បណ្តាវេជ្ជបណ្ឌិតបាននិយាយថា ការផឹកស្រាបៀរច្រើនបំផុតត្រឹម០,៥៦លីត្រ(ប្រហែលជា១កំប៉ុង)ក្នុងមួយថ្ងៃមានផលល្អសម្រាប់សុខភាពនិងអាចជួយកាត់បន្ថយឱកាសកើតជំងឺមួយចំនួនដូចជា ជំងឺទឹកនោមផ្អែម ជំងឺបេះដូង ជំងឺមហារីកនិងក្រួសក្នុងតម្រងនោម ។
ពួកគេបានអះអាងថា ការប្រើប្រាស់ស្រាបៀរក្នុងកម្រិតមធ្យមអាចជួយឱ្យមនុស្សចុះទម្ងន់ ប៉ុន្តែក្នុងករណីគេប្រើប្រាស់វាជាមួយរបបអាហារប្រកបដោយសុខភាពមួយ ។ ផ្ទុយទៅវិញ ការមិនហាត់ប្រាណ ហើយពិសារស្រាបៀរក្នុងបរិមាណច្រើនគឺពិតជាមានលទ្ធផលផ្ទុយពីការអះអាងខាងលើ ។
វេជ្ជបណ្ឌិតរ៉េម៉ុន អេស្ត្រាច់និងវេជ្ជបណ្ឌិតរ៉ូហ្សា ឡាមួឡាបានធ្វើការពិសោធលើមនុស្ស ប្រុសស្រី១.២៤៩នាក់ ដែលភាគច្រើននៃអ្នកទាំងនោះមានអាយុចាប់ពី៥៧ឆ្នាំឡើងទៅ ។ ជាលទ្ធផលបង្ហាញថា អ្នកដែលផឹកស្រាបៀរត្រឹម០,៥៦លីត្រ ឬប្រហែល១កំប៉ុងក្នុងពេលទទួលទានអាហារផ្តល់អត្ថប្រយោជន៍ដល់សុខភាព មិនត្រឹមតែមិនធ្វើឱ្យទម្ងន់ខ្លួនឡើងប៉ុណ្ណោះទេ តែបែរជាចុះទម្ងន់វិញ ។
វេជ្ជបណ្ឌិតឡាមួឡាបានថ្លែងថា៖ «ការសិក្សានេះយើងបានបោះបង់ចោលរឿងមិនពិតដែលគេនិយមជឿពីមុនមក ។ យើងដឹងថា ស្រាបៀរមិនមែនជាដើមហេតុដែលយើងត្រូវស្តីបន្ទោសលើការបណ្តាលឱ្យធាត់ដុះពោះនោះទេ »។ នៅក្នុងស្រាបៀរមានផ្ទុកទៅដោយអាស៊ីដហ្វូលិច វីតាមីនជាច្រើនមុខ ជាតិដែកនិងកាល់ស្យូម ។ សារធាតុទាំងនេះហើយដែលបណ្តាអ្នកស្រាវជ្រាវអះអាងថាមានផលវិជ្ជមានជួយការពារប្រព័ន្ធសរសៃឈាមបេះដូង ។
ទោះជាយ៉ាងនេះក្តី តាមការយល់ឃើញតាំងពីដើមរៀងមក ការផឹកស្រាបៀរជាប្រចាំក្នុងបរិមាណមធ្យមប្រឈមនឹងការកើតជំងឺទឹកនោមផ្អែមតិចតួចបំផុត ខណៈការឡើងឈាមក៏មានតិចតួច ប៉ុន្តែយោងតាមការសិក្សាដែលធ្វើឡើងដោយសាកលវិទ្យាល័យហាវើដ សហរដ្ឋអាមេរិកកាលឆ្នាំ២០១១បង្ហាញថា ក្នុងចំណោមបុរសវ័យកណ្តាល៣៨.០០០នាក់ ដែលចូលរួមពិសោធន៍ អត្រាប្រឈមនឹងជំងឺទឹកនោមផ្អែមរបស់គេថយចុះដល់ទៅ២៥ភាគរយក្រោយពីប្រើប្រាស់ស្រាបៀរ១កំប៉ុងក្នុងមួយថ្ងៃ ។
ចំណែកបណ្តាអ្នកស្រាវជ្រាវមកពីទីក្រុងបាសេឡូណា និងម៉ាឌ្រីដប្រទេសអេស្ប៉ាញបានស្នើឡើងថា ការផឹកស្រាបៀរ១កំប៉ុងក្នុងមួយថ្ងៃទទួលបានអត្ថប្រយោជន៍សុខភាព លុះត្រាតែគេហើយប្រាណជាប្រចាំគួបផ្សំនឹងរបបអាហារទទួលទានមានស្តង់ដាផងដែរ ។ នៅក្នុងស្រាបៀ០,៥៦លីត្រមានថាមពលប្រមាណ២០០កាល់ឡូរីស្មើនឹងកាហ្វេទឹកដោះគោ(Cafe latte)១កែវ ៕
ចែករំលែកព័តមាននេះ