រាជធានីភ្នំពេញ ៖ អ្នកប្រកបរបរធ្វើចម្លាក់ និងសូនរូបព្រះពុទ្ធ នៅតាមបណ្តោយផ្លូវជាតិលេខ១ បានត្អូញត្អែរថា បច្ចុប្បន្ននេះពុទ្ធសាសនិកដែលជាវព្រះពុទ្ធបដិមាយកទៅធ្វើបុណ្យនៅតាមវត្តអារាម និងទីស្ការបូជានានា មានការថមថយ មិនដូចកាលពីឆ្នាំមុនៗឡើយ ។
លោក ចាន់ តារា អាជីវករមួយរូបដែលកំពុងធ្វើអាជីវកម្មសូនរូបព្រះពុទ្ធបដិមានៅតាមបណ្ដោយផ្លូវជាតិនេះ បាននិយាយថា កាលពីអំឡុងទសវត្សរ៍ឆ្នាំ១៩៨០និងទសវត្សរ៍ឆ្នាំ១៩៩០ ពលរដ្ឋមានជំនឿខ្លាំងណាស់ទៅលើពុទ្ធសាសនា ។ នៅពេលឃើញព្រះសង្ឃនិមន្តនៅចំពោះមុខ ពលរដ្ឋខ្មែរគ្រប់រូបសុទ្ធតែលុតជង្គង់សំពះ ដោះមួក និងស្បែកជើងជាដើម តែប៉ុន្មានឆ្នាំក្រោយនេះ ឥទ្ធិពលនៃវិស័យនេះមានការប្រែប្រួលច្រើន ពិសេសបន្ទាប់ពីមានរឿងអាស្រូវកើនចេញពីបុគ្គលសង្ឃមួយចំនួនតូចបានប្រព្រឹត្តខុសវិន័យសង្ឃជាហូរហែ បានធ្វើឱ្យប៉ះពាល់ដល់វិស័យព្រះពុទ្ធសាសនា ជាហេតុធ្វើឱ្យពលរដ្ឋជំនាន់ក្រោយលែងសូវមានជំនឿ ។
លោកលើកឡើងថា ៖« កាលមិនទាន់មានរឿងអាស្រូវធ្វើឱ្យប៉ះពាល់ដល់ព្រះពុទ្ធសាសនា ការជាវពុទ្ធបដិមាមានចំនួនច្រើន ដែលពេលខ្លះធ្វើមិនទាន់ផង ពិសេសនៅពេលជិតដល់កាលរដូវកាលបុណ្យទាន ដូចជា ចូលឆ្នាំ បុណ្យភ្ជុំ ឬបុណ្យផ្សេងទៀត ដែលខែខ្លះលក់បាន១០អង្គ ខែខ្លះទៀតអាចលក់រហូតដល់៥០ទៅ៦០អង្គ ឬលើសពីនេះតាមភាពជាក់ស្តែង ប៉ុន្ដែសព្វថ្ងៃនេះមានការថមថយយ៉ាងខ្លាំង »។ រឿងអាស្រូវដែលកើតចេញពីបុគ្គលសង្ឃមួយចំនួនតូចនោះ ពិតជាផ្នែកមួយដែលបានជះឥទ្ធិពលអវិជ្ជមានដល់វិស័យពុទ្ធសាសនា តែមិនមែនប៉ះពាល់ទាំងស្រុងទៅលើអាជីវកម្មចម្លាក់ព្រះឡើយ ។ មានកត្តាមួយចំនួនក៏ធ្វើឲ្យអាជីវកម្មនេះថមថយដែរដូចជា ទឹកដៃជាងចម្លាក់ តម្លៃ ការរីកមច្រើននៃអាជីវកម្មនេះនៅតាមតំបន់ផ្សេងៗ និងបញ្ហាខ្វះទំនាក់ទំនងទីផ្សារជាដើម ។
