រាជធានីភ្នំពេញ ៖ ថ្ងៃទី២០ ខែកុម្ភៈ នៅទីស្តីការក្រសួង លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយម បានអនុញ្ញាតឲ្យគណៈប្រតិភូគណៈកម្មាធិការនាយកនៃក្រុមប្រឹក្សាភិបាលធនាគារអភិវឌ្ឍន៍អាស៊ី…
រាជធានីភ្នំពេញ ៖ ថ្ងៃទី២០ ខែកុម្ភៈ នៅទីស្តីការក្រសួង លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយម បានអនុញ្ញាតឲ្យគណៈប្រតិភូគណៈកម្មាធិការនាយកនៃក្រុមប្រឹក្សាភិបាលធនាគារអភិវឌ្ឍន៍អាស៊ី (ADB) ចូលជួបសម្តែងការគួរសម និងជម្រាបជូនលោករដ្ឋមន្ត្រីពីការពង្រឹងកិច្ចសហប្រតិបត្តិការកាន់ តែខ្ពស់ឡើង ក្នុងយុទ្ធសាស្ត្រគ្រប់ជ្រុងជ្រោយលើការអភិវឌ្ឍវិស័យធនធានទឹកក្នុងប្រទេសកម្ពុជា ។
គណៈប្រតិភូADBខាងលើ ដឹកនាំដោយ លោកShivaji Kshatrapati ប្រធានគណៈកម្មាធិការនាយក និងអមដោយលោក In-Chang Song លោក Kris Panday លោក Philip T. Rose លោក Mario Di Maio លោក Scott Dawson លោក Paul Dominguez លោក Jin Lu និងលោកជំទាវ Sunniya Durrani-Jamal ប្រធានស្ថានតំណាងADB ប្រចាំប្រទេសកម្ពុជា ព្រមទាំងមន្ត្រីជាន់ខ្ពស់របស់ADBជាច្រើនរូបទៀត ។
ក្នុងជំនួបនោះ លោកប្រធានគណៈប្រតិភូបានថ្លែងអំណរគុណយ៉ាងជ្រាលជ្រៅចំពោះកិច្ចសហប្រតិបត្តិការដ៏ល្អរបស់លោករដ្ឋមន្ត្រីលើការអភិវឌ្ឍវិស័យធនធានទឹក ដោយរូបលោកផ្ទាល់បានទៅធ្វើទស្សនកិច្ចនៅទីតាំងគម្រោងប្រព័ន្ធធារាសាស្ត្រតាំងក្រសាំង ស្ថិតក្នុងស្រុកសន្ទុក ខេត្តកំពង់ធំចំនួន២ដង ។ ជាមួយនេះ សូមវាយតម្លៃខ្ពស់ចំពោះលោករដ្ឋមន្ត្រី ដែលបានយកចិត្តទុកដាក់អស់ពីកម្លាំងកាយចិត្ត ធ្វើការសហការបានល្អប្រសើរជាមួយ ADB ដោយបានធ្វើឲ្យគម្រោងនេះនិងវិស័យធនធានទឹកទាំងមូល ទទួលបានជោគជ័យប្រកបដោយប្រសិទ្ធភាពខ្ពស់ ។
ជាការឆ្លើយតប លោករដ្ឋមន្ត្រី លឹម គាន ហោ បានថ្លែងអំណរគុណចំពោះការយកចិត្តទុកដាក់ជាប្រចាំរបស់ ADB លើការអភិវឌ្ឍវិស័យធនធានទឹកទាំងផ្នែករឹង និងផ្នែកទន់។ គ្រប់ជំនួយសហប្រតិបត្តិការពី ADB លើវិស័យធនធានទឹក គឺបានឆ្លើយតបប្រកបដោយប្រសិទ្ធភាពនិងទាន់ពេលវេលា ជាពិសេសបានរួមចំ ណែកយ៉ាងច្រើនជាអតិបរមាក្នុងផែនការវិនិយោគលើវិស័យធនធានទឹកក្នុងពេលកន្លងមក ធ្វើឲ្យផ្ទៃដីស្រោចស្រពកើនឡើងច្រើន ធ្វើឲ្យការដាំស្រូវនិងដំណាំផ្សេងទៀតប្រព្រឹត្តទៅបានច្រើនដងក្នុង១ឆ្នាំ ដែលជាហេតុធ្វើឲ្យសេដ្ឋកិច្ចប្រទេសកម្ពុជាមានការរីកចម្រើនប្រសើរឡើង ។
ម្យ៉ាងទៀត ក្នុងពេលបច្ចុប្បន្ននេះដែលពិភពលោកទាំងមូលកំពុងជួបប្រទះនឹងសភាពឡើងកម្តៅផែនដីកាន់តែខ្លាំងក្រោមបាតុភូត Elnio និងបម្រែបម្រួលអាកាសធាតុជាអតិបរមាឥតស្រាកស្រាន្ត ADB កំពុងតែឈរយ៉ាងរឹងមាំជាមួយកិច្ចសហប្រតិបត្តិការយ៉ាងល្អប្រសើរក្នុងការកសាងផែនការរយៈពេលវែង និងរយៈពេលមធ្យម សម្រាប់អភិវឌ្ឍន៍វិស័យធនធានទឹកនៃព្រះរាជាណាចក្រកម្ពុជា ក្នុងលក្ខណៈគ្រប់ជ្រុងជ្រោយ មានប្រសិទ្ធភាពខ្ពស់និងធានាបាននូវនិរន្តភាព ។
ជាពិសេស កាលពីសប្តាហ៍មុននេះ មុនលោកប្រធានគណៈប្រតិភូ និងសហការីអញ្ជើញមកដល់ លោករដ្ឋមន្ត្រី និងលោកជំទាវ Sunniya បានដឹកនាំអង្គប្រជុំថ្នាក់រដ្ឋមន្ត្រី ដើម្បីឆ្លងផែនការរយៈពេលវែងលើការគ្រប់គ្រងប្រព័ន្ធធារាសាស្ត្រ និងវិស័យធនធានទឹករបស់ប្រទេសកម្ពុជាប្រកបដោយលទ្ធផលជាផ្លែផ្កា។
ក្នុងជំនួបនេះដែរ លោករដ្ឋមន្ត្រីក៏បានថ្លែងអំណរគុណលោកប្រធានគណៈប្រតិភូ ADB និងសហការីទាំងអស់ ដែលបានឆ្លៀតពេលអញ្ជើញទៅពិនិត្យនិងសិក្សាឈ្វេងយល់ដោយផ្ទាល់នៅទីតាំងប្រព័ន្ធធារាសាស្ត្រតាំងក្រសាំង កាលពីថ្ងៃទី១៨ ខែកុម្ភៈ កន្លងទៅ ។ លោករដ្ឋមន្ត្រី បានប្រសិទ្ធពរជ័យជូនលោកប្រធានគណៈប្រតិភូ ADB និងសហការី សូមទទួលបានជោគជ័យក្នុងបេសកកម្មនៅប្រទេសកម្ពុជា និងធ្វើដំណើរត្រឡប់ទៅកាន់ ADB HQ វិញប្រកបដោយសុខសុវត្ថិភាព ៕ ដោយសហការ
ចែករំលែកព័តមាននេះ