រាជធានីភ្នំពេញ ៖ ប្រទេសជប៉ុនតាមរយៈឯកអគ្គរាជទូតជប៉ុនប្រចាំនៅកម្ពុជានៅព្រឹកថ្ងៃទី២០ ខែកុម្ភៈ ឆ្នាំ២០១៩ បានសម្រេចផ្តល់ជំនួយឥតសំណងទឹកប្រាក់សរុបចំនួន៤.៩៣៩លានយ៉េន (ប្រមាណ៤៣,៣៦លានដុល្លារអាមេរិក) ។
ក្នុងនោះឥណទានសម្បទានចំនួន៣.៥៩៩លានយ៉េន(ប្រមាណ៣១,៥៦លានដុល្លារអាមេរិក)សម្រាប់អនុវត្ត«គម្រោងកែលម្អ និងស្ដារប្រព័ន្ធស្រោចស្រព និងប្រព័ន្ធដោះទឹកភាគខាងលិចបឹង ទន្លេសាប ជំហានទី២» និងហិរញ្ញប្បទានឥតសំណងចំនួន១.៣៤០លានយ៉េន (ប្រមាណ ១១.៨ លានដុល្លារអាមេរិក) សម្រាប់អនុវត្ត«គម្រោងអភិវឌ្ឍន៍ ប្រព័ន្ធផ្លាស់ប្ដូរទិន្នន័យអគ្គិសនីនៅកំពង់ផែ ដើម្បីធ្វើទំនើបកម្មកំពង់ផែ» ។
លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរ ជាតិបានបញ្ជាក់ក្រោយពេលពិធីចុះហត្ថលេខាថា ថ្ងៃនេះខ្ញុំមានសេចក្ដីសោមនស្សឥតឧបមាដោយបានចុះហត្ថលេខាជាមួយលោក HORINOUCHI លើលិខិតប្តូរសារ និងកំណត់ហេតុ នៃការពិភាក្សា ស្ដីពីហិរញ្ញប្បទានរបស់ជប៉ុនដែលមានទឹកប្រាក់សរុបចំនួនប្រមាណ ៤៣,៣៦ លានដុល្លារអាមេរិកក្នុងនោះឥណទានសម្បទានប្រមាណ ៣១,៥៦ លានដុល្លារអាមេរិកសម្រាប់អនុវត្ត «គម្រោងកែលម្អ និងស្ដារប្រព័ន្ធស្រោចស្រព និងប្រព័ន្ធដោះទឹកភាគខាងលិចបឹង ទន្លេសាប ជំហានទី២»និងហិរញ្ញប្បទានឥតសំណងចំនួនប្រមាណ ១១.៨ លានដុល្លារអាមេរិក សម្រាប់អនុវត្ត «គម្រោងអភិវឌ្ឍន៍ ប្រព័ន្ធ ផ្លាស់ប្ដូរទិន្នន័យអគ្គិសនីនៅកំពង់ផែ ដើម្បីធ្វើទំនើបកម្មកំពង់ផែ» ។
លោកឧបនាយករដ្ឋមន្ត្រីបានបន្តថា ជំនួយឥតសំណង និងឥណទានសម្បទានដែលទើបត្រូវបានចុះហត្ថលេខានៅថ្ងៃនេះនឹងរួមចំណែកយ៉ាងសំខាន់ក្នុងការបន្តអនុវត្ត«យុទ្ធសាស្ត្រចតុកោណ» ដំណាក់កាលទី៤ របស់រាជរដ្ឋាភិបាលកម្ពុជា ដែលស្របទៅនឹងមុំទី២ និងទី៤ ដែលបានសង្កត់ធ្ងន់លើ «ការកែលម្អប្រព័ន្ធឡូជីស្ទីក ការលើកកំពស់ការតភ្ជាប់ផ្នែកដឹកជញ្ជូន ថាមពល និងឌីជីថល» និង «ការលើកស្ទួយកសិកម្ម និងការអភិវឌ្ឍជនបទការគ្រប់គ្រងធម្មជាតិ និងវប្បធម៌ប្រកបដោយចីរភាព»ដែលទាំងនេះជាចលករជួយជម្រុញឲ្យកម្ពុជាសម្រេចបាននូវឋានៈជាប្រទេសចំណូលមធ្យមកម្រិតខ្ពស់នៅឆ្នាំ២០៣០ ៕
ចែករំលែកព័តមាននេះ