បើតាមអ្នកធ្វើបដិមាព្រះពុទ្ធផ្សេងទៀតនៅតាមបណ្តោយផ្លូវជាតិលេខ១នេះដែរ លោក ជា សៀ បានអះអាងថា ៖« សព្វថ្ងៃនេះ ប្រជាពលរដ្ឋយើងមានជំនឿច្រើនលើវិស័យព្រះពុទ្ធសាសនា ដែលជាសាសនារបស់រដ្ឋ ដោយឃើញមកជាវព្រះយកទៅធ្វើបុណ្យជាហូរហែ។ តួយ៉ាង នៅមុនថ្ងៃបុណ្យមាឃបូជា ខ្ញុំលក់ដាច់ច្រើន ដូចនេះបង្ហាញថា ការគោរពប្រណិប័តន៍ព្រះពុទ្ធសាសនាពីសំណាក់ពុទ្ធសាសនិកនៅតែរឹងមាំ និងមិនមានអ្វីប្រែប្រួលច្រើននោះទេ »។
លោកបញ្ជាក់ថា ៖« ក្នុង១ថ្ងៃ មានពលរដ្ឋមកជាវបដិមាព្រះពុទ្ធពី៥ទៅ៦អង្គ និងថ្ងៃខ្លះពី៧ទៅ៨អង្គ ហើយការផលិតសម្រាប់បដិមាដោយចាក់ពុម្ពក្នុង១អង្គត្រូវចំណាយពេល៣ទៅ៤ថ្ងៃ ទើបរួចរាល់។ ចំណែកបដិមាសូនរូបវិញត្រូវចំណាយពេល១សប្តាហ៍ឬលើសពីនេះ ហើយតម្លៃគឺផ្សេងៗគ្នាទៅតាមខ្នាត និងទម្រង់ ដែលមានចាប់ពី៨០ទៅ១៤០ដុល្លារឡើង »។ លោក ជា សៀ និយាយថា ៖« ការធ្វើព្រះពុទ្ធបដិមាតែងតែគោរព និងធ្វើទៅតាមក្បូនខ្នាតដែលបានកំណត់តាំងពីបរមបុរាណមក ទាំងការរចនា ការលាបពណ៌ គឺទាមទារឲ្យគោរពតាមបទដ្ឋានត្រឹមត្រូវ។ ប្រសិនបើធ្វើមិនបានត្រឹមត្រូវទេ ទម្រង់រូបព្រះពុទ្ធមិនសម ហើយពុទ្ធសាសនិកដែលជាវយកទៅដាក់នៅតាមវត្ត អាចនឹងមានបញ្ហាថែមទៀត ដូច្នេះមិនមែនចេះតែធ្វើនោះទេ »។ លោកបញ្ជាក់ថា អាជីវកម្មនេះនៅតែដំណើរការល្អ បើទោះជាបុគ្គលសង្ឃមួយចំនួនប្រព្រឹត្តរឿងអាស្រូវនាំឲ្យប៉ះពាល់ដល់ជំនឿរបស់ពលរដ្ឋលើវិស័យពុទ្ធសាសនាខ្លះក៏ដោយ ។
ទាក់ទងនឹងការលើកឡើងខាងលើនេះ លោកតាអាចារ្យវត្តនាគវ័ន្ត បានឲ្យដឹងផងដែរថា រឿងអាស្រូវដែលកើតចេញពីព្រះសង្ឃមួយចំនួនតូចនោះ ជារឿងបុគ្គលទេ មិនមែនព្រះសង្ឃទាំងអស់សុទ្ធតែមិនត្រឹមត្រូវទេ ដូច្នេះអ្នកធ្វើអាជីវកម្មលើពុទ្ធបដិមាមិនគួរយកជំនឿសាសនាមកភ្ជាប់ជាមួយឡើយ ។ លោកតា ជុំ អែល អាចារ្យវត្តនាគវ័ន បានមានប្រសាសន៍ថា ៖« សព្វថ្ងៃនេះព្រះសង្ឃភាគច្រើនគោរពតាមវិន័យក្នុងព្រះពុទ្ធសាសនាបានល្អ តែដោយឡែកបុគ្គលមួយចំនួនតូចប៉ុណ្ណោះដែលបានធ្វើឱ្យប៉ះពាល់ដល់ព្រះពុទ្ធសាសនា។ ចំណែកឯព្រះសង្ឃដែលបួសមានច្បាប់ និងមានលក្ខណៈគ្រប់គ្រាន់ លោកមិនបានធ្វើឱ្យប៉ះពាល់ដល់សាសនាព្រះពុទ្ធឡើយ »៕
ចែករំលែកព័តមាននេះ