រាជធានីភ្នំពេញ ៖ ករណីឆេះផ្ទះបោះពុម្ពសៀវភៅបង្កឲ្យស្ត្រីជាគ្រូបង្រៀនជនជាតិចិនចំនួនបួននាក់បានរងរបួស បន្ទាប់ពីមានការភ័យស្លន់ស្លោ បានសម្រេចចិត្តលោតចេញពីក្នុងអគារជាន់ទី៤ តាមបង្អួចចុះមកខាងក្រោម ខណៈពេលកំពុងមានអគ្គិភ័យឆាបឆេះនៅជាន់ផ្ទាល់ដីបង្កឲ្យមានការភ្ញាក់ផ្អើលយ៉ាងខ្លាំងដល់ប្រជាជនពលរដ្ឋ និងរថយន្តពន្លត់អគ្គិភ័យចុះមកធ្វើការអន្តរាគមន៍ កាលពីវេលាម៉ោង១និង១០នាទី រំលងអធ្រាត្រឈានចូលថ្ងៃទី២២ ខែកុម្ភៈ ឆ្នាំ២០១៩ ត្រង់ចំណុចសាកលវិទ្យាល័យខេមរៈ តាមបណ្ដោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
តាមសម្តីពីបុរសម្នាក់ឈ្មោះ បា សាវឿន អាយុ៤០ឆ្នាំ ជាបុគ្គលិក និងស្នាក់ក្នុងសាកលវិទ្យាល័យខាងលើ បានរៀបរាប់ប្រាប់ឲ្យដឹងថា នៅមុនពេលកើតហេតុគាត់ និងប្រពន្ធរួមទាំងកូនប្រុសស្រីរបស់គាត់ចំនួន៤នាក់បានសម្រាកនៅក្នុងបន្ទាប់ជាន់ផ្ទាល់ដី ផ្នែកខាងក្រោយនៃអគារសាកលវិទ្យាល័យដែលជាកន្លែងកើតហេតុ ។ ដោយឡែកនារីចំនួន៧នាក់ទៀតដែលនៅក្នុងមានជនជាតិចិនចំនួន៤នាក់ជាគ្រូបង្រៀន និងជនជាតិខ្មែរចំនួន៣ទៀតជាបុគ្គលិក បានសម្រាកនៅឯជាន់ខាងលើ ។ លុះរហូតដល់វេលាកើតហេតុខណៈពេលដែលពួកគាត់កំពុងតែសម្រាកលង់លក់ស្រាប់តែប្រពន្ធរបស់គាត់បានដាស់គាត់អោយក្រោក ព្រោះមានលឺសឡេងផ្ទុះចេញមកពីខាងក្រៅបន្ទប់ដែលជាកន្លែងបោះពុម្ពសៀវភៅ ។
ភ្លាមៗនោះគាត់ក៏បានងើបចេញមកមើល ស្រាប់តែឃើញប្រអប់ប៉ារ៉ែតអគ្គិសនីបានផ្ទុះបែកជាផ្កាភ្លើងបង្កឲ្យឆាបឆេះចេញជាអណ្ដាតភ្លើងគាត់ក៏ស្រែកឆោឡោ និងប្រញាប់ប្រញាល់នាំប្រពន្ធ និងកូនចេញពីកន្លែងកើតហេតុទៅខាងក្រៅអគារសាកលវិទ្យាល័យ ។ អណ្តាតភ្លើងក៏បានឆេះរាលដលកាន់តែខ្លាំងឡើងៗបង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរកន្លែងកើតហេតុ ។ ប្រជាពលរដ្ឋក៏បានរាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យអោយចុះមកជួយធ្វើការអន្តរាគមន៍ផងដែរ។
ប្រភពដដែលបន្តថា ភ្លាមៗនេះក៏ឃើញនារីជាបុគ្គលិកជនជាតិខ្មែរដែលស្នាក់នៅក្នុងអគារសាកលវិទ្យាល័យខាងលើបានរត់មកខាងក្រៅដោយសុវត្ថិភាព ចំណែកឯនារីជាជនជាតិចិនចំនួន៤នាក់ទៀត គឺមិនឃើញរត់ចេញមកនោះទេ ។ មួយសន្ទុះក្រោយមក ខណៈពេលអណ្ដាតភ្លើងកំពុងតែឆាបឆេះកាន់តែខ្លាំង រួមទាំងផ្សែងបានហុយខ្មួលខ្មាញ់ពេញអគារក៏ស្រាប់តែឃើញស្ត្រីជាជនជាតិចិនទាំងបួននាក់នោះបានអើតចេញមកតាមបង្អួចជាន់ទី៤ ដោយស្រែកដង្ហោយហៅអោយគេឯងជួយ និងបម្រុងលោតចុះមកខាងក្រោមតែត្រូវប្រជាពលរដ្ឋស្រែកហាមឃាត់ ។
