ខេត្តក្រចេះ ៖ ទីតាំងរណ្តៅរ៉ែមាសជាច្រើនកន្លែង ដែលអាជ្ញាធរអះអាងថា ជាទីតាំងកែច្នៃរ៉ែមាសខុសច្បាប់នៅតំបន់ព្រៃរ៉ែ ជុំវិញភូមិសាស្ត្ររបស់ក្រុមហ៊ុនវិនិយោគរ៉ែមាសរបស់ចិន ស្ថិតក្នុងស្រុកសំបូរ បានឱ្យដឹងថា គឺមានវិធានការចុះបង្ក្រាបសារជាថ្មីម្តងទៀត ។ ប្រតិបត្តការចុះបង្ក្រាបទីតាំងអាជីវកម្មរ៉ែខុសច្បាប់ពីសមត្ថកិច្ចជំនាញ គឺធ្វើឡើងនៅពីថ្ងៃទី២១ កុម្ភៈ នេះ នៅព្រៃតំបន់រ៉ែមាស ក្នុងភូមិអូរត្រូន ឃុំក្បាលដំរី ស្រុកសំបូរ ក្រោមការដឹកនាំដោយលោក ជា សុភក្ត្រ ព្រះរាជអាជ្ញាររងអមសាលាដំបូងខេត្ត។
ក្នុងប្រតិបត្តការ សង្កេតឃើញថា អាជ្ញាធរជំនាញចុះមានវិធានការធ្ងន់ធ្ងរដល់ទីតាំងរណ្តៅរ៉ែខុសច្បាប់ទាំងនោះជាងកាលពីលើកមុន ។ បើតាមលោក សុខ គីរីរ័ត្ន ប្រធានមន្ទីររ៉ែ និងថាមពល បានថ្លែងថា វិធានការលើកនេះ គឺអាជ្ញាធរបានសម្រេចកម្ទេចចោលនូវរោងសិប្បកម្មតូចធំចូលទៅក្នុងរណ្តៅ និងបានកាយដីលុបរណ្តៅទាំងនោះចោលតែម្តង ។ មានរណ្តៅរ៉ែមាសធំៗជិត១០រណ្តៅ ត្រូវបានប្រើគ្រឿងចក្រកាយដីលុប រីឯរណ្តៅតូចៗត្រូវបានហៅម្ចាស់មក ធ្វើកិច្ចសន្យាអប់រំឱ្យបញ្ឈប់សកម្មភាពធ្វើអាជីវកម្មបន្តទៀត។
បើទោះបីជាបែបណា សកម្មភាពរបស់សមត្ថកិច្ចដែលតែងតែចុះបង្ក្រាបលើទីតាំងរ៉ែមាសជាច្រើនលើកច្រើនសារ ក៏ត្រូវគេមើលឃើញថា គឺហាក់មិនទទួលលទ្ធផលជាវិជ្ជមានសោះ ។ ដោយសារទីតាំងរ៉ែនៅតំបន់នោះ ត្រូវបានគេនិយាយថា បានកើតមានជាយូរយាណាស់មកហើយ គឺតាំងពីមុននិងក្រុមហ៊ុនចិនមកវិនិយោគម្លេះ។
បើតាមការពីពលរដ្ឋនៅតំបន់នោះថា អ្នករស់នៅតំបន់នេះគ្មានរបរអ្វីក្រៅពីការធ្វើរ៉ែមាសនោះទេ។ដោយអាជីវកម្មនេះ គឺពួកគាត់បានធ្វើតៗគ្នា តាំងពីដូនតាមកម្ល៉េះ ។ ពួកគាត់ថា ការធ្វើអាជីវកម្ម គឺធ្វើឡើងជាលក្ខណៈគ្រួសារនៅក្រោយផ្ទះក្បែរៗភូមិ ។ ពួកគាត់ថា ការធ្វើគឺសុទ្ធតែធ្វើនៅតាមរណ្តៅចាស់ៗ សល់កាកដីរ៉ែពីក្រុមហ៊ុនវិនិយោគរបស់ចិន មិនមានការជីករណ្តៅដីថ្មីមកធ្វើនោះទេ ។
ចែករំលែកព័តមាននេះ