ដោយដកស្រង់តួលេខផ្លូវការទាំងឡាយ និងប្រភពឯករាជ្យនានាសេចក្តីរាយការណ៍មួយកាលពីថ្ងៃទី២ មករា និយាយថា ជម្លោះនៅអាហ្វហ្គានីស្ថាន បណ្តាលឱ្យមនុស្សស្លាប់ជាង១០.០០០នាក់ ក្នុងឆ្នាំ២០១០ ក្នុងនោះ២០% ជាជនស៊ីវិល ។ យោងតាមតួលេខចេញផ្សាយកាលពីយប់ថ្ងៃទី២ មករា ដោយក្រសួងមហាផ្ទៃអាហ្វហ្គានី
ស្ថានថា មនុស្សចំនួន៨.៥៦០នាក់ ជាជនស៊ីវិល ប៉ូលិស និងពួកបះបោរបានត្រូវស្លាប់នាឆ្នាំ២០១០ ក្នុងអំពើហិង្សាទាំងឡាយទាក់ទិនទៅនឹងជម្លោះដែលកើតមានចាប់តាំងពីឆ្នាំ២០០១ មករវាងកងកំលាំងបរទេសរួមនឹងកងកំលាំងអាហ្វហ្គានីស្ថាន និងពួកបះបោរតាលីបង់ ។ ចំណែកក្រសួងការពារប្រទេសអាហ្វហ្គានីស្ថានគូសបញ្ជាក់ថា ទាហានអាហ្វហ្គានីស្ថាន៨១០នាក់ ស្លាប់ក្នុងឆ្នាំ២០១០ ។ យោងតាមបណ្តាញអ៊ីនធើរណេតមួយថា ប្រតិបត្តិការយោធានៅអាហ្វហ្គានីស្ថាន បណ្តាលឱ្យទាហានបរទេសស្លាប់៧១១នាក់ ក្នុងឆ្នាំ២០១០ ដែលជាឆ្នាំបាត់បង់មនុស្សធ្ងន់ធ្ងរបំផុតសំរាប់កងកំលាំងចំរុះដឹកនាំដោយសហរដ្ឋអាមេរិក ។
យោងតាមអ្នកនាំពាក្យរបស់ក្រសួងមហាផ្ទៃអាហ្វហ្គានីស្ថានលោកហ្សឺម៉ារ៉ៃ បាសារី ថា ជនស៊ីវិល២.០៤៣នាក់ ស្លាប់ក្នុងឆ្នាំ២០១០ទាំងដោយសារការវាយប្រហាររបស់ពួកបះបោរទាំងដោយក្នុងពេលធ្វើប្រតិបត្តិការយោធាប្រឆាំងការបះបោរ ។
តួលេខនេះនៅទាបជាងតួលេខរបស់ អ.ស.ប ដែលវាយតំលៃក្នុងរបាយការណ៍មួយ កាលពីខែធ្នូ ថា ជនស៊ីវិលអាហ្វហ្គានីស្ថានដល់ទៅ២.៤១២នាក់ ស្លាប់រវាងពីខែមករា ទៅខែតុលា ២០១០ ដែលមានការកើនឡើង២០% បើប្រៀបធៀបទៅនឹងដំណាក់កាលដូចគ្នានេះ នៃឆ្នាំ២០០៩ ។ អ.ស.ប ពុំបានផ្សាយពីតួលេខពេញមួយឆ្នាំឡើយ ។
លោកបាសារី បន្តថា ប៉ូលិស១.២៩២នាក់ស្លាប់ក្នុងឆ្នាំ២០១០ ចំណែកពួកបះបោរ៥.២២៥នាក់ត្រូវស្លាប់ ៕
ចែករំលែកព័តមាននេះ