ស្រុកស្ទោង ៖ លោក ជា ចាន់តូ សមាជិកអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជានិងជាប្រធានក្រុមការងារថ្នាក់ជាតិចុះជួយស្រុកស្ទោងបានថ្លែងថា៖ បន្ទាប់ពីប្រទេសជាតិមានសុខសន្តិភាពពេញលេញការងារអប់រំជាវិស័យអាទិភាពរបស់រាជរដ្ឋាភិបាលនៅក្នុងការរួមចំណែកអភិវឌ្ឍន៍សេដ្ឋកិច្ចជាតិ និងការអភិវឌ្ឍប្រទេស ។
នេះជាការលើកឡើងរបស់លោក ជា ចាន់តូ នៅក្នុងឱកាសសម្ពោធដាក់ឲ្យប្រើប្រាស់អគារសិក្សាថ្មី១ខ្នង៦បន្ទប់ និងពិធីបញ្ចុះបឋមសិលាកសាងអគារសិក្សាថ្មី១ខ្នង កម្ពស់២ជាន់ស្មើ១២បន្ទប់បន្ថែមដល់វិទ្យាល័យហ៊ុន សែន ចំណារលើ ស្ថិតនៅក្នុងឃុំចំណារលើ ស្រុកស្ទោង ខេត្តកំពង់ធំ នៅថ្ងៃទី២១ កុម្ភៈ ឆ្នាំ២០១៩នេះ។
លោក ជា ចាន់តូ បានបញ្ជាក់ទៀតថា ៖ ដើម្បីឲ្យអប់រំរឹងមាំ និងមានសមត្ថភាពគ្រប់គ្រាន់នៅក្នុងការបណ្ដុះបណ្ដាលធនធានមនុស្សប្រកបដោយថាមពល និងចំណេះដឹងពិតប្រាកដនោះយើងត្រូវរួមគ្នាកសាងអគារសិក្សាឲ្យគ្រប់ច្រកល្ហកទូទាំងប្រទេស ដើម្បីឲ្យធនធានដែលជាអ្នកបន្តវេន ពិសេសកូនចៅប្រជាពលរដ្ឋបានចូលរៀនគ្រប់ៗគ្នា។
ជាក់ស្ដែងសមិទ្ធផលក្នុងវិស័យអប់រំដែលយើងរួមគ្នាសម្រេចជាបន្តបន្ទាប់នៅទូទាំងប្រទេសនេះស្ដែងចេញពីការខិតខំនិងការយកចិត្តទុកដាក់ពីរាជរដ្ឋាភិបាល ពិសេសសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលបំណងបង្ខិតសាលារៀនឲ្យនៅកាន់តែជិតបំផុតនឹងសិស្សានុសិស្សដើម្បីឲ្យពួកគេកាន់តែងាយស្រួល និងមានរឹតតែមានឱកាសរៀនសូត្រដូចសិស្សទាំងផ្សេងៗទៀតតាមបំណងប្រាថ្នា ។ ដូចនេះអ្វីដែលសំខាន់ចំពោះមុខ គឺសិស្សម្នាក់ៗត្រូវខិតខំរៀនសូត្រដើម្បីឲ្យក្លាយជាធនធានមនុស្សប្រកបដោយសមត្ថភាពសម្រាប់បន្តវេន និងរួមការអភិវឌ្ឍសេដ្ឋកិច្ចជាតិឲ្យកាន់រីកចម្រើនថែមទៀត ។
ទោះជាយ៉ាងនេះក៏ដោយលោក ជា ចាន់តូ ក៏នៅតែស្នើឲ្យប្រជាពលរដ្ឋយើងត្រូវរួមសាមគ្គីគ្នាបន្តថែរក្សាការពារសមិទ្ធផលបានកសាងហើយ ពិសេសសុខសន្តិភាពដែលមានសព្វឲ្យបានគង់វង្ស ទើបផែនការអភិវឌ្ឍជាតិរបស់រាជរដ្ឋាភិបាលសម្រេចបានតាមគោលដៅ ។ ព្រោះថា សុខសន្តិភាពគឺជាមូលដ្ឋានគ្រឹះដ៏រឹងមាំដែលផ្ដល់ឱកាសឲ្យយើងអាចអភិវឌ្ឍប្រទេស និងមានអ្វីគ្រប់យ៉ាង ព្រមទាំងរស់នៅសុខសាន្តដូចសព្វថ្ងៃនេះ ។ ជាមួយនេះដែរ ក៏ត្រូវបន្តគាំទ្រចំពោះគោលនយោបាយរាជរដ្ឋាភិបាលដែលដឹកនាំដោយសម្ដេចតេជោ ហ៊ុន សែន បន្តទៀត ដើម្បីភាពរីកចម្រើនរបស់សង្គមជាតិនិងនាំប្រទេសជាតិ ស្ថិតក្នុងសុខសន្តិភាព និងសម្បូររុងរឿង ។
សូមបញ្ជាក់ថា អគារសិក្សាថ្មី១ខ្នង៦បន្ទប់ និងអគារសិក្សាថ្មី១ខ្នងកម្ពស់២ជាន់ស្មើ១២បន្ទប់ដែលបញ្ចុះបឋមសិលាកសាងបន្ថែមដល់វិទ្យាល័យហ៊ុន សែន ចំណារលើនាពេលនេះគឺ អំណោយដ៏សប្បុរសធម៌របស់សម្ដេចតេជោហ៊ុន សែន និង សម្ដេចកិត្តិព្រឹទ្ធបណ្ឌិតតាមរយៈលោកជា ចាន់តូ និងលោកជំទាវដែលជាកាឆ្លើយតបទៅនឹងកំណើនសិស្ស និងការរីកចម្រើនក្នុងតំបន់នេះផងដែរ ៕ ដោយសហការ
ចែករំលែកព័តមាននេះ