ីរី ដើម្បីធានាសន្តិសុខរបស់សម្ព័ន្ធមិត្តឃើតស៊ីរី ដែលជាអ្នកប្រយុទ្ធនៅលើដី ប្រឆាំងពួកជីហាដនៅស៊ីរី ហើយកំពុងរងការគំរាមកំហែងវាយប្រហារពីសំណាក់កងទ័ពតួកគី៕
ចែករំលែកព័តមាននេះ