ខេត្តកំពង់ឆ្នាំង ៖ មានការប្រកែកតវ៉ាគ្នាយ៉ាងខ្លាំងមួយ ស្ទើរតែក្លាយទៅជាអំពើហិង្សាទៅហើយ ខណៈដែលប្រជាពលរដ្ឋចំនួន៣៧គ្រួសារ តវ៉ាជាមួយភាគីម្ខាងទៀតដែលអះអាងថា ជាម្ចាស់ដីនិងមានដីការក្សាការពារនៅលើដីទំនាស់ ស្ថិតក្នុងភូមិចុងកោះ សង្កាត់ខ្សាម ក្រុងកំពង់ឆ្នាំង កាលពីរសៀលថ្ងៃទី២០ កុម្ភៈ
ដើមហេតុដែលបណ្ដាលឱ្យមានការប្រកែកតវ៉ាដាក់គ្នានេះ គឺដោយសារលោកលី ផេង ដែលមានទីលំនៅទីក្រុងភ្នំពេញបានអះអាងថា ជាម្ចាស់ដី និងមានដិការរក្សាការពារបានប្រើកម្មកររបស់ខ្លួនទៅកាប់ និងរុះរោងរបស់ប្រជាពលរដ្ឋ ដែលទើបសាងសង់កាលពីថ្ងៃទី១៩ កុម្ភៈ មុននេះមួយថ្ងៃ ។
នៅក្នុងជម្លោះនោះ លោក លី ផេង បានអះអាងប្រាប់ប្រជាពលរដ្ឋថា លោកមានដីការរក្សាការពារនៅក្នុងដៃ មិនអាចនរណាមកសាងសង់រំលោភច្បាប់បានទេ ។ ហេតុនេះ លោកបញ្ជាឱ្យកម្មកររបស់លោក រុះរោងទាំងអស់នោះចោល ហើយបើនរណាចង់ប្ដឹង សូមទៅប្ដឹងលោកចុះ លោកចាំទទួលគ្រប់ពេលវេលា
យ៉ាងនេះក្តី លោកលី ផេង មិនបានបង្ហាញដីការក្សាការពារដល់ប្រជាពលរដ្ឋរងគ្រោះទាំង៣៧គ្រួសារនោះទេ ដោយលោកប្រាប់ថា នៅក្នុងដៃស្ថាប័នតុលាការនោះទេ ។ ជាមួយគ្នានេះ ប្រជាពលរដ្ឋនៅតែស្នើសុំឱ្យលោកលី ផេង បង្ហាញពីដីការក្សាការពាររបស់តុលាការ និងបង្ហាញប័ណ្ណកម្មសិទ្ធិ ដែលលោកអះអាងថា បានទិញដីដោយស្របច្បាប់ពីលោក ជៀម ហៃ ។
ប្រជាពលរដ្ឋរងគ្រោះទាំង៣៧គ្រួសារបានអះអាងថា បានទិញដីពីលោកជា គុយម៉ុង ហៅក្តាន់ ដោយស្របច្បាប់ ព្រោះមានអាជ្ញាធរ ភូមិ ឃុំ ទទួលស្គាល់ត្រឹមត្រូវច្បាស់លាស់ ។ ប៉ុន្តែចាប់តាំងពីទិញមកដល់ពេលនេះ បានក្លាយទៅជាទំនាស់ រ៉ាំរ៉ៃ ដោយសារ តែលោក លី ផេង បានអះអាងថា ដីនោះជាដីរបស់គាត់ ។ ប្រជាពលរដ្ឋរងគ្រោះបានបន្តថា រយៈពេលជាង៣ឆ្នាំហើយ ដែលពួកគាត់ទាំង ៣៧ គ្រួសារបានរងគ្រោះ ព្រោះតែទិញដីមិនបានដី ។
ព័ត៌មានលម្អិតនឹងមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