ក្រុមអ្នកស្រាវជ្រាវបានអះអាងថា ផឹកតែយ៉ាងហោច៣ពែងក្នុងមួយថ្ងៃអាចជួយរក្សាធ្មេញឱ្យមានសុខភាពល្អ កាត់បន្ថយបានអត្រាកើតជំងឺពុកធ្មេញនិងជំងឺអញ្ចាញធ្មេញ ។ ការពិនិត្យលើលទ្ធផលនៃការសិក្សាមួយចំនួនកន្លងមកបានបង្ហាញថា «តែ»មានសមត្ថភាពប្រឆាំងនឹងបាក់តេរីពីរប្រភេទគឺ Streptoccus mutans និង Lactobacillus ។ បាក់តេរីទាំងពីរប្រភេទនេះហើយដែលបង្កឱ្យមានជំងឺអញ្ចាញធ្មេញនិងធ្មេញពុក ។
យោងតាមវេជ្ជបណ្ឌិត Carrie Ruxton អ្នកដឹកនាំការស្រាវជ្រាវឱ្យដឹងថា កម្រិត«តែ»ដែលមានកម្លាំងប្រឆាំងបាក់តេរីទាំង២ខាងលើបានគឺចន្លោះពី៣ទៅ៤ពែងក្នុងមួយថ្ងៃ ។ លោកស្រីបានថ្លែងថា ៖«ភស្តុតាងបញ្ជាក់យ៉ាងជាក់ច្បាស់ពីប្រសិទ្ធភាពរបស់«តែ»គឺផឹកចន្លោះពី៣ទៅ៤ពែងក្នុងមួយថ្ងៃធ្វើឱ្យបាក់តេរីនៅក្នុងមាត់ថយចុះ ។ លទ្ធផលនេះខ្ញុំជឿថា នឹងទទួលបានការស្វាគមន៍ពីបណ្តាទន្តពេទ្យក៏ដូចជាក្រុមអនាម័យមាត់ធ្មេញខណៈដែលពួកគេទាំងនេះកំពុងបន្តអប់រំប្រជាជនឱ្យយល់ដឹងពីការថែទាំមាត់ ធ្មេញ» ។ លោកស្រីវេជ្ជបណ្ឌិតបានបន្តថា នៅពេលដែលបាក់តេរីក្នុងមាត់មានប្រតិកម្មនឹងសារធាតុ Carbohydrates (ប្រភពផ្តល់ថាមពលមានក្នុងអាហារ ដូចជា បាយ នំប៉័ង…) វាក៏ផលិតសារធាតុអាស៊ីដ បំផ្លាញដល់ធ្មេញហើយចុងក្រោយនាំទៅរកការដាក់ធ្មេញឬដកធ្មេញ ។
«តែ»ត្រូវគេរកឃើញថា មានផ្ទុកសមាសធាតុប្រឆាំងអុកស៊ីដកម្ម២ប្រភេទគឺ flavonoids និង Catechins ។ flavonoids និង Catechins ជាសមាសធាតុប្រភេទ tannin (សមាសធាតុគីមីនៅក្នុងស្លឹកឈើ ឬសម្បកឈើនិងផ្លែឈើដែលមិនទាន់ទុំ) មានប្រសិទ្ធភាពប្រឆាំងនឹងអតិសុខុមប្រាណ ៕
ចែករំលែកព័តមាននេះ