មេដឹកនំាគណបក្សសង្គ្រោះជាតិ លោក សម រង្ស៊ី និង លោក កឹម សុខា នឹងរៀបចំសន្និសីទសារព័ត៌មាននៅម៉ោង៩ព្រឹកថ្ងៃទី០២ កញ្ញា ២០១៣ ស្តីពីជំហររបស់គណបក្សប្រឆាំងនិងការធ្វើបាតុកម្មអហិង្សានៅថ្ងៃទី០៧ កញ្ញាខាងមុខ ។ សន្និសីទកាសែតនេះ ប្រព្រឹត្តទៅនៅទីស្នាក់ការកណ្តាលគណបក្សសង្គ្រោះជាតិ ស្ថិតតាមបណ្តោយផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ ។
កាលពីរសៀលថ្ងៃទី០១ កញ្ញាម្សិលមិញ ដូចតាមការគ្រោងទុក គណបក្សសង្គ្រោះជាតិ បានហាត់សមធ្វើមហាបាតុកម្មអហិង្សានៅទីលានប្រជាធិបតេយ្យ ស្ថិតនៅខាងក្រោយស្ថានទូតអាមេរិកប្រចំាកម្ពុជា ។ ការហាត់សមដោយមានការអនុញ្ញាតពីសាលារាជធានីភ្នំពេញត្រឹមម៉ោង៦ល្ងាចនោះ មានអ្នកចូលរួមប្រមាណ១០០០នាក់ ហើយក៏មានវត្តមានផងដែរពីលោក សម រង្ស៊ី និងថ្នាក់ដឹកនំាគណបក្សសង្រ្គោះជាតិមួយចំនួនទៀត ។ ការហាត់សមធ្វើមហាបាតុកម្មនេះ ក៏មានការតំាងសម្មាធិ ការបញ្ចំាងកុនរបស់មហាត្មិះគន្ឋី វីរបុរសទាមទារឯករាជ្យអហិង្សារបស់ឥណ្ឌា និងមានមេរៀនមួយចំនួនទៀត ដូចជាមានការធ្វើជាប៉ូលិស អ្នកកាន់ញត្តិយកទៅស្ថាប័ននានា ហើយអ្នកចូលរួមធ្វើមហាបាតុកម្មទំាងអស់ត្រូវគោរពនូវក្រមសីលធម៌របស់ខ្លួនជាចម្បងនោះគឺអហិង្សា ហើយអ្នកដែលប្រព្រឹត្តអំពើហិង្សាណាមួយក្នុងអំឡុងពេលធ្វើបាតុកម្ម ត្រូវទទួលខុសត្រូវដោយខ្លួនឯងជាដើម ។
មកដល់ព្រឹកថ្ងៃទី០២ កញ្ញានេះ មិនទាន់មានប្រភពណាបង្ហើបឲ្យដឹងថា គណបក្សប្រជាជនកម្ពុជា និង គណបក្សសង្រ្គោះជាតិ នឹងចរចាគ្នាជាថ្មីនៅពេលណានៅឡើយទេ បើទោះបីជាគណបក្សទំាងពីរដែលទទួលបានអាសនៈសភាក្នុងនីតិកាលទី៥ បានអះអាងរៀងៗខ្លួនពីឆន្ទៈក្នុងការដោះស្រាយនូវវិបត្តិនយោបាយដែលនៅសេសសល់តាមរយៈសេចក្តីថ្លែងការណ៏នានាក៏ដោយ ខណៈការប្រកាសលទ្ឋផលផ្លូវការរបស់គណៈកម្មាធិការជាតិរៀបចំការបោះឆ្នោតនៅសល់មិនដល់១សបា្តហ៏ទៀតនោះ ៕
ចែករំលែកព័តមាននេះ