រាជធានីភ្នំពេញ ៖ ប្រធានសមាគមមីក្រូហិរញ្ញវត្ថុកម្ពុជា ហៅកាត់ថា CMA បានឲ្យដឹងថា សមគមនឹងបង្កើតសេវាកម្មមួយចំនួនទៀត ដើម្បីទប់ស្កាត់ន ិងការពារហានិភ័យអតិថិជនដែលប្រើប្រាស់ឥណទានទៅលើវិស័យកសិកម្ម ដោយក្នុងនោះនឹងបង្កើតឲ្យមានសេវាធានារ៉ាប់រងលើវិស័យនេះកាន់តែទូលំទូលាយ ក្នុងពេលកម្ពុជាធ្លាប់ជួបប្រទះនូវបាតុភូតធម្មជាតិមួយចំនួនរួចមកហើយ ។
លោក គា បូរាណ ប្រធានសមាគមរូបនេះ បានលើកឡើងថា ដោយសារកម្ចីឥណទានពីគ្រឹះស្ថានមីក្រូហិរញ្ញវត្ថុ និងធនាគារ មួយចំនួន នៅតែផ្ដោតលើវិស័យកសិកម្ម ហើយចង់ឲ្យអតិថិជនដែលយកឥណទានទៅប្រើប្រាស់ក្នុងវិស័យកសិកម្មឲ្យមានប្រសិទ្ធភាព និងមិនមានហានិភ័យនោះ អតិថិជនគួរតែទិញនូវកញ្ចប់ធានារ៉ាប់រងសម្រាប់ដំណាំកសិកម្មរបស់ខ្លួន ហើយបណ្ដាគ្រឹះស្ថានមីក្រូហិរញ្ញវត្ថុ ក៏គួរតែបន្ថែមនូវសេវាកម្មធានារ៉ាប់រងកសិកម្មដល់អតិថិជនរបស់ខ្លួនពីលើសេវាកម្មឥណទានដែលផ្ដល់ជូនអតិថិជន ។ លោកមានប្រសាសន៍ថា ៖« ឆ្នាំ២០១៩នេះ យើងនឹងពិនិត្យទៅលើការបង្កើតសេវាកម្មបន្ថែមថ្មីៗសម្រាប់អតិថិជន ដើម្បីចូលរួមក្នុងសង្គម។ ជាក់ស្ដែងយើងអាចនឹងបង្កើតសេវាកម្មធានារ៉ាប់រងលើសុខភាព លើវិស័យកម្ម ដែលអតិថិជនយើងបានយកកម្ចីទៅប្រើប្រាស់ »។
លោកបន្តថា នៅក្នុងវិស័យកសិកម្មនេះដែរ អតិថិជនអាចទិញកញ្ចប់ធានារ៉ាប់រងទៅលើទីផ្សារផលិតផលកសិកម្ម ដោយសារតែកន្លងមកគេសង្កេតឃើញថា នៅពេលដែលកសិករដាំដំណាំបានផលហើយបែរជាគ្មានទីផ្សារ គ្មានហាងឆេង ដូច្នេះហើយទើបមីក្រូហិរញ្ញវត្ថុចង់ឲ្យអតិថិជនទិញកញ្ចប់នេះបន្ថែមដើម្បីទប់ស្កាត់នូវហានិភ័យខាតកាន់តែច្រើនពីសំណាក់អតិថិជនដែលយកឥណទានទៅប្រើប្រាស់ក្នុងវិស័យនេះ ។ មួយវិញទៀត ការធានារ៉ាប់រងក្នុងវិស័យកសិកម្មទៅលើអាកាសធាតុ ក៏ជាកត្តាចម្បងនិងចាំបាច់ផងដែរ សម្រាប់ការពារហានិភ័យរបស់អតិថិជន។ ជាក់ស្ដែងកន្លងមកនេះ នៅកម្ពុជា បានជួបប្រទះនូវគ្រោះទឹកជំនន់ និងបំផ្លាញដំណាំរបស់កសិករអស់ជាច្រើន ដូច្នេះ បើសិនជាពួកគាត់ប្រើប្រាស់ការធានារ៉ាប់រងទៅលើកត្តាទាំងនេះ វានឹងមានប្រយោជន៍សម្រាប់ពួកគាត់ ។
