ខេត្តកំពង់ឆ្នាំង ៖ ប្រជាពលរដ្ឋទាំង៨ភូមិក្នុងឃុំជ្រៃបាក់ដែលមានមុខរបរធ្វើក្អមឆ្នាំងជាមួយអាជ្ញាធរឃុំ និង តំណាងក្រុមហ៊ុនផង នៅព្រឹកថ្ងៃទី២០ ខែកុម្ភៈ ឆ្នាំ២០១៩ បានទៅពិនិត្យទីតាំងដីថ្មីដែលក្រុមហ៊ុនសម្រេចប្រគល់អោយពួកគាត់សម្រាប់ជីកយកមកធ្វើក្អមឆ្នាំងនៅចំណុចខ្នាចសុឃ័រ ក្នុងភូមិអូររោង ឃុំជ្រៃបាក់ ស្រុករលាប្អៀរ ។
នៅលើទីតាំងដីថ្មីដែលនឹងត្រូវប្រគល់ឲ្យប្រជាពលរដ្ឋសម្រាប់ជីកយកដីធ្វើក្អមឆ្នាំងតំណាងក្រុមហ៊ុនបាននិយាយឱ្យដឹងថា ៖ បន្ទាប់ពីប្រជាពលរដ្ឋមានការតវ៉ា និងសុំដីពីក្រុមហ៊ុនវិញចំនួន៧ហិកតា ដើម្បីយកធ្វើក្អមឆ្នាំងរយៈកាលពីពេលកន្លងទៅ ពេលនេះក្រុមហ៊ុនបានសម្រេចប្រគល់ដីនៅចំណុចនេះ ឲ្យបងប្អូន ប្រជាពលរដ្ឋចំនួន៤ហិកតា ។
ជាមួយគ្នានេះបើសង្ស័យថា ដីថ្មីនៅទីនេះពេលយកទៅផលិតក្អមឆ្នាំងហើយមិនកើតក្រុមហ៊ុននឹងយកគ្រឿងចក្រមកជីកយកដីនៅទីចំនួន៦ទៅ៧ រណ្តៅ ដើម្បីអោយបងប្អូនប្រជាពលរដ្ឋយកដីទាំងនោះទៅធ្វើក្អមឆ្នាំង ជាការសាកល្បង ប៉ុន្តែប្រសិនពេលយកទៅធ្វើហើយមិនកើត បងប្អូនមិនអាចទទួលយកបានក្រុមហ៊ុននឹងប្តូរទីតាំងដីថ្មីអោយបន្តទៀត ។
ក្រោយពីស្ដាប់តំណាងឲ្យក្រុមហ៊ុនរួចហើយ តំណាងប្រជាពលរដ្ឋម្នាក់បានលើកឡើងថា ពួកគាត់សូមទទួលយកជាបណ្ដោះអាសន្នសិន ព្រោះមិនដឹងថា ដីនៅទីនេះយកទៅធ្វើក្អមឆ្នាំង កើតឬមិនកើតនោះទេ ប៉ុន្តែប្រសិនបើយកទៅដុតមានការផ្ទុះប្រេះ ធ្វើមិនកើត ពួកគាត់ក៏មិនទទួលយកបានដែរ។ ពួកគាត់និងសុំដោះដូររកកន្លែងថ្មីទៀតហើយ ។
ជាមួយគ្នានេះ លោក ចាន់ឡេង ក្រុមប្រឹក្សាឃុំជ្រៃបាក់ បាននិយាយឲ្យដឹងថា លោកសូមថ្លែងអំណរគុណដល់ក្រុមហ៊ុនដែលបានផ្ដល់ដីចំនួន៤ហិកតាឲ្យប្រជាពលរដ្ឋជីកយកអាចម៍ដី ទៅផលិតក្អមឆ្នាំងធ្វើអាជីវកម្ម បន្តទៀត ៕
ចែករំលែកព័តមាននេះ