អស់ពីជាមួយចិនពេលនេះអាមេរិកចង់បង្កាត់ភ្លើងសង្គ្រាមពាណិជ្ជកម្មជាមួយសហភាពអឺរ៉ុប
រដ្ឋធានីវ៉ាស៊ីនតោន ៖ យោងតាមភ្នាក់ងារសារព័ត៌មាន Channel News Asia កាលពីថ្ងៃទី២១ កុម្ភៈ កន្លងមកបានឲ្យដឹងថា លោកប្រធានាធិបតី…
រដ្ឋធានីវ៉ាស៊ីនតោន ៖ យោងតាមភ្នាក់ងារសារព័ត៌មាន Channel News Asia កាលពីថ្ងៃទី២១ កុម្ភៈ កន្លងមកបានឲ្យដឹងថា លោកប្រធានាធិបតី ដូណាល់ ត្រាំ (Donald Trump) របស់សហរដ្ឋអាមេរិកបានគម្រាមកាលពីថ្ងៃពុធ ថានឹងដាក់ពន្ធលើការនាំចូលយានយន្តពីអឺរ៉ុប ប្រសិនបើលោកមិនអាចសម្រេចបានកិច្ចព្រមព្រៀងពាណិជ្ជកម្មមួយជាមួយនឹងសហភាពអឺរ៉ុប (EU) ទេនោះ ។
ការគម្រាមកំហែងថ្មីរបស់លោក ត្រាំ នេះកើតមានឡើងពីរថ្ងៃបន្ទាប់ពីក្រសួងពាណិជ្ជកម្មអាមេរិកផ្ញើរបាយការណ៍មួយដែលប្រទះឃើញថា រថយន្តដែលនាំចូលពីអឺរ៉ុបផ្តល់ការគំរាមកំហែងដល់សន្តិសុខជាតិរបស់សហរដ្ឋអាមេរិក ។ របាយការណ៍ខាងលើអាចអនុញ្ញាតឲ្យ White House ដាក់ពន្ធក្នុងរយៈពេល៩០ថ្ងៃ ប៉ុន្តែសហភាពអឺរ៉ុបបានសន្យាថា នឹងឆ្លើយតបវិញ ប្រសិនបើកើតមានឡើងពិតមែន ។
សហរដ្ឋអាមេរិកបានប្រើសន្តិសុខជាតិដើម្បីដាក់ពន្ធលើការនាំចូលដែកថែប និងអាលុយមីញ៉ូមរួចទៅហើយ ដែលបង្កឲ្យ EU កាណាដា ម៉ិកសិក និងប្រទេសចិនឆ្លើយតបជាមួយនឹងការដាក់ពន្ធលើផលិតផលអាមេរិកវិញ ។
លោកប្រធានាធិបតី ត្រាំ បានគម្រាមថា នឹងដាក់ពន្ធ ២៥% លើយានយន្តដែលនាំចូលពីប្រទេសអឺរ៉ុប ជាពិសេសអាល្លឺម៉ង់ដែលលោកបាននិយាយថា បង្កការប៉ះពាល់ដល់វិស័យរថយន្តអាមេរិក ។
យ៉ាងណាក្តី លោកប្រធានាធិបតីខាងលើបានព្រមព្រៀងគ្នាក្នុងការផ្អាកការដាក់ពន្ធលើ EU បន្ទាប់ពីមានកិច្ចប្រជុំមួយកាលពីខែកក្កដាមុនជាមួយនឹងប្រធានគណៈកម្មាធិការអឺរ៉ុប Jean-Claude Juncker ប៉ុន្តែលោក ត្រាំ បានបង្ហាញថា លោកមិនពេញចិត្តនឹងស្ថានការនៃការចរចានេះឡើយ ។
លោកប្រធានាធិបតី ត្រាំ បាននិយាយថា «ពួកយើងកំពុងតែព្យាយាមសម្រេចឲ្យបានកិច្ចព្រមព្រៀងមួយ ។ ពួកគេពិតជាពិបាកក្នុងការសម្រេចកិច្ចព្រមព្រៀងជាមួយណាស់» ។ ប៉ុន្តែការចរចាជាមួយ EU មិនទាន់បានចាប់ផ្តើមទេ ។ គណៈកម្មាធិការអឺរ៉ុបត្រូវទទួលបានការអនុញ្ញាតពីសមាជិកលើការចរចាសិនមុននឹងអាចចាប់ផ្តើមការចរចាបាន ។
ភាគីទាំងសងខាងមានការខ្វែងគំនិតគ្នាលើបញ្ហាមួយចំនួនដូចជាសហរដ្ឋអាមេរិកមានគោលដៅចង់ចរចាពីវិស័យកសិកម្ម ខណៈដែល EU ប្រឆាំង និងចង់ឲ្យការចរចាផ្តោតសំខាន់តែលើផលិតផលឧស្សាហកម្ម និងនិយ័តកម្មប៉ុណ្ណោះ ៕
ប្រភព ៖ Channel News Asia
ចែករំលែកព័តមាននេះ