រាជធានីភ្នំពេញ ៖ រោងស្នាក់នៅនិងជាកន្លែងផ្ទុកគ្រឿងបន្លាស់រថយន្តក្រុងរបស់ក្រុមហ៊ុនភ្នំពេញពេញចិត្តដឹកអ្នកដំណើរបានត្រូវភ្លើងឆាបឆេះយ៉ាងសន្ធោសន្ធៅ ដែលសង្ស័យបណ្ដាលមកពីឆ្លងចរន្តអគ្គិសនី ។ ហេតុការណ៍នេះ បង្កឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី២១ ខែកុម្ភៈ នៅចំណុចខាងក្រោយឆៀងខាងជើងសាលាខណ្ឌសែនសុខ…
រាជធានីភ្នំពេញ ៖ រោងស្នាក់នៅនិងជាកន្លែងផ្ទុកគ្រឿងបន្លាស់រថយន្តក្រុងរបស់ក្រុមហ៊ុនភ្នំពេញពេញចិត្តដឹកអ្នកដំណើរបានត្រូវភ្លើងឆាបឆេះយ៉ាងសន្ធោសន្ធៅ ដែលសង្ស័យបណ្ដាលមកពីឆ្លងចរន្តអគ្គិសនី ។ ហេតុការណ៍នេះ បង្កឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី២១ ខែកុម្ភៈ នៅចំណុចខាងក្រោយឆៀងខាងជើងសាលាខណ្ឌសែនសុខ ស្ថិតតាមផ្លូវលេខ៤៩៩ ភូមិរោងចក្រ សង្កាត់គោកឃ្លាង ខណ្ឌសែនសុខ ។
ប្រភពពីបុរសម្នាក់ជាព្រូរថយន្តដែលស្នាក់នៅក្នុងកន្លែងកើតហេតុខាងលើ បានរៀបរាប់ថា នាយប់នោះខណៈរូបគាត់និងអ្នកបើកបររថយន្តជាច្រើននាក់ទៀតកំពុងដេកលង់លក់នៅក្នុងយានដ្ឋានខាងលើ ស្រាប់តែមានអ្នកបើកបររថយន្តដែលដេកក្បែរគាត់ដាស់គាត់សួរថា មានឆេះអី ព្រោះធុំក្លិនឈ្ងៀមខ្លាំងណាស់ ។
ភ្លាមៗនោះ គាត់បានងើបដើររកមើលស្រាប់តែឃើញមានអណ្ដាតភ្លើងឆេះយ៉ាងសន្ធោសន្ធៅលាយឡំនឹងផ្សែងខ្មួល នៅរោងស្នាក់នៅនិងជាកន្លែងស្តុកគ្រឿងបន្លាស់រថយន្តដែលគ្មានអ្នកដេកនៅខាងក្នុង ។ ពេលនោះគាត់ក៏បានស្រែកឆោឡោឡើង បង្កឲ្យមានការភ្ញាក់ផ្អើលដល់អ្នកបើកបររថយន្តផ្សេងៗទៀត នាំគ្នាទាញទុយោបាញ់ទឹកពន្លត់ ខ្លះទៀតនាំគ្នាជញ្ជូនសម្ភារជួសជុលរថយន្តចេញទៅខាងក្រៅ ។ ប៉ុន្តែដោយមិនអាចគ្រប់គ្រងស្ថានការណ៍បាន ពួកគាត់ក៏រាយ ការណ៍ជូនសមត្ថកិច្ចមូលដ្ឋាន និងខាងរថយន្តពន្លត់អគ្គិភ័យឱ្យមកជួយអន្តរាគមន៍ ។
បន្ទាប់មក សមត្ថកិច្ចមូលដ្ឋានរួមទាំងរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ បានមកដល់កន្លែងកើតហេតុចំនួន៧គ្រឿង ហើយធ្វើការបាញ់ពន្លត់អណ្តាតភ្លើងដែលកំពុងឆាបឆេះរោងអស់ទឹកចំនួន៤រថយន្ត ទើបរលត់ទៅវិញជាស្ថាពរនៅវេលាម៉ោង១២និង៤០នាទីរំលងអធ្រាត្រថ្ងៃដដែល ។
ប្រភពពីសមត្ថកិច្ចបានឱ្យដឹងថា ហេតុការណ៍ខាងលើនេះមិនបង្កឲ្យមានអ្នករងរបួសឬក៏ឆេះរាលដាលដល់ផ្ទះអ្នកជិតខាងទេ គឺខូចខាតតែ រោងទំហំប្រមាណ៥ម៉ែត្រគុណនឹង១៥ម៉ែត្រ ដែលបាំងសង្ក័សីឆេះអស់ទាំងស្រុង និងគ្រឿងបន្លាស់រថយន្ត រួមទាំងឧបករណ៍និងសម្ភារ សម្រាប់ជួសជុលរថយន្តមួយចំនួនធំទៀត។ ករណីអគ្គិភ័យខាងលើនេះ ជំហានដំបូងសមត្ថកិច្ចសន្និដ្ឋានថា បណ្ដាលមកពីឆ្លងចរន្តអគ្គិសនី ។
ចែករំលែកព័តមាននេះ