ក្នុងឆ្នាំ២០១៩នេះ រាជរដ្ឋាភិបាលបានប្រកាសរួចហើយពីការអូសបន្លាយរដូវប្រាំង ហើយអាកាសធាតុនឹងឡើងកម្ដៅជាងឆ្នាំមុនៗ ដែលមានមតិមួយចំនួនយល់ថា វានឹងធ្វើឲ្យប៉ះពាល់ដល់ឥណទានរបស់មីក្រូហិរញ្ញវត្ថុកម្ពុជា ក៏ប៉ុន្តែប្រធានសមាគមមីក្រូហិរញ្ញវត្ថុកម្ពុជាបានលើកឡើងថា វាគ្មានបញ្ហាសម្រាប់ដំណើរការផ្ដល់ឥណទានទៅកាន់អតិថិជននោះទេ ។ លោក គា បូរាណ អះអាងថា ៖« បាតុភូតដែលកើតឡើងនៅកម្ពុជា មិនមែនជាមេរៀនថ្មីនោះទេ ។ កន្លងមកយើងបានជួបប្រទះរួចមកហើយ ដូចជាគ្រោះរាំងស្ងួតអូសបន្លាយយូរ ហើយសម្រាប់ឆ្នាំនេះ រាជរដ្ឋាភិបាលបានប្រកាសរួចហើយឲ្យពលរដ្ឋគួរប្រុងប្រយ័ត្នពីការធ្វើស្រែ ដោយខ្លាចខ្វះទឹកប្រើប្រាស់ និងគួរកុំប្រញាប់សាបព្រោះឬដាំដុះពេក ដែលអាចនឹងធ្វើឲ្យដំណាំរបស់កសិករខូចខាត » ។
គួរបញ្ជាក់ថា កន្លងមក មូលនិធិកិច្ចសហប្រតិបត្តិការអាល្លឺម៉ង់ក៏បានធ្វើនូវកិច្ចការធានារ៉ាប់រងលើដំណាំកសិកម្មនេះផងដែរនៅកម្ពុជា ក៏ប៉ុន្តែមូលនិធិនោះបានធ្វើតែលើខេត្តសក្ដានុពលមួយចំនួនប៉ុណ្ណោះនៅកម្ពុជា ដោយមិនផ្ដោតទៅលើទូទាំងប្រទេសនៅឡើយទេ ។ អ្នកគ្រប់គ្រងទូទៅនៃក្រុមហ៊ុនធានារ៉ាបរង់ហ្វតតេ លោក នី លីហួង ធ្លាប់បាននិយាយថា ការធានារ៉ាប់រងទៅលើដំណាំដូចជាស្រូវ និងដំណាំផ្សេងទៀត ក្រុមហ៊ុនធានារ៉ាប់រងហ្វតតេ បានផ្ដល់ប្រមាណ៤ទៅ៥ឆ្នាំមកហើយ ក៏ប៉ុន្តែអ្នកប្រើប្រាស់សេវាធានារ៉ាប់រងប្រភេទនេះមានចំនួនតិចតួចនៅឡើយ ហើយលោកក៏ចង់ឲ្យប្រជាពលរដ្ឋមានការយល់ដឹងបន្ថែម និងប្រើប្រាស់សេវាកម្មធានារ៉ាប់រងលើដំណាំកសិកម្មឲ្យបានកាន់តែច្រើន ដើម្បីទប់ស្កាត់នូវការខាតបង់ថ្លៃដើមកសិកម្មរបស់ពួកគាត់ ៕
ចែករំលែកព័តមាននេះ