សិង្ហបុរី៖ ភ្នាក់ងារសារព័ត៌មាន The Business Times បានឲ្យដឹងកាលពីថ្ងៃពុធ កន្លងមកនេះថា តម្លៃផ្ទះក្នុងប្រទេសសិង្ហបុរីមិនអាចកើនឡើងវិញខ្លាំងទេបន្ទាប់ពីរដ្ឋាភិបាលចេញវិធានការកាត់បន្ថយហានិភ័យក្នុងវិស័យអចលនទ្រព្យនៅពាក់កណ្តាលឆ្នាំ ២០១៨ ។…
សិង្ហបុរី៖ ភ្នាក់ងារសារព័ត៌មាន The Business Times បានឲ្យដឹងកាលពីថ្ងៃពុធ កន្លងមកនេះថា តម្លៃផ្ទះក្នុងប្រទេសសិង្ហបុរីមិនអាចកើនឡើងវិញខ្លាំងទេបន្ទាប់ពីរដ្ឋាភិបាលចេញវិធានការកាត់បន្ថយហានិភ័យក្នុងវិស័យអចលនទ្រព្យនៅពាក់កណ្តាលឆ្នាំ ២០១៨ ។
លោក Andrew Lim ដែលជានាយកផ្នែកហិរញ្ញវត្ថុនៃក្រុមហ៊ុន CapitaLand បាននិយាយក្នុងបទសម្ភាសន៍មួយជាមួយនឹង Bloomberg Television កាលពីថ្ងៃពុធថា «ប្រសិនបើពួកយើងមើលឃើញតម្លៃផ្ទះកើនឡើងបាន ៥%ខ្ញុំគិតថាវាជាឆ្នាំល្អហើយសម្រាប់ទីផ្សារផ្ទះសិង្ហបុរី» ។
គួរបញ្ជាក់ផងដែរថា តម្លៃផ្ទះសិង្ហបុរីបានធ្លាក់ចុះជាលើកដំបូងក្នុងរយៈពេល ៦ត្រីមាសមកនេះកាលពីត្រីមាសចុងក្រោយនាឆ្នាំមុន ។
កាលពីខែកក្កដា រដ្ឋាភិបាលសិង្ហបុរីបានបង្កើនពន្ធឯកសារ និងរឹតបន្តឹងការផ្តល់កម្ចីទិញផ្ទះដើម្បីកាត់បន្ថយហានិភ័យក្នុងវិស័យនេះ ។ មុនពេលរដ្ឋាភិបាលចេញវិធានការនេះ ទីផ្សារមើលឃើញមានការដេញថ្លៃដីដ៏ប្រកួតប្រជែងរវាងក្រុមហ៊ុនអចលនទ្រព្យ និងមានកំណើនការលក់អគារទាំងមូលផងដែរ ។
លោក Lim បានបន្ថែមថា «ពួកយើងយល់ស្របថានឹងមិនមានឧបសគ្គធំៗកើតមានឡើងក្នុងពេលឆាប់ៗនេះទេ» ។
គួរបញ្ជាក់ផងដែរថា ប្រាក់ចំណេញរបស់ក្រុមហ៊ុន CapitaLand បានកើនឡើង ៧១% មកស្មើ ៤៧៥.៧លានដុល្លារកាលពីត្រីមាសចុងក្រោយនាឆ្នាំមុនព្រោះមានការជំរុញពីការលក់ និងការរង្វាយតម្លៃអចលនទ្រព្យផងដែរ។
កាលពីខែមុន ក្រុមហ៊ុនអចលនទ្រព្យនេះបានទិញ Ascendas និង Singbridge ដែលធ្វើឲ្យអចលនទ្រព្យក្រោមការគ្រប់គ្រងរបស់ពួកគេកើនឡើងមកស្មើច្រើនជាង៨៥ប៊ីលានដុល្លារទៅទៀតក្នុងទីក្រុងទាំងអស់ ១៨០ទីក្រុងក្នុងប្រទេសចំនួន ៣២ ៕
ប្រភព ៖ The Business Times
ចែករំលែកព័តមាននេះ