ខេត្តប៉ៃលិន ៖ ក្រុមអ្នកដើរយកឃ្មុំព្រៃបានដុតព្រៃមិនពន្លត់ បណ្តាលឱ្យឆេះរាលដាលចូលក្នុងចម្ការដំណាំរបស់ប្រជាពលរដ្ឋ បង្កឱ្យមានការភ្ញាក់ផ្អើលដល់រថយន្តពន្លត់អគ្គីភ័យនគរបាលចូលទៅជួយបាញ់ទឹកពន្លត់ទាន់ពេល កុំអីអាចនឹងឆេះខ្ទេចខ្ទីអស់គ្មានសល់នោះឡើយ ។
ហេតុការណ៍ខាងលើនេះបានកើតឡើងកាលពីវេលាម៉ោង៤ និង១៥នាទីរសៀលថ្ងៃទី២០ ខែកុម្ភៈ ឆ្នាំ២០១៩ ស្ថិតនៅចំណុចក្នុងចម្ការតាង៉ែនហៅមៀនប៉ៃលិន របស់ឈ្មោះ ឆោម ឆាយ ភេទប្រុស ក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីនគរបាលបានឱ្យដឹងថា មុនពេលកើតហេតុ គេឃើញក្រុមអ្នកចូលទៅយកសត្វឃ្មុំនៅក្នុងព្រៃ ដោយប្រើគប់ភ្លើងដុត លុះពេលចេញទៅនោះមិនបានពន្លត់ភ្លើង បណ្តាលឱ្យ ឆេះរាលដាលចូលទៅក្នុងចម្ការតាង៉ែន ហៅមៀនប៉ៃលិន ។
ប្រភពបន្តទៀតថា ពេលម្ចាស់ឃើញផ្សេងហុយចេញនៅក្បែរចម្ការតាង៉ែន ហៅមៀនប៉ៃលិន របស់ខ្លួន ក៏នាំគ្នាទៅមើលឃើញភ្លើងឆេះយ៉ាងសន្ធោសន្ធៅ ទើបទាក់ទងទៅសមត្ថកិច្ចឱ្យយករថយន្តពន្លត់អគ្គីភ័យចូលទៅជួយអន្តរាគមន៍ទាន់ពេលវេលាតែម្តង ។
ពាក់ព័ន្ធនឹងករណីអគ្គិភ័យឆាបឆេះខាងលើនេះ ត្រូវបានកម្លាំងការិយាល័យបង្ការពន្លត់អគ្គីភ័យ ចេញរថយន្តពន្លត់អគ្គីភ័យចំនួន២គ្រឿង ដោយបាញ់ទឹកទប់ស្កាត់ មិនឲ្យឆេះរាលដាលបន្តទៀត ហើយក៏មិនបណ្តាលឲ្យគ្រោះថ្នាក់ដល់មនុស្ស ឬខូចខាតទ្រព្យសម្បត្តិអ្វីឡើយច្រើននោះឡើយ ៕
ចែករំលែកព័តមាននេះ