ខេត្តបាត់ដំបង ៖ មានការកត់សម្គាល់ថា គិតតាំងពីថ្ងៃ១៨ កុម្ភៈ មក មានប្រជាពលរដ្ឋបាននាំគ្នាផ្អើលយកកូន-ចៅមកចាក់ថ្នាំបង្ការជំងឺឆ្កែឆ្កួតយ៉ាងច្រើន ។ ហើយមកទល់ថ្ងៃទី២១ កុម្ភៈ គឺមានចំនួនកើនឡើងរហូតដល់ជិត២០០នាក់ក្នុងមួយថ្ងៃ ហើយអ្នកមកចាក់ គឺមានអ្នកក្រៅខេត្តក៏បានសម្រុកចូលមកមន្ទីរពេទ្យផងដែរ ។
បុគ្គលិកម្នាក់ពេទ្យខេត្តម្នាក់ (សុំមិនបញ្ចេញឈ្មោះ)បានប្រាប់កោះសន្តិភាពថា នៅក្នុងមួយថ្ងៃ ខាងយើងទទួលការចាក់ថ្នាំបង្ការត្រឹមតែ១០០នាក់ប៉ុណ្ណោះ ព្រោះដល់ម៉ោងដល់ពេលត្រូវសម្រាកដែរ។ ដោយឡែក ចំពោះអ្នកជំងឺណា មានអាការធ្ងន់ធ្ងរ ក៏យើងត្រូវទទួលព្យាបាលបន្ទាន់ដែរ ប៉ុន្តែពេលនេះ នៅមិនទាន់មានអ្នកធ្ងន់ធ្ងរនោះទេ រយៈ៣ទៅ៤ថ្ងៃមកនេះ ។
គាត់បន្តថា ឃើញអាណាព្យាបាលម្នាក់ៗ គាត់ចេះតែមានការភ័យព្រួយបារម្ភកាន់តែខ្លាំង នៅពេលដែលបានឮតៗគ្នាថា មានអ្នកស្លាប់ដោយសារត្រូវឆ្កែ ឬឆ្មាខាំនេះ ។ យើងបញ្ជាក់បន្ថែមថា មន្ទីរពេទ្យទទួលចាក់ថ្នាំបង្ការពីថ្ងៃច័ន្ទ ដល់ព្រឹកថ្ងៃសៅរ៍ ទើបឈប់សម្រាក ។ ហើយត្រូវទទួលចាក់នោះ គឺមានប័ណ្ណដែលចែកជូននិងពិនិត្យរួចហើយ ហើយត្រូវចូលចាក់ថ្នាំតាមលេខរៀង ។ នៅខេត្តបាត់ដំបង គឺក៏មិនទាន់មានគ្រោះថ្នាក់ដល់អាយុជីវិតដោយសារឆ្កែ ឬឆ្មាខាំនោះទេ ។
ជួបជាមួយកោះសន្តិភាពទៀត អ្នកស្រី ឈៀ ធិតា អាយុ២៩ឆ្នាំ ប្តីឈ្មោះលាភ វិសាល រស់ភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បាននាំកូនប្រុសឈ្មោះលាភ វិច្ឆិកា អាយុ៦ឆ្នាំ ត្រូវបានឆ្កែអ្នកជិតខាងផ្ទះ ហក់ស្ទុះមកខាំជើងទាំងសងខាង២កន្លែង ហើយគាត់បានប្រញាប់នាំមកមន្ទីរពេទ្យនៅប៉ោយប៉ែត តែមិនទាន់មានថ្នាំបង្ការចាក់នៅឡើយ ។ ខាងមន្ទីរពេទ្យក៏ណែនាំឱ្យលាងទឹកសាប៊ូជាមុនសិន រួចក៏បន្តមកដល់មន្ទីរពេទ្យបង្អែក ខេត្តបន្ទាយមានជ័យ ក៏មិនទាន់មានថ្នាំបង្ការចាក់ទៀត ទើបសម្រេចចិត្ត មកដល់បាត់ដំបងនេះ ។ គាត់បន្តថា ចំពោះអាការៈកូនប្រុសគាត់ ចេះតែរមាស់លើជើងទាំងសងខាង តែខាងមន្ទីរបាត់ដំបង តម្រូវឱ្យចាប់យកលេខប័ណ្ណតាមលេខរៀង ។
រីឯអ្នកស្រីកូយ គន្ធា អាយុ៤០ឆ្នាំ រស់នៅស្រុកថ្មគោល ខេត្តបាត់ដំបង មានកូន២នាក់ កូនស្រីឈ្មោះយ៉ុម ម៉េងលី អាយុ៣ឆ្នាំ ត្រូវឆ្មាខ្វាចរយៈពេល១អាទិត្យមកហើយ គឺមានអាការៈក្តៅខ្លួន ប្រើថ្នាំមិនបាត់សោះ លុះទទួលដំណឹងអំពីសត្វឆ្កែ ឬឆ្មា ដូចមានមកនោះ ក៏ភ័យប្រញាប់យកកូនមកចាក់ថ្នាំបង្ការដែរ ។
ចែករំលែកព័តមាននេះ