រាជធានីភ្នំពេញ ៖ បុរសអ្នកបើកបរម៉ូតូកង់បីឥណ្ឌា Pass App បានដឹកនាងក្រមុំម្នាក់ពេលយប់លុះពេលទៅដល់កន្លែងស្ងាត់ បុរសនោះបានឈប់នោម ហើយខណៈនោះចំណង់តណ្ហាបានពុះកញ្ជ្រោលឡើង១០០អង្សារក៏បានចាប់នាងក្រមុំខាងលើប្រុងរំលោភ ប៉ុន្តែមិនសម្រេចដូចបំណងនោះឡើយ ដោយសារតែនាងស្រែកឆោរឡោបង្កឲ្យមានការភ្ញាក់ផ្អើល ហើយត្រូវបានអ្នកភូមិ និងអ្នកដំណើរនាំគ្នាដេញតាមចាប់ខ្លួនបានភ្លាមៗតែម្ដង ។
ហេតុការណ៍នោះបានកើតឡើងកាលពីវេលាយប់ថ្ងៃទី២០ ខែកុម្ភៈ ឆ្នាំ២០១៩ នៅតាមផ្លូវបេតុងភូមិប្រកា សង្កាត់ព្រៃខណ្ឌដង្កោ រាជធានីភ្នំពេញ ។ នាងក្រមុំរងគ្រោះអាយុ១៩ឆ្នាំ មានស្រុកកំណើត ខណ្ឌមានជ័យ រាជធានីភ្នំពេញ និងស្នាក់នៅក្នុងសង្កាត់ព្រៃស ខណ្ឌដង្កោ ។ ចំណែកបុរសអ្នកបើកកង់បីខាងលើមិនត្រូវបានស្គាល់អត្តសញ្ញាណនោះទេបានបើកកង់បី Pass App ពណ៌ស ពាក់ស្លាកលេខកណ្ដាល 1AB-1943 ។
នាងបាននិយាយថា នៅមុនពេលកើតហេតុនាងបានជិះម៉ូតូជាមួយមិត្តភក្ដិទៅដើរលេងនៅកោះពេជ្រ លុះដើរអស់ចិត្តក៏បានបែកផ្លូវគ្នា ហើយខណៈនោះមិត្តភក្តិរបស់នាងក៏បានធានាជូនត្រឡប់មកផ្ទះវិញដែរ ។ ប៉ុន្តែក្រោយមកមិត្តភក្តិរបស់នាងខាងលើមានការរវល់បន្ទាន់មិនបានជូនមកវិញ រួចជិះម៉ូតូឌុបនាងមកដល់ត្រឹមចំណុចស្ពានដែកចំការដូងក៏ត្រឡប់ទៅវិញបាត់ ។ បន្ទាប់មកនាងបានហៅ Pass App ១គ្រឿងខាងលើ ដើម្បីជិះបន្តដំណើរត្រឡប់ទៅផ្ទះ ។
ប្រភពដដែលបានបន្តថា ខណៈនោះនាងបានឡើងជិះហើយបានប្រាប់ឲ្យបុរសកំហូចខាងលើបើកកង់បីឲ្យលឿនព្រោះប៉ារបស់នាងកំពុងរង់ចាំផ្លូវនាងត្រឡប់ទៅផ្ទះវិញ ។ លុះពេលទៅដល់ត្រង់ចំណុចកើតហេតុដែលជាកន្លែងស្ងាត់ ជនសង្ស័យបានឈប់ ហើយពេលនាងសួរថា«បងឈប់ធ្វើអី កន្លែងនេះស្ងាត់ណាស់ ? »បុរសអ្នកបើកកង់បីនោះប្រាប់វិញថា «ឈប់ឈឺនោម » បន្ទាប់មកបានកាន់ក្រមាមួយដើរទៅនោមបាត់មួយសន្ទុះទើបដើរត្រឡប់មកវិញ ហើយយកក្រមានោះទុកខាងក្រោយនាងបន្ទាប់មកក៏បានធ្វើសកម្មភាពចាប់នាងក្រៀកឱបទាំងកម្រោលតែម្ដង ។
ប្រភពខាងលើបានបន្តថា ខណៈនោះនាងភិតភ័យខ្លាំងណាស់ និងនឹកស្មានថា ក្លាយទៅជាចំណីតណ្ហារបស់ជននេះទៅហើយ ប៉ុន្តែនាងបានខំស្រែកថា ចោរៗ និងរើសម្រាស់បង្កឲ្យមានការភ្ញាក់ផ្អើលដល់អ្នកដំណើរ ។ ភ្លាមៗនោះអ្នកបើកបរ Pass App រូបនេះបានឌុបនាងចេញពីកន្លែងផ្លូវស្ងាត់នោះ បន្តដំណើរទៅមុខទៀត ប៉ុន្តែពេលនោះក៏មានបុរស និងស្ត្រី២នាក់ប្ដីប្រពន្ធ ដែលជាអ្នកដំណើរជិះម៉ូតូតាមពីក្រោយមកជាប់ដែរ ប៉ុន្តែពួកគាត់មិនហ៊ានចូលទៅជួយឃាត់នោះទេ ។
ចំណែកជនកំហូចខាងលើ ក្រោយពីឃើញបែបនេះខឹងណាស់ក៏បានបើក pass app កៀរម៉ូតូអ្នកដេញតាម២នាក់ប្ដីប្រពន្ធនោះ បណ្ដាលឲ្យដួលរងរបួសរលាត់ដៃស្រាល ។ បន្ទាប់មកបានបើករត់ឡើងទៅតាមផ្លូវលេខ២១៧ លុះទៅដល់ត្រង់ចំណុចកែងផ្លូវស្តុបផ្សារថ្នល់បត់ទើបត្រូវបានជនរងគ្រោះ២នាក់ប្ដីប្រពន្ធ និងអ្នកភូមិប្រដេញតាមទាន់ចាប់ខ្លួនបាន ។
ប្រជាពលរដ្ឋបាននិយាយថា បន្ទាប់ពីចាប់ជននោះបានរួចហើយ ពួកគាត់បានប្រគល់ជននោះទៅឲ្យនគរបាលចាត់ការ ប៉ុន្តែមុន និងចាប់ខ្លួនបាន pass app១គ្រឿងនេះបានបើកកៀររថយន្ត១គ្រឿងផងដែរ ។ លុះក្រោយពេលនគរបាលនាំទៅដល់ប៉ុស្តិ៍ម្ចាស់រថយន្តមិនបានប្ដឹងប្ដល់អ្វីឡើយ ចំណែកនាងក្រមុំខាងលើរួម និងក្រុមគ្រួសាររបស់នាងក៏មិនបានប្ដឹងផ្តល់ដែរ ហើយក្រោយមកជនសង្ស័យត្រូវបាននគរបាលដោះលែងទៅវិញទាំងយប់ ។
លោកវរសេនីយឯក ជឹម ស៊ីថា អធិការនគរបាលខណ្ឌដង្កោបានប្រាប់ថា រឿងនោះមិនមានអ្វីធំដុំទេ ក្រោយពេលនាំដល់ប៉ុស្តិ៍ព្រៃស និងប៉ុស្តិ៍ដង្កោភាគីខាងស្រីមិនបានដាក់ពាក្យបណ្ដឹងអ្វីឡើយ ទើបពេលនោះនគរបាលមិនអាចកសាងសំណុំរឿងចាត់ការកើត ហើយបានត្រឹមអប់រំប៉ុណ្ណោះ ៕
ចែករំលែកព័តមាននេះ