ភ្លាមៗមានរថយន្តពន្លត់អគ្គិភ័យរបស់ស្នងការនគរបាលរាជធានីបានមកដល់កន្លែងកើតហេតុក៏បានធ្វើការបាញ់ទឹកពន្លត់តែម្តង ប៉ុន្តែគ្មានជណ្តើរសម្រាប់ឡើងទៅជួយសង្គ្រោះយកស្ត្រីរងគ្រោះទាំង៤នាក់ខាងលើនោះទេ ។ លុះរហូតដល់ម៉ោង១និង៣៥នារីរំលងអធ្រាត្រថ្ងៃដដែល ដោយភាពភ័យខ្លាចរបស់ជនរងគ្រោះទើបបណ្តាលឲ្យស្ត្រីរងគ្រោះចំនួន២នាក់បានសម្រេចចិត្តលោតចេញតាមបង្អួចពីជាន់ទី៤ចុះទៅទើរនៅវេរង់ដាជាន់ទី២ និងបន្តលោតចុះមកជាន់ផ្ទាល់ដីជាបន្តបន្ទាប់គ្នា បណ្តាលអោយរងរបួសស្រាលទាំងពីរនាក់ត្រូវបានរថយន្តសង្គ្រោះបន្ទាន់របស់គ្លីនិកឯកជនសម្ភពរស្មីដឹកយកទៅសង្គ្រោះម្នាក់ និងម្នាក់ទៀតត្រូវរថយន្តសង្គ្រោះបន្ទាន់របស់គ្លីនិកឯកជនមហានគរដឹកយកទៅសង្គ្រោះភ្លាមៗតែម្ដង ។
ប្រភពដដែលបន្តទៀតថា មួយស្ទុះក្រោយមកប្រជាពលរដ្ឋរួមទាំងសមត្ថកិច្ចមូលដ្ឋានបាននាំគ្នាយកជណ្ដើររបស់ប្រជាពលរដ្ឋទៅដាក់ពីលើរថយន្ដពន្លត់អគ្គិភ័យ ដើម្បីធ្វើការឡើងទៅជួយសង្គ្រោះស្ត្រីនារីរងគ្រោះចំនួន២នាក់ទៀតដែលជាប់ជាន់ទីបួនខាងលើ ប៉ុន្តែដោយសារខ្វះជំនាញក្នុងការជួយសង្គ្រោះក៏បណ្តាលឲ្យនារីរងគ្រោះទាំង២នាក់ធ្លាក់ចុះមកទើរវេរ៉ដាជាន់ទី២រងរបួសស្រាលម្នាក់ និងម្នាក់ទៀតដែលធ្លាក់ក្រោយគេរងរបួសបែកក្បាលទាល់តែជនរងគ្រោះទាំង៤នាក់ធ្លាក់មកដល់ជាន់ក្រោមអស់ ហើយទើបរថយន្តពន្លត់អគ្គិភ័យមានជណ្ដើរសង្គ្រោះរបស់ស្នងការនគរបាលរាជធានីភ្នំពេញបានមកធ្វើការសង្គ្រោះជនរងគ្រោះទាំងពីរនាក់ចុះពីជាន់ទី២មកខាងក្រោម ត្រូវបានរថយន្តសង្គ្រោះបន្ទាន់របស់គ្លីនិកឯកជនសម្ភពរស្មីដឹកយកទៅសង្គ្រោះភា្លមៗតែម្តង ។ បន្ទាប់មកក៏មានរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញបានចុះមកកន្លែងកើតហេតុ សរុបចំនួន១៥គ្រឿងបានធ្វើការបាញ់ពន្លត់អស់ទឹកចំនួន៥គ្រឿង ក៏រលត់ទៅវិញជាស្ថាពរ គឺរលត់នៅម៉ោង២រំលងថ្ងៃដដែល ។
តាមប្រភពពីសមត្ថកិច្ចបានឲ្យដឹងថា ហេតុការណ៍ខាងលើនេះមិនបង្កឲ្យមានការឆេះរាលដាលដល់ផ្ទះរាលដលដល់ផ្ទះរបស់ប្រជាពលរដ្ឋដែលនៅក្បែរខាងនោះទេ គឺឆេះខូចខាតតែមួយផ្នែកនៃក្នុងអគារជាប់ផ្ទាល់ដីផ្នែកខាងក្រោយដែលមានទំហំប្រមាណ២០ម៉ែត្រគុណនឹង៣០ម៉ែត្ររួមទាំងទ្រព្យសម្បត្តិមួយចំនួនដូចជា ម៉ូតូពីរគ្រឿង ម៉ាស៊ីនអូសហ្សូតូចំនួន៤គ្រឿង កុំព្យូទ័រចំនួន១៥គ្រឿង រួមទាំងសម្ភារៈមួយចំនួនធំទៀតត្រូវបានភ្លើងឆាបឆេះអស់ទាំងស្រុង ។ ចំពោះមូលហេតុ គឺបណ្តាលមកពីឆ្លងចរន្តអគ្គិសនីដែលនៅក្នុងកន្លែងបោះពុម្ពសៀវភៅនៅជាន់ផ្ទាល់ដីផ្នែកខាងក្រោយ។
ទាក់ទិននឹងអគ្គិភ័យខាងលើនេះ ប្រជាពលរដ្ឋបានរិះគន់ចំពោះរថយន្តពន្លត់អគ្គិភ័យដែលចេញមកជួយអន្តរាគមន៍មិនមានឧបករណ៍គ្រប់គ្រាន់សម្រាប់ជួយសង្គ្រោះជនរងគ្រោះឲ្យបានទាន់ពេលវេលា ៕
ចែករំលែកព័តមាននេះ