រាជធានីភ្នំពេញ ៖ សមាគមទេសចរណ៍អាស៊ីប៉ាស៊ីហ្វិក(PATA) នឹងរៀបចំជំនួបធុរជនក្នុងវិស័យទេសចរណ៍ធំមួយនៅរាជធានីភ្នំពេញនិងខេត្តសៀមរាប ក្នុងខែមេសា ឆ្នាំ២០១៩ខាងមុខនេះ ដើម្បីទាក់ទាញអ្នកទេសចរអន្តរជាតិ មកទស្សនាប្រទេសកម្ពុជាកាន់តែច្រើនថែមទៀត។ ប្រធានសមាគមទេសចរណ៍អាស៊ីប៉ាស៊ីហ្វិក លោក…
រាជធានីភ្នំពេញ ៖ សមាគមទេសចរណ៍អាស៊ីប៉ាស៊ីហ្វិក(PATA) នឹងរៀបចំជំនួបធុរជនក្នុងវិស័យទេសចរណ៍ធំមួយនៅរាជធានីភ្នំពេញនិងខេត្តសៀមរាប ក្នុងខែមេសា ឆ្នាំ២០១៩ខាងមុខនេះ ដើម្បីទាក់ទាញអ្នកទេសចរអន្តរជាតិ មកទស្សនាប្រទេសកម្ពុជាកាន់តែច្រើនថែមទៀត។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍នៅក្នុងពិធីប្រកាសជាផ្លូវការនៃជំនួបពាណិជ្ជកម្មទេសចរណ៍លើកទី២ កាលពីល្ងាចថ្ងៃទី១៩ កុម្ភៈ កន្លងមកថា ជំនួបពាណិជ្ជកម្មទេសចរណ៍នេះ នឹងធ្វើឡើងនៅខេត្ដសៀមរាប ដោយមានក្រុមហ៊ុនប្រតិបត្តិករទេសចរណ៍ មកពីជាង៨០ប្រទេសនៅលើពិភពលោកចូលរួម ។ លោកបន្តថា វាជាព្រឹត្តិការណ៍ជួបគ្នារវាងអ្នកលក់ និងអ្នកទិញដោយខេត្ដសៀមរាប ធ្វើឡើងនៅថ្ងៃទី២៤ ខែមេសា ឆ្នាំ២០១៩ និងនៅភ្នំពេញធ្វើឡើងនៅថ្ងៃទី២៧ ខែមេសា ឆ្នាំ២០១៩ ។ គម្រោងនេះធ្វើឡើងនៅក្នុងកិច្ចពិភាក្សាពិគ្រោះយោបល់ ជាមួយប្រតិបត្ដិករទេសចរណ៍មកពីតាមបណ្ដាម្ចាស់សណ្ឋាគារ ផ្ទះសំណាក់ និងក្រុមហ៊ុនទេសចរណ៍ ដោយបានសហការជាមួយសហព័ន្ធទេសសចរណ៍ និងប្រតិបត្ដិទេសចរណ៍គ្រប់វិស័យនៅកម្ពុជាផងដែរ ។
លោកក៏បាអំពាវនាវដល់ក្រុមប្រតិបត្ដិករទេសចរណ៍ទាំងអស់នៅកម្ពុជា ចូលរួមនៅក្នុងពិព័រណ៍ពាណិជ្ជកម្មកម្ពុជាអន្ដរជាតិនេះ ដែលលោកថានេះជាលើកទី២ហើយនៅប្រទេសកម្ពុជា ។ ក្រុមប្រតិបត្តិករទេសចរណ៍បានលើកឡើងស្រដៀងគ្នាថា ពួកគេបានគាំទ្រចំពោះការធ្វើជំនួបពាណិជ្ជកម្មទេសចរណ៍នេះ ព្រោះការធ្វើកន្លងមកបានទទួលលទ្ធផលជោគជ័យ ដែលមានកំណើនភ្ញៀវទេសចរមកកាន់ប្រទេសកម្ពុជា កាន់តែច្រើនជាបន្ដបន្ទាប់។ ពួកគេបានបន្ដថា ចាប់ពីខែមេសាទៅជារដូវកាលមិនសូវសម្បូរភ្ញៀវ ដូច្នេះក្រុមអ្នកប្រតិបត្ដិករទេសចរណ៍ រូមគ្នារៀបស្វែងរកភ្ញៀវទេសចរឲ្យស្គាល់ប្រទេសកម្ពុជា ជាពិសេសប្រាសាទអង្គរវត្ដឲ្យកាន់តែច្រើន ។
ប្រធានក្រុមហ៊ុនទេសចរណ៍មកពីប្រទេសឥណ្ឌាមួយរូបលើកឡើងថា ភ្ញៀវទេសចរមកពីប្រទេសឥណ្ឌា មានការកើនឡើងជាបន្ដបន្ទាប់ បើទោះបីរដូវកាលមិនសម្បូរភ្ញៀវក៏ដោយ ដោយលោកថា រយៈពេល៣ឆ្នាំមកនេះ កម្ពុជាទទួលភ្ញៀវពីប្រទេសឥណ្ឌាប្រមាណ២ពាន់នាក់ និងនៅពាក់កណ្ដាលខែសីហាខាងមុខ ជនជាតិឥណ្ឌាគ្រោងនឹងមកទស្សនានៅកម្ពុជាបន្ថែមទៀត ។ កម្ពុជាបានព្យាករណ៍ថា ក្នុងឆ្នាំ២០២៣ខាងមុខ កម្ពុជានឹងទទួលទេសចរចិនបាន ៣លាននាក់ ហើយឆ្នាំ២០២៥ទទួលទេសចរចិនបាន៥លាននាក់ ក្នុងចំនួនទេសចរសរុប១១លាននាក់ និងឆ្នាំ២០៣០ ទទួលទេសចរចិនបាន៨លាននាក់ ក្នុងចំនួនទេសចរសរុប១៥លាននាក់ ៕
ចែករំលែកព័តមាននេះ