រាជធានីភ្នំពេញ ៖ យ៉ាងហោចណាស់មនុស្សប្រុស-ស្រី៦នាក់ ដែលក្នុងនោះមានគ្រូបង្រៀននៅវិទ្យាល័យបឹងត្របែកមួយរូបផង បានទទួលមរណភាពក្នុងឧប្បត្តិហេតុរថយន្តក្រឡុកបេតុងរបស់ក្រុមហ៊ុន SCG មួយគ្រឿង ដែលបើកបរដោយបុរសម្នាក់ខ្វះការប្រុងប្រយ័ត្ន ក៏បានជ្រុលចង្កូតបុករះម៉ូតូចំនួន៦គ្រឿង និងឡំប្រឺតាឥណ្ឌាចំនួន១គ្រឿងជាបន្តបន្ទាប់…
រាជធានីភ្នំពេញ ៖ យ៉ាងហោចណាស់មនុស្សប្រុស-ស្រី៦នាក់ ដែលក្នុងនោះមានគ្រូបង្រៀននៅវិទ្យាល័យបឹងត្របែកមួយរូបផង បានទទួលមរណភាពក្នុងឧប្បត្តិហេតុរថយន្តក្រឡុកបេតុងរបស់ក្រុមហ៊ុន SCG មួយគ្រឿង ដែលបើកបរដោយបុរសម្នាក់ខ្វះការប្រុងប្រយ័ត្ន ក៏បានជ្រុលចង្កូតបុករះម៉ូតូចំនួន៦គ្រឿង និងឡំប្រឺតាឥណ្ឌាចំនួន១គ្រឿងជាបន្តបន្ទាប់ បណ្តាលមនុស្សប្រុស-ស្រីជាអ្នកដំណើរតាមផ្លូវរងរបួសខ្លះធ្ងន់ខ្លះស្រាល ដួលរដូករណែលពេញផ្លូវ ។
ចំណែកឯអ្នកបើកបររថយន្តបង្កឱ្យមានគ្រោះថ្នាក់គួរឱ្យភ្ញាក់ផ្អើលនេះ ក៏ត្រូវបានកម្លាំងមានសមត្ថកិច្ចចាប់ជាប់វាយខ្នោះភ្លាមៗផងដែរ កាលពីវេលាម៉ោង៨ព្រឹក ថ្ងៃទី២០ ខែកុម្ភៈ ម្សិលមិញ នៅមុខវិទ្យាល័យបឹងត្របែក វិថីព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា បុរសជាអ្នកបើកបររថយន្តក្រឡុកបេតុង ដែលបង្កឱ្យមានគ្រោះថ្នាក់ដ៏រន្ធត់ ដែលបានចាប់ឃាត់ខ្លួនមានឈ្មោះ ព្រុំ ប៊ុនណាត អាយុ៤៨ឆ្នាំ ជាអ្នកបើកបររថយន្តក្រឡុកបេតុងក្រុមហ៊ុន SCG សព្វថ្ងៃស្នាក់នៅកន្លែងធ្វើការ ម្តុំចំការដូង និងមានទីលំនៅភូមិអំពិលលើ ឃុំអំពិលលើ ស្រុកកំពង់សៀម ខេត្តកំពង់ចាម ។
មុនពេលកើតហេតុដ៏រន្ធត់នេះ រថយន្តក្រឡុកបេតុងម៉ាកហ៊ីណូ ពណ៌.