ក្រុងប៉ោយប៉ែត ៖ ស្រ្តីមេម៉ាយកូន ៥នាក់ ខណៈដែលប្តីទើបនឹងស្លាប់ បានតូចចិត្តខ្លួនក្រគ្មានលទ្ធភាពចិញ្ចឹមកូន ក៏សម្រេចចិត្តដុតផ្ទះចោល កាលពីរសៀលថ្ងៃទី០២ កញ្ញា ២០១៣ ស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ។
ស្រ្តីមេម៉ាយខាងលើមានឈ្មោះ យិន លាភ អាយុ ៤៣ឆ្នាំ គ្មានមុខរបរ មានប្តីជាកម្មករអូតេស ទើបនឹងស្លាប់កាលពីថ្ងៃទី៣១ សីហា ២០១៣ ដោយសារជំងឺ សូម្បីលុយធ្វើបុណ្យសពក៏គ្មានដែរ ត្រូវបូជានៅមន្ទីរពេទ្យតែម្តង ។ ស្រ្តីរូបនោះបន្តថា រូបគាត់មានកូនរហូតដល់ ៥នាក់ នៅក្នុងបន្ទុក ក្រោយពេលប្តីគាត់ស្លាប់ គាត់មិនដឹងមានអ្វីពឹងពាក់ឡើយ ព្រោះគាត់គ្មានមុខរបរ ហើយផ្ទះដែលរស់នៅសព្វថ្ងៃនេះ គឺសុំដីគេសង់នៅប៉ុណ្ណោះ ។
បន្ទាប់ពីស្រ្តីមេម៉ាយដុតផ្ទះចោល បានធ្វើឱ្យមានការភ្ញាក់ផ្អើលដល់អ្នកភូមិ ខណៈដែលផ្ទះស្រ្តីនោះនៅឆ្ងាយដាច់ពីគេ ទើបនៅវេលាម៉ោងជាង ៨យប់ សមត្ថកិច្ចប៉ុស្តិ៍រដ្ឋបាលផ្សារកណ្តាល និងប៉ូលិសនៃអធិការដ្ឋានក្រុង ចុះទៅធ្វើកំណត់ហេតុ ។ បច្ចុប្បន្ន ស្ត្រីមេម៉ាយខាងលើ និងកូនទាំង ៥នាក់ ត្រូវប្រជាពលរដ្ឋដែលមានផ្ទះនៅម្តុំកន្លែងកើតហេតុឱ្យស្នាក់នៅបណ្តោះអាសន្នសិន ៕
ចែករំលែកព័តមាននេះ