រាជធានីភ្នំពេញ ៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខ ក្រសួងពាណិជ្ជកម្ម បានសហការជាមួយសហភាពសហព័ន្ធយុវជនកម្ពុជា នឹងរៀបចំពិព័រណ៍ពាណិជ្ជកម្មផលិតផលខ្មែរ ដែលបានជ្រើសរើសយកខេត្តចំនួន៣សម្រាប់រៀបចំ គឺនៅខេត្តព្រៃវែង បាត់ដំបង និងខេត្តបន្ទាយមានជ័យ ។
យោងតាមសេចក្ដីជូនដំណឹងរបស់ក្រសួងពាណិជ្ជកម្មបានឲ្យដឹងថា ក្រៅពីការអបអរសាទរបុណ្យជាតិ ពិព័រណ៍នេះនឹងជួយបង្កើនភាពសប្បាយរីករាយដល់យុវជន និងប្រជាជនខ្មែរ ដែលបានមកជួបជុំគ្នាក្នុងនាមជាមហាគ្រួសារខ្មែរនារដូវចូលឆ្នាំប្រពៃណីជាតិ និងចូលរួមទស្សនាការដាក់បង្ហាញផលិតផលខ្មែរថ្មីៗប្លែកៗ អមដោយការលេងល្បែងប្រជាប្រិយចម្រុះមុខ និងការសម្តែងសិល្បៈក្នុងពេលរាត្រីផងដែរ ។
ក្រសួងពាណិជ្ជកម្មបានជំរុញដល់ម្ចាស់សហគ្រាស ពាណិជ្ជករ ផលិតករ និងអាជីវករ ដែលមានបំណងទៅចូលរួមផ្សព្វផ្សាយ និងដាក់តាំងលក់ផលិតផលក្នុងព្រឹត្តិការណ៍នេះ សូមមកទាក់ទង និងបំពេញបែបបទនៅនាយកដ្ឋានកិច្ចការពិព័រណ៍នៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្ម ចាប់ពីថ្ងៃជូនដំណឹងនេះរហូតដល់ ថ្ងៃទី១ ខែមេសា ។
ព្រឹតិ្តការណ៍រៀបចំពិព័រណ៍ពាណិជ្ជកម្មផលិតផលខ្មែរ ក្រសួងពាណិជ្ជកម្មនឹងប្រារព្ធធ្វើឡើងរយៈពេល៥ថ្ងៃជាប់គ្នា គិតចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០១៩ នៅក្នុងខេត្តព្រៃវែង បាត់ដំបង និងខេត្តបន្ទាយមានជ័យ ។ លោកឧកញ៉ា តែ តាំងប៉ ប្រធានសម្ព័ន្ឋសមាគមសហគ្រាសធុនតូច និងមធ្យមបានអបអរសាទរព្រឹត្តិការណ៍នេះ ដែលនឹងជួយលើកស្ទួយផលិតផលក្នុងស្រុក ប៉ុន្តែវាគ្រាន់តែជាចំណែកតូចមួយប៉ុណ្ណោះ ដោយលោកលើកឡើងថា ដើម្បីលើកស្ទួយផលិតផលក្នុងស្រុក ក្រសួងពាណិជ្ជកម្មគួរទប់ស្កាត់ការនាំចូលខ្លះ ដើម្បីជួយឲ្យវិស័យសហគ្រាសធុនតូច និងមធ្យមបានរស់បាន និងអាចប្រកួតប្រជែងបាននៅក្នុងទីផ្សារក្នុងស្រុក។
លោកឧកញ៉ាបន្តថា ផលិតផលក្នុងស្រុកកាន់តែច្រើនបាននិងកំពុងមានគុណភាព ហើយអ្នកផលិតកាន់តែយកចិត្តទុកដាក់លើគុណភាពដែរ ។ លោកឧកញ៉ាបានមានប្រសាសន៍ថា ៖« ការទប់ស្កាត់ការនាំចូល ទន្ទឹមនឹងការផលិតកើនឡើងទាំងបរិមាណនិងគុណភាព នឹងជួយឲ្យម្ចាស់សហគ្រាសក្នុងស្រុកអាចប្រកួតប្រជែងបាននៅលើទីផ្សារ »៕
ចែករំលែកព័តមាននេះ