សលាយក្រហម ពាក់ស្លាកលេខព្រះសីហនុ ៥A-០១៤៣ មួយគ្រឿង ដែលបើកបរដោយបុរសខាងលើ បានបើកបរតាមបណ្តោយផ្លូវព្រះមុនីវង្ស ក្នុងទិសដៅពីត្បូងទៅជើង ។ តាមប្រភពដដែលបានប្រាប់បន្តទៀតថា ខណៈដែលមានយានយន្តគ្រប់ប្រភេទជាច្រើនគ្រឿង កំពុងតែធ្វើចរាចរណ៍តាមផ្លូវយ៉ាងមមារញឹកនោះ លុះមកដល់ចំណុចកើតហេតុខាងលើ រថយន្តក្រឡុកបេតុងមួយគ្រឿងនោះ ក៏បានបោះពួយបណ្ដាលឱ្យបុករះពីក្រោយម៉ូតូចំនួន៦គ្រឿង និងឡំប្រឺតាឥណ្ឌាចំនួន១គ្រឿងទៀត ដែលកំពុងតែធ្វើដំណើរជាបន្តបន្ទាប់ ខ្ទាតដួលរដូករណែល ខ្លះជាប់នៅក្រោមកង់រថយន្ត និងខ្លះខ្ទាតឆ្ងាយក៏មាន និងបានបង្កអោយមនុស្សប្រុស-ស្រីចំនួន៦នាក់ (ប្រុស៣ ស្រី៣នាក់) រងរបួសធ្ងន់និងស្រាល ក្នុងនោះក៏មានលោកគ្រូបង្រៀនម្នាក់ឈ្នោះ សុខ តែល អាយុជាង៤០ឆ្នាំម្នាក់ បង្រៀនថ្នាក់ទី១០ នៅវិទ្យាល័យបឹងត្របែកម្នាក់ បានរងរបួសធ្ងន់ធ្ងរជាងគេ និងបានស្លាប់នៅក្នុងមន្ទីរពេទ្យ ។ សពលោកគ្រូ សុខ តែល ត្រូវបានបញ្ជូនទៅធ្វើបុណ្យនៅស្រុកកំណើតឯខេត្តកំពង់ចាម ។
ពាក់ព័ន្ធទៅនឹងករណីរថយន្តក្រឡុកបេតុងបុករះនេះ ត្រូវបានអះអាងថា បានបង្កឡើងដោយសារតែអ្នកបើកបររថយន្តខាងលើ បើកបរដោយខ្វះការប្រុងប្រយ័ត្ន ហើយអ្នកបើកបរក៏ត្រូវបានកម្លាំងមានសម្ថកិច្ចធ្វើការចាប់ឃាត់ខ្លួនបានភ្លាមៗផងដែរ ។ ហេតុការណ៍នេះ ដំបូងអ្នកបើកបររថយន្តបានឆ្លើយដោះសារថា មកពីដាច់ហ្វ្រាំងជាន់មិនស៊ី តែការអះអាងរបស់អ្នកបើកបររថយន្តនេះ ត្រូវបានសមត្ថកិច្ចបានធ្វើការបដិសេធ និងបានវាយតម្លៃថា «មកពីការបើកបរខ្វះការប្រុងប្រយ័ត្ន» ។
ភ្លាមៗ កម្លាំងមានសមត្ថកិច្ចមូលដ្ឋានក៏បានចុះមកដល់កន្លែងកើតហេតុខាងលើ និងហៅរថយន្តសាមុយ
មកដឹកយកជនរងគ្រោះប្រុស-ស្រីទាំង៦នាក់ នាំទៅធ្វើការសង្គ្រោះនៅមន្ទីរពេទ្យ ។ ចំណែកឯបុរសជាអ្នកបើកបររថយន្តក្រឡុកបេតុងត្រូវបានចាប់ខ្លួនបញ្ជូនទៅកាន់ការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំធ្វើការដោះស្រាយជាបន្តទៀត ។ សូមបញ្ជាក់ថា រថយន្តក្រឡុកបេតុងនេះ មិនទាន់ត្រូវបានចាក់បេតុង ដែលលាយហើយនោះទេ គឺមានគោលដៅទៅចាក់បេតុង នៅការដ្ឋានសំណង់លើកំណាត់ផ្លូវ៣១០ ៕
ចែករំលែកព័តមាននេះ