រាជធានីភ្នំពេញ ៖ នៅក្នុងសប្ដាហ៍ទី៣នៃខែកុម្ភៈនេះ គម្រោងវិនិយោគចំនួន៥ ដែលមានទឹកប្រាក់ជាង៦១៧លានដុល្លារអ និងផ្ដល់ការងារជូនពលរដ្ឋកម្ពុជាចំនួន៩.៥៩៤នាក់ ត្រូវបានក្រុមប្រឹក្សាអភិវឌ្ឍន៍កម្ពុជា ហៅកាត់ថាCDC អនុម័តជាផ្លូវការ ដើម្បីដំណើរការវិនិយោគនៅក្នុងប្រទេសកម្ពុជា…
រាជធានីភ្នំពេញ ៖ នៅក្នុងសប្ដាហ៍ទី៣នៃខែកុម្ភៈនេះ គម្រោងវិនិយោគចំនួន៥ ដែលមានទឹកប្រាក់ជាង៦១៧លានដុល្លារអ និងផ្ដល់ការងារជូនពលរដ្ឋកម្ពុជាចំនួន៩.៥៩៤នាក់ ត្រូវបានក្រុមប្រឹក្សាអភិវឌ្ឍន៍កម្ពុជា ហៅកាត់ថាCDC អនុម័តជាផ្លូវការ ដើម្បីដំណើរការវិនិយោគនៅក្នុងប្រទេសកម្ពុជា ។
យោងតាមការប្រកាសរបស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា មានក្រុមហ៊ុន៥ដែលបានអនុញ្ញាតឲ្យវិនិយោគនៅក្នុងប្រទេសកម្ពុជា ក្នុងនោះរួមមាន ១- គម្រោងបង្កើតរោងចក្រផលិតម្ស៉ៅក្រដាស “Paper Pulp and Lignin” ពីឈើដាំដុះក្នុងស្រុក ដែលមានទីតាំងវិនិយោគស្ថិតនៅភូមិភ្ជាវ ឃុំត្រែង ស្រុករតនៈមណ្ឌល ខេត្តបាត់ដំបង មានទុនវិនិយោគប្រមាណ ១៧,២លានដុល្លារ និងអាចបង្កើតការងារបានចំនួន២៦១កន្លែង ។ ២- គម្រោងបង្កើតរោងចក្រផលិត និងផ្គុំដំឡើងសម្ភារបរិក្ខារអគ្គិសនី ដែលមានទីតាំងវិនិយោគស្ថិតនៅភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ៣,៩លានដុល្លារ និងអាចបង្កើតការងារបានចំនួន៥១០កន្លែង ។
៣-គម្រោងអភិវឌ្ឍន៍ទីក្រុងទេសចរណ៍ “TEMI” ដែលរួមមាន សណ្ឋាគារថ្នាក់ផ្កាយ៥ចំនួន៨០០បន្ទប់ មជ្ឈមណ្ឌលពាណិជ្ជកម្ម តារាងវាយកូនគោល បឹងហ្គាឡូ ផ្ទះវីឡា រមណីយដ្ឋានទេសចរណ៍ សួនកម្សាន្ដ ចំណតកប៉ាល់ និងគម្រោងផ្សេងៗមួយចំនួនទៀតរបស់វិនិយោគិនចិន ដែលមានទីតាំង វិនិយោគស្ថិតនៅស្រុកគីរីសាគរ ខេត្តកោះកុង មានទុនវិនិយោគប្រមាណ៥០០,៤លានដុល្លារអ និងអាចបង្កើតការងារបានចំនួន៥.១៥០កន្លែង ។ ៤-គម្រោងសាងសង់និងអាជីវកម្មសណ្ឋាគារថ្នាក់ផ្កាយ៥ចំនួន៣០០បន្ទប់ មជ្ឈមណ្ឌលពាណិជ្ជកម្ម និងរីសត ដែលមានទីតាំងវិនិយោគស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុ មានទុនវិនិយោគប្រមាណ៨៨,៤លានដុល្លារ និងអាចបង្កើតការងារបានចំនួន២.៥៩៨កន្លែង ។
៥-គម្រោងបង្កើតរោងចក្រផលិតស្រោមដៃគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៣ ភូមិព្រៃស្តេច ឃុំវាល ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៧,៧លានដុល្លារ និងអាចបង្កើតការងារបានចំនួន១.០៧៥កន្លែង ។
សូមបញ្ជាក់ថា ក្នុងខែកុម្ភៈនេះ ក្រុមប្រឹក្សាអភិវឌ្ឍន៍កម្ពុជា បានអនុម័តចេញវិញ្ញាបនបត្រ នូវគម្រោងជាច្រើន ដែលមានទឹកប្រាក់សរុបប្រមាណជាង១.១០០លានដុល្លារអាមេរិក និងផ្ដល់ការងាររាប់ពាន់នាក់ដល់ប្រជាពលរដ្ឋកម្ពុជា ។ នេះជាសញ្ញាណវិជ្ជមានមួយសម្រាប់កំណើនសេដ្ឋកិច្ចកម្ពុជា ក្នុងពេលដែលកម្ពុជាកំពុងទាក់ទាញបន្ថែមនូវអ្នកវិនិយោគក្រៅប្រទេស ដើម្បីបង្កើតការងារជូនពលរដ្ឋក្នុងស្រុក។
បើតាមសេដ្ឋវិទូជាន់ខ្ពស់នានា បានផ្ដល់ជាមតិឲ្យកម្ពុជាធ្វើពិពិធកម្មសេដ្ឋកិច្ច ដោយមិនត្រូវពឹងលើសកម្មភាពដដែលៗដូចជា ពឹងតែលើវិស័យកាត់ដេរ ឬវិស័យណាមួយជាគោលនោះទេ គឺត្រូវងាកទៅរកការផលិតណាដែលផ្ដល់តម្លៃបន្ថែមខ្ពស់ ស្របពេលវិស័យកាត់ដេរកំពុងមានភាពរង្គោះរង្គើដោយ EBA ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានមានប្រសាសន៍ថា លោកមើលឃើញថា រាជរដ្ឋាភិបាលកំពុងខិតខំបន្ថែមក្នុងការទាក់ទាញដល់បណ្ដាវិនិយោគិន មកបណ្ដាក់ទុននៅក្នុងប្រទេស ដោយក្នុងនោះគេឃើញយ៉ាងច្បាស់ថា រដ្ឋាភិបាលបានកាត់បន្ថយនូវការចំណាយនានារបស់វិនិយោគ ដូចជាការលុបបំបាត់ស្ថាប័នមួយចំនួន ជាក់ស្ដែងស្ថាប័នកាំសាប ស្ថាប័នកាំកុងត្រូលនៅតាមព្រំដែនជាដើម ៕
ចែករំលែកព័តមាននេះ