ខេត្តកំពង់ធំ ៖ បុរសជាជាងផ្សារដែកម្នាក់ត្រូវខ្សែភ្លើងឆក់ធ្លាក់ពីលើដំបូល បណ្តាលឱ្យស្លាប់ ខណៈកំពុងតែឡើងធ្វើដំបូលផ្ទះឲ្យភ្ញៀវ ។ ហេតុការណ៍នេះបានកើតឡើងកាលពីរវេលាម៉ោង៤និង២០រសៀលថ្ងៃទី២០ ខែកុម្ភៈ ឆ្នាំ២០១៩ ស្ថិតនៅភូមិវាំងខាងត្បូង ឃុំតាំងក្រសាំង ស្រុកសន្ទុក ខេត្តកំពង់ធំ ។
នគរបាលបានឲ្យដឹងថា ជនរងគ្រោះដែលស្លាប់ឈ្មោះ ស៊ុន រ័ត្ឋ ភេទប្រុស អាយុ៣៥ឆ្នាំ មុខរបរជាងផ្សារដែក មានទីលំនៅភូមិត្រើយម្យ៉ាប ឃុំប្រាសាទ ស្រុកសន្ទុកខេត្តកំពង់ធំ ។
តាមការបំភ្លឺរបស់សាក្សីឈ្មោះ សំ សារ៉ាត់ ភេទប្រុស អាយុ៣០ឆ្នាំ និងឈ្មោះ ទិញ មឿក ភេទប្រុស អាយុ២២ឆ្នាំ នៅភូមិវាំងខាងត្បូង ឃុំតាំង ក្រសាំង ស្រុកសន្ទុក ដែលជាជាងផ្សារដែកជាមួយនឹងជនរងគ្រោះ បានឱ្យដឹងថា នៅមុនពេលកើតហេតុ ពួកគាត់ និងជនរងគ្រោះបានទៅធ្វើដំបូលផ្ទះឲ្យឈ្មោះ អ៊ូ ប៊ុន ណារិទ្ធិ ភេទប្រុស អាយុ៤៧ ឆ្នាំនៅ ភូមិកើតហេតុខាងលើ ។
ប្រភពដដែលបានបន្តថា ពេលកំពុងតែបាញ់វីសប្រក់ដំបូលផ្ទះ ដែលមានកំពស់៣ម៉ែត្រ ស្រាប់តែឆ្លងចរន្តអគ្គិសនីពីម៉ូទ័របាញ់វីសដែលកាន់នឹងដៃ បណ្ដាលឲ្យឆក់ជនរងគ្រោះ ប្រកាច់ធ្លាក់ពីលើដំបូលផ្ទះធ្លាក់មកដីរងរបួសធ្ងន់ ឃើញដូច្នេះក៏នាំគ្នាដឹកយកជនរងគ្រោះទៅកាន់មណ្ឌលសុខភាពតាំងក្រសាំងដើម្បីជួយសង្គ្រោះជីវិតដែរ តែដោយសាររបួសធ្ងន់ពេក ជនរងគ្រោះក៏បានស្លាប់នៅពេលដឹកដល់មន្ទីរពេទ្យ។
បន្ទាប់ពីទទួលបានព័ត៌មានខាងលើភ្លាម កម្លាំងជំនាញបានសហការជាមួយ ប៉ុស្តិ៍នគរបាលរដ្ឋបាលចុះទៅពិនិត្យសពជនរងគ្រោះនៅក្នុងមណ្ឌលសុខភាពតាំង ក្រសាំង ដោយមានគ្រូពេទ្យនៅទីនោះចូលរួមពិនិត្យ និងរកឃើញមានស្នាម របួសនៅលើថ្ពាល់ខាងស្តាំ នៅលើជង្គង់ខាងឆ្វេងមានស្នាមរបួសចេញឈាម និងនៅលើ.កទៀត ដោយសង្ស័យធ្លាក់បាក់ក ។ ក្រោយពិនិត្យចប់សមត្ថកិច្ចបានធ្វើកំណត់ហេតុ រួចប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